ށ.ނަރުދޫ ސްކޫލުގެ އައު އިމާރާތް ނިންމައި، އެއްދަންފަޅިއަށް ކިޔަވައިދޭން ފަށައިފި

ށ.ނަރުދޫ ސްކޫލުގައި އަލަށް އިމާރާތް ކުރި ތިން ބުރީގެ އިމާރާތުގައި ކިޔަވައިދޭން ފަށައިފިއެވެ.

އެ އިމާރާތުގައި ކިޔަވައިދޭން ފަށާފައިވަނީ އާދިއްތަ ދުވަހުއެވެ. މިއަހަރުގެ މިޑް ޓާމް ބްރޭކަށްފަހު އަލުން ސްކޫލުތަކުގެ ކިޔެވުން ފަށާފައިވާއިރު، ދެން އެސްކޫލުގައި ކިޔަވައިދޭނީ އެއް ދަންފަޅިއަށް ކަމަށް އެޑިޔުކޭޝަން މިނިސްޓްރީން ބުނެއެވެ.

ރައީސުލްޖުމްހޫރިއްޔާ އިބްރާހީމް މުހައްމަދު ސާލިޙުގެ ސަރުކާރުން އިމާރާތް ކުރި މި އިމާރާތުގައި 6 ކްލާސްރޫމް، ސްޓާފްރޫމް، ކޮމްޕިއުޓަރ ލެބް އަދި ހެލްތު ރޫމެއް ހުރެއެވެ.

މިއީ 9.2 މިލިއަން ރުފިޔާއަށް، ވޭވް ލެންތް ޕްރައިވެޓް ލިމިޓެޑާ ހަވާލުކޮށްގެން ކުރިއަށް ގެންދިޔަ މަޝްރޫއެކެވެ.

ނަރުދޫ ސްކޫލުގައި އަލަށް އިމާރާތް ކުރި ތިން ބުރީގެ އިމާރާތާއެކު، އެސްކޫލަށް މީގެ ކުރިން ދިމާވި ޖާގައިގެ ދަތިކަމަށް ހައްލު ލިބިފައިވާ ކަމަށް އެ ސްކޫލުން ބުނެއެވެ. އަދި މިހާރު ސްކޫލުގެ އިތުރު ހަރަކާތްތައް ހިންގުމަށް ވެސް ޖާގައިގެ ގޮތުން ދަތިކަމެއް ކުރިމަތިނުވާނެ ކަމަށް ސްކޫލުން ބުނެއެވެ. އަދި މިއީ ސްކޫލުގެ ދަރިވަރުންނާއި ޓީޗަރުންނަށް ލިބުނު ވަރަށް ބޮޑު ފަސޭހައެއްގެ ގޮތުގައި ފާހަގަކޮށްފައިވެއެވެ.

މި ސަރުކާރުން ވަނީ އަތޮޅުތެރޭގެ ވަރަށް ގިނަ ރަށްރަށުގެ ސްކޫލުތަކަށް ދިމާވެފައިވާ ޖާގައިގެ ދަތިކަން ހައްލުކުރުމުގެ ގޮތުން އައު ކްލާސްރޫމްތަކާއި ޕަލްޓިޕަރޕަސް ހޯލްތައް އިމާރާތްކޮށްފައެވެ. އެއްދަންފަޅިއަށް ސްކޫލުތައް ބަދަލުކުރުމަކީ މިސަރުކާރުގެ ސިޔާސަތަކަށް ވާއިރު އެކަން ވަރަށް ގިނަ ސްކޫލުތަކުގައި ތަންފީޒުކޮށްފައިވެއެވެ.