ޓްރަމްޕްއާ ބައްދަލު ކުރައްވާކަން އިއުލާން ކުރެއްވުމާ އެކު، ނަތަންޔާހޫ ޤަތަރަށް ފާޑު ކިޔައިފި

މި މަހުގެ ފަހު ކޮޅު، އެމެރިކާގެ ރައީސް ޑޮނަލްޑް ޓްރަމްޕްއާ ބައްދަލު ކުރައްވަން ހަމަޖެހިފައިވާކަން އިއުލާން ކުރެއްވުމާ އެކު، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ޤަތަރަށް ފާޑު ކިޔައިފި އެވެ.

އަންގާރަ ދުވަހު ނަތަންޔާހޫ ވިދާޅުވެފައި ވަނީ އެމެރިކާގެ ނިއު ޔޯކުގައި ހުންނަ އދ ގެ މައި މަރުކަޒުގައި ވާހަކަ ދެއްްކެވުމަށް ފަހު އެމެރިކާގެ ރައީސް ޓްރަމްޕްއާ ބައްދަލު ކުރައްވާނެ ކަމަށެވެ.

ނޫސްވެރިންނާ ވާހަކަ ދައްކަވަމުން ނަތަންޔާހޫ ވިދާޅުވެފައި ވަނީ، އެމެރިކާގެ ރިޔާސީ ގަނޑުވަރު ވައިޓް ހައުސް އަށް ވަޑައިގަތުމަށް ޓްރަމްޕް އޭނާ އަށް ދައުވަތު ދީފައިވާ ކަމަށެވެ. އެހެންކަމުން، އދ ގައި ވާހަކަ ދެއްކުމަށް ފަހު، ޓްރަމްޕްއާ ބައްދަލު ކުރައްވާނެ ކަމަށް ނަތަންޔާހޫ ވިދާޅުވި އެވެ.

އެއާއެކު ނަތަންޔާހޫ ވަނީ، މިދިޔަ ހަފުތާގެ ތެރޭގައި އިސްރާއީލް އިން ޤަތަރަށް އަމާޒުކޮށް ދީފައިވާ ހަމަލާ ދިފާއު ކުރައްވައި ވާހަކަ ދައްކަވައިފަ އެވެ. އޭނާ ވިދާޅުވީ، ޤަތަރުގެ ވެރި ރަށް ދޯހާގައި ތިބި ހަމާސްގެ އިސްވެރިންނާ ދެކޮޅަށް އިސްރާއީލް ދިން ދިން ހަމަލާ އަކީ، އެކަށީގެންވާ އަމަލެއް ކަމަށެވެ.

ނަތަންޔާހޫ ވިދާޅުވީ ޤަތަރަކީ ހަމާސްއާ ގުޅިފައިވާ ޤައުމެއް ކަމަށާއި، ހަމާސް އަށް ހިޔާވަހިކަން ދީ، ޤަތަރުން އަންނަނީ ހަމާސް އަށް ފައިސާގެ އެހީތެރިކަން ވެސް ފޯރުކޮށްދެމުން ކަމަށެވެ. ޤަތަރަށް ނުފޫޒު ފޯރުވުމުގެ ފުރުސަތު ވެސް އޮތް ކަަމަށާއި، ނަމަވެސް އެކަން ނުކުރަން ނިންމީ ކަމުގައި ފާހަގަ ކުރައްވައި ނަތަންޔާހޫ ވިދާޅުވީ، އިސްރާއީލްގެ އަމަލަކީ އެންމެ އެކަށީގެންވާ އަމަލު ކަމަށެވެ.

ޣައްޒާ ހަނގުރާމައިގެ މައްސަލައިގައި ޤަތަރަކީ މެދުވެރިއެއްގެ ދައުރު އަދާ ކުރަމުން އަންނަ ޤައުމެވެ. އެކަމާ ގުޅޭ ގޮތުން ހަމާސްގެ އިސްވެރިންގެ ބައްދަލުވުމެއް ދޯހާގައި ކުރިއަށް ދަނިކޮށް އިސްރާއީލް އިން ހަމަލާ ދީފައިވާއިރު، މިއީ އެމެރިކާގެ ރަޙުމަތްތެރި ޤައުމަކަށް އަމާޒުކޮށް އިސްރާއީލް ދިން ހަމަލާ ދިން ފުރަތަމަ ފަހަރެވެ.

އިސްރާއީލް އިން ޤަތަރަށް ދިން ހަމަލާގައި ހަ މީހަކު ޝަހީދުވެފައިވާއިރު، އިސްރާއީލް އިން އަމާޒު ކުރީ ހަމާސްގެ އިސް އޮފިޝަލުން ތަކެއް މަރާލުމަަށެވެ. ނަމަވެސް، އެ ހަމަލާގައި ހަމާސްގެ އެއްވެސް އިސްވެރިޔަކަށް ގެއްލުމެއް ލިބިފައި ނުވާ ކަމަށް އެ ޖަމާއަތުން ވަނީ ބުނެފަ އެވެ.

ހަނގުރާމަ ނިންމުމަށް މެދުވެރިއެއްގެ ދައުރު އަދާ ކުރަމުން އަންނަ ޤަތަރަށް، އިސްރާއީލް ދިން ހަމަލާ ދިނުމުން އެމެރިކާ އިން ވެސް ވަނީ އެކަން ކުށްވެރި ކޮށްފަ އެވެ. އަދި އެމެރިކާގެ ރައީސް ޓްރަމްޕް ވިދާޅުވެފައި ވަނީ، އެ ހަމަލާ ދިނުމުގެ ކުރިން އެކަމުގެ އެއްވެސް މައުލޫމާތެއް އޭނާ އަށް ލިބިވަޑައިގެންފައި ނުވާ ކަމަށެވެ. ޓްރަމްޕް ވަނީ، އިސްރާއީލް އިން ޤަތަރަށް ހަމަލާ ދިނުން ވެސް ކުށްވެރި ކުރައްވައިފަ އެވެ.