ޤަތަރަށް ދޭ ހަމަލާތަކާ ގުޅިގެން، އެމެރިކާ އިން އަސްކަރީ ފިޔަވަޅު އެޅުމުގެ އަމުރެއްގައި ޓްރަމްޕް ސޮއި ކުރައްވައިފި

ޤަތަރަށް އަމާޒުކޮށް ދެމުން އަންނަ ހަމަލާތަކާ ގުޅިގެން ޑިޕްލޮމެޓިކް، އިޤްތިޞާދީ އަދި އަސްކަރީ ފިޔަވަޅު ތަކެއް އަޅަން ޖެހިއްޖެ ޙާލަތެއްގައި، އެކަން ކުރުމުގެ ރިޔާސީ އަމުރެއްގައި އެމެރިކާގެ ރައީސް ޑޮނަލްޑް ޓްރަމްޕް ސޮއި ކުރައްވައިފި އެވެ.

މި އަމުރުގައި އެމެރިކާގެ ރައީސް ޓްރަމްޕް ސޮއި ކުރައްވާފައި ވަނީ، ސެޕްޓެމްބަރު މަހުގެ 29 ވަނަ ދުވަހު އެވެ. މިއީ ޤަތަރުގައި ތިބި ހަމާސް ޖަމާއަތުގެ ސިޔާސީ އޮފިޝަލުންނަށް އަމާޒުކޮށް އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫގެ އަމުރަށް ދީފައިވާ ހަމަލާއާ ގުޅިގެން ޓްރަމްޕް ސޮއި ކުރެއްވި އަމުރެކެވެ.

ޓްރަމްޕްގެ އަމުރުގައި ބަޔާން ކޮށްފައިވާ ގޮތުގައި ޤަތަރަކީ އެމެރިކާގެ އެންމެ ގާތް، އަދި އެންމެ ވަފާވެރި އެކުވެރިޔާ އެވެ. އެހެންކަމުން އެމެރިކާ އާއި ޤަތަރާ ދެމެދު އޮތް ތާރީޚީ ގުޅުމަށް ރިއާޔަތްކޮށް، އަދި ޤަތަރަށް ބޭރުގެ އަދުއްވުންގެ ފަރާތުން ކުރިމަތި ވަމުންދާ ނުރައްކާތަކަށް ބަލާއިރު، ޤަތަރުގެ ސަލާމަތާއި އަދި ސަރަހައްދުގެ ސަލާމަތް ކަށަވަރު ކުރުމަކީ އެމެރިކާގެ ސިޔާސަތެއް ކަމަށް ވަނީ ބުނެފަ އެވެ.

އަމުރުގައި ބަޔާން ކޮށްފައިވާ ގޮތުން، މީގެ ފަހުން ޤަތަރުގެ ސަރަހައްދަށާއި، ސިޔާދަތާއި އަދި މުހިންމު އަސާސީ ވަސީލަތްތަލަށް ދެވޭ ކޮންމެ ހަމަލާ އަކީ އެމެރިކާގެ ސުލްޙަ އާއި، ސަލާމަތަށް ކުރިމަތިވާ ނުރައްކަލެއްގެ ގޮތުގައި އެ ޤައުމުން ދެކޭނެ އެވެ.

އެހެންކަމުން އެފަދަ ހަމަލާއެއް ދެވިއްޖެ ނަމަ، އެމެރިކާގެ އަދި ޤަތަރުގެ މަސްލަހަތު ހިމާޔަތްކޮށް، ސުލްހަ އާއި ހަމަޖެހުން އަނބުރާ ގެނައުމަށްޓަކައި ޑިޕްލޮމެޓިކް، އިޤްތިޞާދީ އަދި ބޭނުންވެއްޖެ ނަމަ އަސްކަރީ ފިޔަވަޅުތައް އެޅުމަށް އެމެރިކާ އިން ފަސް ނުޖެހޭނެ ކަމަށް އަމުރުގައި ބަޔާން ކޮށްފައިވެ އެވެ.

ޓްރަމްޕް ސޮއި ކުރައްވާފައިވާ އަމުރުގައި ވަނީ އެމެރިކާގެ ޕެންޓަގަން، ސްޓޭޓް ޑިޕާޓްމަންޓް އަދި ނެޝަނަލް އިންޓެލިޖެންސްގެ ޑިރެކްޓަރަށް ވަނީ، ޤަތަރާ އެކު ގުޅިގެން ކުއްލި ޙާލަތްތަތަކަށް ރޭވުންތައް އެކުލަވާލުމަށް ވެސް އަމުރު ކުރައްވައިފަ އެވެ.

މިދިޔަ ސެޕްޓެމްބަރު މަހުގެ ތެރޭގައި އިސްރާއީލް އިން ވަނީ ޤަތަރުގެ ވެރި ރަށް ދޯހާ އަށް އަމާޒުކޮށް ހަމަލާ ދީފަ އެވެ. އެއީ ޤަތަރުގައި ތިބި ހަމާސް ޖަމާއަތުގެ އޮފިޝަލުންނާއި، ޤަތަރުގެ އޮފިޝަލުންނާ ދެމެދު ޣައްޒާ ހަނގުރާމައާ ގުޅޭ މަޝްވަރާތައް ކުރިއަށް ގެންދަމުން އަންނަނިކޮށެވެ. ހަމާސްގެ އިސްވެރިން ތަކެއް މަރާލުމަށް އަމާޒުކޮށް އިސްރާއީލް އިން ދިން ހަމަލާގައި، ޤަތަރުގެ ސިފައިންގެ ބަޔަކަށް ވަނީ އަނިޔާވެފަ އެވެ.

އިސްރާއީލްގެ ހަމަލާއާ ގުޅުގެން ޤަތަރާއި، ގަލްފް އަދި އަރަބި ޤައުމު ތަކުން ވަނީ އެ ހަމަލާ ކުށްވެރި ކޮށްފަ އެވެ. އަދި އެކަމާ ގުޅިގެން ކުއްލި ބައްދަލުވުމެއް ބާއްވައި، ސަލާމަތާއި ރައްކާތެރިކަން ކަށަވަރު ކުރުމަށް ފިޔަވަޅު އެޅުމަށް ވަނީ ނިންމައިފަ އެވެ.

މީގެ ކުރިން ޕެންޓަގަންގައި އިސް ލަފާދޭ ފަރާތެއްގެ ގޮތުގައި ހުންނެވި ބިލާލް ސަޢާބް ވިދާޅުވެފައިވާ ގޮތުގައި، ޓްރަމްޕް ސޮއި ކުރެއްވި އެ އަމުރަކީ ވަރަށް މުހިންމު އަމުރެެކެވެ.