ހާލަންޑަށް ބެލޮންޑޯ ލިބެންވާނެ، މެސީ އަކީ ވަކި ކެޓަގަރީއެއް: ގާޑިއޯލާ

ޔޫރަޕުގެ އެންމެ މޮޅު ފުޓްބޯޅަ ކުޅުންތެރިޔާ ހޮވައި އިނާމަކަށް ދޭ ބެލޮންޑީއޯ އެވޯޑް މި އަހަރު ހައްގުވާ ކުޅުންތެރިއަކީ އޭނާގެ ކޯޗުކަމުގައި ކުޅުނު މެންޗެސްޓާ ސިޓީގެ ނޯވޭ ފޯވަޑް އާލިން ހާލަންޑް ކަމަށް ޕެޕް ގާޑިއޯލާ ބުނެފި އެވެ.

ސިޓީ އަށް ހަތަރު ތަށި މިދިޔަ ސީޒަނުގައި ހޯދައިދިން ކޯޗު ބުނީ މި ތަށިތައް ހޯދައިދިނުމުގައި ހާލަންޑް ކިތަންމެ ޒުވާނަސް އޭނާގެ ދައުރު ވަރަށް ބޮޑު ކަމަށެވެ.

ހާލަންޑް ވަނީ އިނގިރޭސި ޕްރެމިއާ ލީގާއި އެފްއޭކަޕް އަދި ކާލިންކަޕާއި ސިޓީ މުޅިން އަލަށް ކާމިޔާބުކުރި ޗެމްޕިއަންސް ލީގު ތަށި ހޯދައިދިނުމަށް 53 މެޗުން 52 ގޯލު ޖަހައިފަ އެވެ.

މި އެވޯޑަށް ހާލަންޑާ އެންމެ ބޮޑަށް ވާދަކުރާނީ ފްރާންސްގެ ޕީއެސްޖީ ދޫކޮށް، އެމެރިކާގެ އިންޓަމިއާމީ އަށް ބަދަލުވި އާޖެންޓީނާގެ ކެޕްޓަން ލަޔޮނަލް މެސީ އެވެ. އޭނާ އަކި މިހާތަނަށް ރެކޯޑް އަދަދެއް ކަމަށްވާ ހަތް ފަހަރު ބެލޮންޑީއޯ އެވޯޑް ހޯދައިފައިވާ ކުޅުންތެރިޔާ އެވެ. މިދިޔަ ޑިސެމްބަރު މަހު ގަތަރުގައި ކުޅުނު ވޯލްޑްކަޕް ކާމިޔާބުކޮށްފައިވާތީވެ ގިނަ ބައެއްގެ ފެވަރިޓަކީ ވެސް މެސީ އެވެ.

ސްޕޭނުގެ ބާސެލޯނާގައި މެސީ، އޭނާގެ މޮޅު ކުޅުން ދެއްކިއިރު ކޯޗަކަށް ހުރި ގާޑިއޯލާ އަކީ އަބަދުވެސް މެސީ އަށް ތައުރީފް އޮއްސާލާ ކޯޗެކެވެ. ހާލަންޑަށް އެވޯޑް ހައްގުކަން ފާހަގަ ކުރަމުން ވެސް ގާޑިއޯލާ ބުނީ އެވޯޑަކީ މެސީގެ ވެސް އެއްޗެއް ކަމަށެވެ.

ފްރާންސްގެ މަޖައްލާއަކާއި ފީފާ ގުޅިގެން ހޮވާ މި އެވޯޑް ދިނުން އޮންނާނީ މި މަހުގެ 30 ވަނަ ދުވަހު ފްރާންސްގެ ޕެރިހުގަ އެވެ.