މަޖީދިއްޔާ ސްކޫލުގެ ސްޓޫޑަންޑް ކައުންސިލް މެންބަރުން ހުވާކޮށްފި

ރާއްޖޭގެ އެންމެ ގިނަ ދުވަސްވީ ސްކޫލުކަމުގައިވާ މަޖީދިއްޔާ ސްކޫލުގެ ސްޓޫޑެންޓް ކައުންސިލަށް މެންބަރުން ހުވާކޮށްފި އެވެ.

އާދިއްތަ ދުވަހު މަޖީދިއްޔާ ސްކޫލު އެސެމްބްލީގައި އެ ރަސްމިއްޔާތު ޝަރަފްވެރި ކޮށްދެއްވާފައިވަނީ އެޑިއުކޭޝަން މިނިސްޓްރީގެ ސްޓޭޓް މިނިސްޓަރ އަހްމަދު ޝަފީއު އެވެ.

މި ރަސްމިއްޔާތުގައި ވާހަކަދައްކަވަމުން، ޝަފީއު ވަނީ ލީޑަރޝިޕްގެ މުހިއްމު ކަން ފާހަގަކޮށް ލީޑަރޝިޕްގެ ސިފަތައް ކިޔާދެއްވައިފަ އެވެ. ސްޓޫޑެންޑް ކައުންސިލެއްގައި ތިބޭ ކުދިންނަކީ ކަންކަމުގައި އިސްނެގުމުގެ ސިފަ އަށަގަނެފައިވާ ކުދިންތަކެއްގެ ގޮތުގައި ހަރަކާތްތެރިވުމަށް ޝަފީއު ވަނީ ގޮވާލައްވާފަ އެވެ.

ޝަފީއު ވިދާޅުވީ، މަޖީދިއްޔާ ސްކޫލަށް މިއަހަރު 90 އަހަރުގެ ފުރޭ އިރު އެ ސްކޫލުގެ އިސް މަގާމުތަކަށް ހޮވޭ ކުދިންނަނީ ފަހުރުވެރިވާން ޖެހޭ ކުދިންތަކެއް ކަމަށެވެ.

މިއަދުގެ ރަސްމިއްޔާތުގައި މަޖީދިއްޔާ ސްކޫލުގެ ޕްރިންސިޕަލް އައިޝަތު މުހައްމަދު ސޯލިހް ވިދާޅުވީ، ސްޓޫޑެންޓް ކައުންސިލްގައި ތިބި ކުދިންނަކީ އެހެން ކުދިންނަށް ނަމޫނާ ދައްކަން ޖެހޭނެ ކުދިން ކަމަށެވެ. އަދި ސްކޫލުގެ ކަންކަމުގައި އިސްކޮށް ހަރަކާތްތެރިވާ އިރު އެކުދިންނަކީ ކިޔެވުމަށް ވަގުތު ދޭން އެނގޭ ޓައިމް މެނޭޖްކުރަން ދަންނަ ކުދިންނަށް ވާންޖެހޭ ކަމަށް އޭނާ ވިދާޅުވި އެވެ.

މަޖީދިއްސާ ސްކޫލުގެ ސްޓޫޑެންޓް ކައުންސިލްގައި 18 މެންބަރުން ތިބޭ އިރު ސްކޫލު ކެޕްޓަނަކަށް ހޮވިފައިވަނީ އިސްމާއިލް އާޒް ފައުޒާނެވެ.

މި ރަސްމިއްޔާތުގައި ވަނީ ސްކޫލުގެ އަލަށް ހޮވުނު 17 ޕްރިޕެކްޓުންވެސް ހުވާކޮށްފަ އެވެ.