ޣައްޒާ ހަނގުރާމަ ހުއްޓުވުމަށް ޤަތަރުން ކުރާ މަސައްކަތް ކުރިއަށް ގެންދާނަން: ޤަތަރުގެ އަމީރު

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓުވުމަށް ޤަތަރުން ކުރަމުން އަންނަ މަސައްކަތް ކުރިއަށް ގެންދާނެ ކަމަށް، ޤަތަރުގެ އަމީރު ޝެއިޚް ތަމީމް ބިން ޙަމަދު އަލް ޘާނީ ވިދާޅުވެއްޖެ އެވެ.

ޤަތަރު މިހެން ވިދާޅުވީ އެމެރިކާގެ ނިއު ޔޯކުގައި ހުންނަ އދ ގެ މައި މަރުކަޒުގައި. އދ ގެ ޖެނަރަލް އެސެމްބްލީގައި ވާހަކަ ދައްކަވަމުންނެވެ.

ޖެނަރަލް އެސެމްބްލީގައި ވާހަކަ ދައްކަވަމުން ޤަތަރުގެ އަމީރު ވަނީ، ދާދި ފަހުން އިސްރާއީލް އިން ޤަތަރަށް ދިން ހަމަލާ ކުށްވެރި ކުރައްވާ ކަމަށް ވިދާޅުވެފަ އެވެ. އިސްރާއީލް އިން ޤަތަރަށް ހަމަލާ ދީފައި ވަނީ، ޤަތަރުގައި ތިބި ހަމާސްގެ ސިޔާސީ އިސްވެރިންނަށް އަމާޒު ކޮށްގެންނެވެ.

ޤަތަރުގެ އަމީރު ވިދާޅުވީ އިސްރާއީލް އިން ދީފައިވާ ހަމަލާ އަކީ ޓެރަރިޒަމްގެ އަމަލުތަކުގެ ފަހަތުގައި ތިބި މީހުންނަށް ދެކޮޅަށް ދިން ޤާނޫނީ ހަމަލާއެއް ނޫން ކަމަށެވެ. އަދި އެ ހަމަލާގެ ސަބަބުން، ޣައްޒާގެ ރައްޔިތުންނާ ދެކޮޅަށް ހިންގަމުން އަންނަ އަނިޔާވެރި އަމަލުތައް ހުއްޓުވުމަށް ކުރަމުން އަންނަ ޑިޕްލޮމެޓިކް މަސައްކަތަށް ވެސްް ހުރަސްއެޅޭ ކަމަށް އޭނާ ވިދާޅުވި އެވެ.

އިސްރާއީލްގެ ހަމަލާއާ ގުޅޭ ގޮތުން ޤަތަރުގެ އަމީރު ވިދާޅުވެފައި ވަނީ، ޤަތަރުގެ ދުޝްމަނުންނާ ދެކޮޅަށް ހަތިޔާރު ބޭނުން ކުރުމަކީ އެ ޤައުމަށް ފަސޭހަ ކަމެއް ކަމަށެވެ. އެހެން ނަމަވެސް، ޤަތަރިން ޑިޕްލޮމަސީ އިސްކޮށް، އެގޮތުގައި ކުރިއަށް ދާނެ ކަމަށް ވެސް އޭނާ ވިދާޅުވި އެވެ. އެހެންކަމުން، އެމެރިކާ އަދި މިޞްރާ އެކު ކުރަމުން އަންނަ މަސައްކަތް ކުރިއަށް ގެންދާނެ ކަމުގައި ޤަތަރުގެ އަމީރު ވިދާޅުވި އެވެ.

އިސްރާއީލް އިން އަންނަނީ ޣައްޒާ އަށް ދެމުން އަންނަ ހަމަލާތައް އެއް ދުވަހުން އަނެއް ދުވަހަށް ފުޅާ ކުރަމުންނެވެ. އެއީ ހަމާސް ޖަމާއަތުން ރަހީނު ކޮށްފައިވާ އިސްރާއީލްގެ ރައްޔިތުން މިނިވަން ކުރުމަށް، ޚާއްސަ އޮޕަރޭޝަނެއް އިއުލާން ކުރުމަށް ފަހު ދެމުން އަންނަ ހަމަލާ ތަކެކެވެ.

ޣައްޒާ ހަނގުރާމަ ނިންމުމަށް ޤަތަރުން އަންނަނީ މެދުވެރިއެއްގެ ދައުރު އަދާ ކުރަމުންނެވެ. އެގޮތުން މިޞްރާ އެކު ޤަތަރުން މެދުވެރިއެއްގެ ދައުރު އަދާ ކުރަމުން އަންނައިރު، އެމެރިކާ އިން ވެސް ވަނީ ޤަތަރުން ކުރާ މަސައްކަތަށް ތައުރީފު ކޮށްފަ އެވެ.

ޤަތަރުގެ އަމީރު ވިދާޅުވީ، ރަހީނުން މިނިވަން ކުރުމުގެ ވިސްނުން އިސްރާއީލް އިން މިހާރު ދޫކޮށްލާފައިވާ ކަމަށެވެ. އޭގެ ބަދަލުގައި އިސްރާއީލްގެ މަޤުސަދަކީ ޣައްޒާގައި ދިރިއުޅެވޭނެ ގޮތް ނެތިކޮށްލުން ކަމަށާއި، އެމީހުން ބޭނުން ވަނީ އެ ހަނގުރާމަ ކުރިއަށް ގެންދަން ކަމަށް ވެސް އޭނާ ވިދާޅުވެފައިވެ އެވެ.