ކުރިއަށް އޮތް ދެދުވަހުގެ ތެރޭގައި ޣައްޒާއަށް ވަރަށް ބޮޑަށް ބޭނުންވާ އިންސާނީ އެހީ ހިފައިގެން ޓްރަކްތައް ވަންނާނެ ކަމަށް އުއްމީދު ކުރައްވާ ކަމަށް އެމެރިކާގެ ރައީސް ޖޯބައިޑަން ވިދާޅުވެއްޖެއެވެ.

މެދުއިރުމަތީގައި ހިނގަމުންދާ ހަމަނުޖެހުންތަކާ ބެހޭ ގޮތުން މަޝްވަރާ ކުރުމަށް ޔޫރަޕިއަން ޔޫނިއަން (އީޔޫ)ގެ ލީޑަރުންނާ އެކު ވައިޓް ހައުސްގައި ބޭއްވެވި ބައްދަލުވުމެއްގައި އެމެރިކާގެ ރައީސް ޖޯ ބައިޑަން ވިދާޅުވީ ކުރިއަށް އޮތް 24ގަޑިއިރާ 48 ގަޑިއިރާ ދެމެދުގެ ވަގުތެއްގައި ޣައްޒާއަށް ވަރަށް ބޮޑަށް ބޭނުންޖެހިފައިވާ އެހީ ތަކެތި ހިފައިގެން ޓްރަކްތައް އެތަނަށް ފޯރާނެ ކަމަށް އުއްމީދު ކުރައްވާ ކަމަށެވެ.

ޣައްޒާއަށް އެހީފޯރުވުމުގެ ފުރުޞަތު އޮތްތޯ ސުވާލުކުރުމުން ރައީސް ބައިޑަން ވިދާޅުވީ އިޒްރޭލުގެ ކަމާބެހޭ ފަރާތްތަކާއި މިޞްރުގެ ރައީސް އެކަމަށް އެއްބަސް ކުރުވާފައިވާނެ ކަމަށެވެ.

ރައީސް ބައިޑަން ވަނީ އެހީ ފޯރުކޮށްދިނުމުގައި ދިމާވާ ގޮންޖެހުންތައް ސިފަކުރެއްވުމަށް "ހައިވޭ ރީޕޭވިންގ" ގެ ލަފްޒީ ބަހުރުވަ ބޭނުންކުރައްވާފައެވެ. އަދި ކުރިއަށް އޮތް 24-48 ގަޑިއިރުގެ ތެރޭގައި ޒަރޫރީ އެހީއިން ބަރާކޮށްފައިވާ ފުރަތަމަ 20 ޓްރަކް ކާމިޔާބުކަމާ އެކު މަންޒިލަށް ދެވޭނެ ކަމަށް ގަބޫލުކުރައްވާ ކަމަށް ވިދާޅުވި އެވެ.

ބައިނަލްއަގުވާމީ ސަމާލުކަން ދީފައިވަނީ ޣައްޒާއަށް އެހީތެރިކަން ފޯރުކޮށްދިނުމުގެ މަގު ފަހިކޮށްދިނުމަށެވެ. ހާއްސަކޮށް އިސްރާއީލުން ކޮންޓްރޯލް ނުކުރާ އެއް އެކްސެސް ޕޮއިންޓް ކަމަށްވާ މިސްރަށް ދަތުރުކުރާ ރަފާހް ކްރޮސިންގ މެދުވެރިކޮށެވެ. ނަމަވެސް ހަމާސް އިން އިސްރާއީލަށް ދިން ހަމަލާއަށް ފަހު ގާތްގަނޑަކަށް ދެ ހަފުތާއެއްހާ ދުވަސް ވަންދެން މި ކްރޮސިންގ އޮޕަރޭޓް ނުކުރެވި އޮތުމުން ޣައްޒާގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމުގެ މުހިންމުކަން ވަނީ އިތުރުވެފަ އެވެ.

އެހީ ފޯރުކޮށްދިނުމާ މެދު ރައީސް ބައިޑަންގެ އުއްމީދަކީ މިހާރު ހިނގަމުންދާ ހަމަނުޖެހުންތަކުގެ ތެރޭގައި ޣައްޒާގެ ހުރިހާ ރައްޔިތުންނަށްވެސް މިއެހީގެ ކޮންމެވެސް މިންވަރެއް ލިބުން ކަމުގައި ވިދާޅުވިއެވެ.