އެއްބަސްވުމާ މެދު ގޮތެއް ނިންމުމަށް، ހަމާސް އަށް ވަކި މުއްދަތެއް ދީފި

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ނިމުމަކަށް ގެނައުމަށް ކުރަމުން އަންނަ މަސައްކަތުގައި، އެމެރިކާގެ ރައީސް ޑޮނަލްޑް ޓްރަމްޕް ހުށަހަޅުއްވާފައިވާ ހުށަހެޅުމާ މެދު ގޮތެއް ނިންމުމަށް، ހަމާސް ޖަމާއަތަށް ވަކި މުއްދަތެއް ދީފި އެވެ.

ޓްރަމްޕް ވިދާޅުވެފައި ވަނީ، އެއްބަސްވުން ހަމާސް ޖަމާއަތަށް ފޮނުވާފައިވާ ކަަމަށާއި، އެ ޖަމާއަތުން އެއްބަސްވުން ދިރާސާ ކުރަމުން އަންނަ ކަމަށް ބުނެފައިވާ ކަމަށެވެ. އަދި އެ ހުށަހެޅުމާ ގުޅޭ ޖަވާބު ދިނުމަށް، ތިން ދުވަސް، ނުވަތަ ހަތަރު ދުވަހުގެ މުއްދަތެއް ދީފައިވާ ކަމަށް ޓްރަމްޕް ވިދާޅުވި އެވެ.

ޓްރަމްޕްގެ ފަރާތުން ހުށަހަޅުއްވާފައިވާ އެ ހުށަހެޅުމަކީ އިސްރާއީލް އިން ވެސް ޤަބޫލު ކޮށްފައިވާ ހުށަހެޅުމެކެވެ. އެކަން ހާމަ ކުރައްވާފައި ވަނީ މި ހަފުތާގެ ތެރޭގައި އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އެމެރިކާ އަށް ކުރެއްވި ދަތުރުފުޅުގަ އެވެ.

އަރަބި އަދި އިސްލާމީ ޤައުމު ތަކުން ވެސް މަރުޙަބާ ކިޔާފައިވާ އެ ހުށަހެޅުމުގައި ވަނީ، އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓާލުމަށެވެ. އަދި 72 ގަޑިއިރުގެ ތެރޭގައި ހަމާސް އިން ރަހީނު ކޮށްފައިވާ އިސްރާއީލްގެ ރައްޔިތުން މިނިވަން ކުރުމާއި، ހަމާސް ޖަމާއަތުން ހަތިޔާރު ބެހެއްޓުމާއި، އިސްރާއީލްގެ ސިފައިން މަޑު މަޑުން ޣައްޒާ އިން ފޭބުމަށް ވެސް ހުށަހެޅުމުގައި ވަނީ ހިމަނައިފަ އެވެ. ހަމަ އެހެންމެ، ޓްރަމްޕްގެ ބެއްލެވުމުގެ ދަށުން ޣައްޒާ ހިންގުމަށް ވަގުތީ އިދާރާއެއް ވެސް އެކުލަވާލެވޭނެ އެވެ.

ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، މިވަގުތު އިންތިޒާރު ކުރަމުން އަންނަނީ ހަމާސް ޖަމާއަތުގެ ޖަވާބަކަށް ކަމަށެވެ. ޚާއްސަކޮށް ހަމާސް އިން އެއްބަސްވުން ޤަބޫލު ކުރޭތޯ، ނުވަތަ ނުކުރޭތޯ ބަލަން ބޭނުންވާކަން ފާހަގަ ކުރައްވަމުން ޓްރަމްޕް ވިދާޅުވީ، ހަމާސް އިން އެއްބަސްވުން ޤަބޫލު ނުކޮށްފި ނަމަ، އެއީ ވަރަށް ހިތާމަ ހުރި ކަމެއް ކަމަށެވެ.

އެކަމާ ގުޅިގެން ފަލަސްޠީނުގެ އިސް އޮފިޝަލު ވިދާޅުވެފައި ވަނީ، ހަމާސް އިން މިހާރު އެ ޕްލޭނާ މެދު އެތެރޭ ސިޔާސީ އަދި އަސްކަރީ އިސްވެރިންގެ މެދުގައި މަޝްވަރާ ކުރަން ފަށާފައިވާ ކަމަށެވެ. ނަމަވެސް، އެކަމާ ގުޅޭ އިތުރު އެހެން އެއްވެސް ތަފްސީލެއް ހާމަކޮށްފައި ނުވެ އެވެ.

މީގެ އިތުރުން ޤަތަރުން ބުނެފައި ވަނީ، ހަމާސް އިން ހުށަހެޅުން ޒިންމާދާރު ކަމާ އެކު ދިރާސާ ކުރުމަށް އެއްބަސްވެފައިވާ ކަމަށެވެ. އަދި ހަމާސް އާއި ތުރުކީ އާއެކު ބައްދަލުވުމެއް ބޭއްވުމަށް ވެސް ހަަމަޖެހިފައިވާ ކަމަށް ޤަތަރުން ވަނީ ބުނެފަ އެވެ.