އެއީ ރަހުމަތްތެރިއެއް ކަމުގައި ވިޔަސް، އާއިލާގެ މެންބަރެއް ކަމުގައި ވިޔަސް، މި ދުނިޔެއާ އެމީހަކު ވަކިވެ ދިއުމުން އެ ކުރެވޭ ހިތްދަތި އިހުސާސްތަކަކީ ހަގީގަތުގައިވެސް ދުލަކުން ނުވަތަ ގަލަމަކުން ބަޔާންކޮށްދެވޭނެ އިޙްސާސްތަކެއް ނޫނެވެ. ވަކިން ޚާއްސަކޮށް، އެމީހަކު މި ދުނިޔެއާ ވަކިވެދިޔަކީ ކުއްލި ގޮތަކަށް، ނުވަތަ ވަކި ހާދިސާއެއްގެ ސަބަބުން ކަމަށް ވާނަމަ، އެ ވޭން ވަކިން ގަދަވެއެވެ. ދުވަސްތައް ހަފުތާތަކަށް، ހަފުތާތައް މަސްތަކަށް، މަސްތައް އަހަރުތަކަށް ބަދަލުވެ، އުމުރު ދުވަހަށްވެސް އެ ހިތްދަތިކަމުގައި އުޅެންޖެހޭ ފަހަރު އާދެއެވެ.
ޔަހޫދީ އިޒްރޭލުން ޣައްޒާއަށް މިހާރު ދެމުންދާ އުދުވާނީ ހަމަލާތަކުގައި މި ދުނިޔެއާ ވަކިވެދިޔަ މީހުންގެ އަދަދު 7000ށްވުރެ މައްޗަށް އަރާފައިވާއިރު، އެއީ ހަމަ ގައިމުވެސް ކޮންމެވެސް މީހެއްގެ ރަހުމަތްތެރިއެކެވެ. ނުވަތަ އާއިލާގެ މެންބަރެކެވެ. އެ ބަޔަކު މި ދުނިޔޭގައި ނެތުމުގެ ފަޅުކަމާއި، އެކަނިވެރިކަން ތަހައްމަލުކުރަން ޖެހިފައި އޮތީ، ގަތުލުއާންމެއްގެ ތެރޭގައެވެ. އެއްވެސް ކޮޅަކުން ހަމަޖެހުމެއް ލިބެން ނެތް ހާލަތެއްގައެވެ. އިޒްރޭލުގެ އުދުވާންތަކަށް 3 ހަފުތާއާ ގާތްވެފައި ވާއިރު، މި ދެންނެވިފަދަ އިންތިހާ ހިތްދަތިކަމާ ކުރިމަތިލާން ޖެހިފައިވާ އެއް އާއިލާއަކީ ސަގައްލާ އާއިލާއެވެ.
ސަގައްލާ އާއިލާއަކީ ޣައްޒާގެ އުތުރަށް ދޭ ހަމަލާތައް ވަރުގަދަކުރާނެ ކަމުގެ އިންޒާރާއެކު އެ ސަރަހައްދު ދޫކޮށް، ޚާން ޔޫނިސްއަށް ބަދަލުވި އާއިލާއެކެވެ. ނަމަވެސް، ޚާން ޔޫނިސްގައިވެސް ސަގައްލާ އާއިލާއަށް ސަލާމަތާއި ރައްކާތެރިކަމެއް ނުލިބުނެވެ. އެ އާއިލާއިން ހިޔާވަހިކަން ހޯދަމުންދިޔަ ތަނަށް އިޒްރޭލުން ދިން ހަމަލާގައި، ސަގައްލާ އާއިލާއިން 50ށްވުރެ ގިނަ މެންބަރުން ވަނީ މި ދުނިޔެއާ ވަކިވެފައެވެ. ފުރާނަ ސަލާމަތްވި ބައެއްގެ ހިތަށް ކުރާނެ އަސަރު، ވަޒަންކޮށްލަންވެސް ނޭނގެއެވެ.
ސަގައްލާ އާއިލާއިން މި ދުނިޔެއާ ވަކިވި މީހުން ވަޅުލުމަށްޓަކައި ނާސިރު ހޮސްޕިޓަލުގެ މޯގްއިން ގަބުރުތައް ގެންދިޔައިރު، އެ މަންޒަރު ބެލުމަށް އެތައް ބަޔަކު ޖަމާވެފައި ތިއްބެވެ. ސަގައްލާ އާއިލާއިން މިދުނިޔެއާ ވަކިވެ ދިޔަ މީހުންގެ ތެރޭގައި ފިރިހެނުންގެ އިތުރުން، އަންހެނުންނާއި ކުޑަކުދިންވެސް ހިމެނެއެވެ.
ސަގައްލާ އާއިލާއިން މިދުނިޔެއާ ވަކިވެދިޔަ މީހުންގެ ތިމާގެ މީހެއް ކަމަށްވާ އަމްރު އަލް-ބަތަތީ ބުނީ، ހިނގައިދިޔަ ގަތުލުއާންމަކީ ލަފުޒުތަކަކުން ބަޔާންކޮށްދެވޭ ވަރުގެ ކަމެއް ނޫންކަމަށެވެ.
