އިސްރާއީލް އިން ޤަތަރަށް ހަމަލާ ދިނުމަކީ "ދޯކާ"އެއް: ވިކްޓޮފް

ހަމާސް ޖަމާއަތުގެ އިސްވެރިންނަށް އަމާޒުކޮށް، ޤަތަރުގެ ވެރި ރަށް ދޯހާ އަށް އިސްރާއީލް އިން ހަމަލާ ދިނުމަކީ ވަރަށް ބޮޑު "ދޯކާ"އެއްގެ ގޮތުގައި ދެކޭ ކަމަށް، ސްޓީވް ވިކްޓޮފް ވިދާޅުވެއްޖެ އެވެ.

އެމެރިކާގެ ރައީސް ޑޮނަލްޑް ޓްރަމްޕްގެ ފަރާތުން މެދު އިރު މައްޗަށް ކަނޑައަޅުއްވާފައި ހުންނަވާ ޚާއްސަ މަންދޫބު ވިކްޓޮފް މިހެން ވިދާޅުވެފައި ވަނީ، ސީބީއެސް އަށް ދެއްވި އިންޓަވިޔުގަ އެވެ. ޤަތަރަށް އަމާޒުކޮށް އިސްރާއީލް އިން މިދިޔަ މަހު ހަމަލާ ދިންއިރު، އެމެރިކާގެ ރައީސް ޓްރަމްޕް ވަނީ އެ މައްސަލައިގައި އިސްރާއީލް އަށް ވަރަށް ބޮޑަށް ފާޑު ވިދާޅުވެފަ އެވެ.

ވިކްޓޮފް ވިދާޅުވީ ސެޕްޓެމްބަރު މަހުގެ ނުވަ ވަނަ ދުވަހު ދޯހާ އަށް އަމާޒުކޮށް އިސްރާއީލް އިން ހަމަލާ ދީފައިވާއިރު، އެކަމުގެ މައުލޫމާތު އޭނާ އަށް އެނގުނީ އޭގެ އަނެއް ދުވަހު ކަމަށެވެ. އަދި އެ ހަމަލާ އިން އިޙުސާސް ކުރެވުނީ އިސްރާއީލް އިން ވަރަށް ބޮޑު "ދޯކާ" އެއް ދިނުން ކަމަށް ވެސް ވިކްޓޮފް ވަނީ ވިދާޅުވެފަ އެވެ.

ޤަތަރަކީ އެމެރިކާއާ ވަރަށް ގާތް ގުޅުމެއް އޮންނަ ޤައުމަކަށް ވާއިރު، އިސްރާއީލް އިން ޣައްޒާގައި ހިންގަމުން އައި ހަނގުރާމަ ނިމުމަކަށް ގެނައުމުގައި ޤަތަރުން ވަނީ މެދުވެރިއެއްގެ ދައުރު ވެސް އަދާ ކޮށްފަ އެވެ. އިސްރާއީލް އިން ދިން ހަމަލާއާ ގުޅިގެން އެމެރިކާގެ އިތުރުން، މުޅި ދުނިޔޭގެ ނުރުހުން ވަނީ އެ ޤައުމަށް އަމާޒުވެފަ އެވެ.

ވިކްޓޮފް ވިދާޅުވީ އެ ހަމަލާގެ ސަބަބުން ވަރަށް ބޮޑު ނޭދެވޭ އަސަރު ތަކެއް ކުރި ކަމަށެވެ. ސަބަބަކީ ޤަތަރާއި، މިޞްރު އަދި ތުރުކީ އަކީ މަޝްވަރާ ތަކުގައި މުހިންމު ދައުރެއް އަދާ ކޮށްފައިވާ ޤައުމު ތަކަކަށްވުން ކަމަށް އޭނާ ފާހަގަ ކުރެއްވި އެވެ. ހަމަލާގެ ސަބަބުން ޤަތަރުގެ އިތުބާރު ވަރަށް ބޮޑަށް ގެއްލުނު ކަމަށާއި، އެކަމުގެ ސަބަބުން ހަމާސް ޖަމާއަތާ ހަމައަށް ވާސިލްވުމަށް ވެސް އުނދަގޫ ތަކެއް ކުރިމަތިވި ކަމަށް އޭނާ ބުންޏެވެ.

ހަމަލާއާ ގުޅިގެން އޭރު ޓްރަމްޕް ވިދާޅުވެފައި ވަނީ، ޤަތަރަށް ހަމަލާ ދިނުމަށް ނިންމީ އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ކަމަށާއި، އެކަމުގައި އޭނާގެ އެއްވެސް ދައުރެއް ނޯންނާނެ ކަމަށެވެ. އަދި އެ ހަމަލާ ދިނުމުގެ ކުރިން އެ ފަދަ އެއްވެސް މައުލޫމާތެއް ވެސް ލިބިވަޑައިގެންފައި ނުވާ ކަމަށް އޭރު ޓްރަމްޕް ވަނީ ވިދާޅުވެފަ އެވެ.

އިސްރާއީލް އިން ޣައްޒާ ގައި ހިންގަމުން އައި ހަނގުރާމަ ހުއްޓުމަކަށް ގެނައުމުގައި އެންމެ ބޮޑު ދައުރެއް އަދާ ކޮށްފައި ވަނީ ޓްރަމްޕް އެވެ. އެގޮތުން ޓްރަމްޕްގެ ފަރާތުން ވަނީ 29 ނުކުތާގެ މައްޗަށް އެކުލެވޭ ޕްލޭނެއް ހުށަހަޅައިފަ އެވެ. މިޞްރުގެ ޝަރަމް އަލް ޝައިޚުގައި އެކަމާ ގުޅޭ ގޮތުން މަޝްވަރާ ކުރުމަށް ފަހު، ސުލްޙައިގެ އެއްބަސްވުމެއް ވެސް ވަނީ އެކުލަވާލައިފަ އެވެ. އަދި ފުރަތަމަ ފިޔަވަހި މިހާރު ވަނީ ތަންފީޒުކޮށް ނިމިފަ އެވެ.

އިސްރާއީލް އިން ޤަތަރަށް ދިން ހަމަލާގެ ސަބަބުން ޓްރަމްޕް އާއި ދުނިޔޭގެ ނުރުހުން އެ ޤައުމަށް އަމާޒުވެފައި ވަނިކޮށް، ނަތަންޔާހޫ ވަނީ ޤަތަރުގެ ބޮޑު ވަޒީރުގެ އަރިހުން މައާފަށް ވެސް އެދިވަޑައިގެންފަ އެވެ. އެހެން އެދިވަޑައިގެންފައި ވަނީ މި މަހު އޭނާ އެމެރިކާގެ ރިޔާސީ ގަނޑުވަރު ވައިޓް ހައުސް އަށް ވަޑައިގެން، ޓްރަމްޕްއާ އެކު ބޭއްވި ބައްދަލުވުމެއްގެ ތެރެއިން ޤަތަރުގެ ބޮޑު ވަޒީރަށް ފޯނުން ގުޅުއްވައިގެންނެވެ.