މީ ޣައްޒާގެ ވާދީގެ ދެކުނަށް ދެވެން އޮންނަ ރައްކާތެރި ރާސްތާއެއް. ދީރު އަލް-ބަލާއިން ޚާން ޔޫނިސްއަށް. މަށަކީ ޚާން ޔޫނިސްގެ މީހެއް. ޣައްޒާ ސިޓީގަ ދިރިއުޅެމުން ދިޔަ އަހަރެމެންގެ ތިމާގެ މީހުންނަށް އަހަރެމެން މަރުހަބާކީމު. ޚާން ޔޫނިސްއަކީ ރައްކާތެރި ތަނެކޭ ބުނީމަ، އަހަރެމެން ގާތުގަ ތިބި 50އާ 70އާ ދެމެދު އަދަދެއްގެ މީހުން. އެކަމަކު، ރައްކާތެރި ތަނަކަށް ނުވި. ފަތިހު އަހަރެމެންނަށް ހޭލެވުނީ ގެއަށް ބޮން އެޅީމަ. ނޭވާވެސް ނުލެވުނު. މުޅި ތަނުގަ އޮތީ ދުންގަނޑު. މިހުންވެސް ވަކިނުވޭ. ކަރަންޓެއްވެސް ނެތްތާ ދޯ! އަހަރެމެންގެ ހަމަބުއްދި ފިލާދިޔަ. ބޯ ސަކަރާތްވީ.އަމްރު އަލް-ބަތަތީ؛ ސަގައްލާ އާއިލާގެ މީހެއް
21 ވަނަ ގަރުނުގެ ކުރިއަރާފައިވާ މި ޒަމާނުގައި، އިންސާނަކު ދިރިއުޅެން މަޖުބޫރުވެދާނެ ކަމަށް ހީވެސް ނުކުރާފަދަ އިންތިހާ ނިކަމެތި ހާލުގައި ދިރިއުޅެމުންދާ ރަށްވެހިންތަކެއްގެ ތިބި ޣައްޒާއަށް އަމާޒުކޮށް، ޔަހޫދީން ދެމުންދާ ހަމަލާތަކަށް ހުއްޓުމެއް ނާދެއެވެ. އޮކްޓޯބަރު 7 ވަނަ ދުވަހުން ފެށިގެން ދެމުންދާ ހަމަލާތަކުގެ އަޑުފަށްގަނޑުން މުޅި ޣައްޒާ ގުގުމަމުން ދާއިރު، މިއިން ދުވަހަކު އެ ހަމަލާތައް ހުއްޓިދާނެކަމުގެ ކޮޅުމަތިވެސް ފެންނާކަށް ނެތެވެ.
މީ ގަތުލުއާންމެއް. 50ށްވުރެ ގިނަ މީހުން މަރުވެއްޖެ. މީ ގަތުލުއާންމެއް. ހަގީގަތުގަވެސް ގަތުލުއާންމެއް. ހަމަ ތެދެއް މި ބުނީ، ބުނާނެ ހަމަ އެކައްޗެއްވެސް މަށަކަށް ނޭނގެ. އަހަރެންގެ ބަސް ހުއްޓިއްޖެ، ބަސް ހުއްޓިއްޖެއް، ބަސް ހުއްޓިއްޖެ. އަހަރެންގެ މުޅި އާއިލާ އެ ގެއްލުނީ. އަހަރެންގެ މުޅި އާއިލާ މަރުވެ އެދިޔައީ، މެހެމާނުންގެ ގޮތުގަ އަހަރެމެން ގާތުގަ ތިބި ތިމާގެ މީހުންނާވެސް އެކީގަ. އަހަރެމެންނަށް އެ ހުރިހާ އެންމެން ގެއްލި ހިނގައްޖެ.އަމްރު އަލް-ބަތަތީ؛ ސަގައްލާ އާއިލާގެ މީހެއް
އުތުރުގެ ސަރަހައްދުތައް ދޫކޮށް ދިއުމަށް އިންޒާރުދީ، އެތައް ސަތޭކަ ހާސް ބަޔަކު ޣައްޒާގެ ދެކުނަށް ޖަމާކުރުވުމަށްފަހު، ޔަހޫދީން މިހާރު އެންމެ ގަދައަށް ބޮން އަޅަމުން ދަނީ ދެކުނުގެ ސަރަހައްދުތަކަށެވެ. އަމިއްލަ ފަސްގަނޑުގެ މިނިވަންކަމުގެ ހައްގުގައި ތެދުވި ހަމާސް ޖަމާއަތާ ދެކޮޅަށް ކަމަށް ބުނެ، ޔަހޫދީ އިޒްރޭލުން، އެޔެއް މިޔެއް ބެލުމެއް ނެތި ޣައްޒާއަށް ހަމަލާތައް ދެމުންދަނީ ރަސްމީ ސިފައެއްގައި "ހަނގުރާމަ" އިއުލާން ކުރުމަށްފަހުއެވެ. ނަމަވެސް އިޒްރޭލުން ކުރަމުން އެ ދަނީ ހަނގުރާމައެއްތޯއެވެ؟ ހިންގަމުން އެދަނީ ނަސްލެއް ދޮވެލައި، މި ދުނިޔެއިން އެބައެއްގެ ވަސްވެސް ފޮހެލުމުގެ ލާއިންސާނީ ގަތުލުއާންމުގެ ޖަރީމާއެއް ނޫންތޯއެވެ!
