ޣައްޒާގެ ހާލަތު - ބުރާސްފަތި ދުވަހު އެކަނިވެސް 100 އަށް ވުރެ ގިނަ ހަމަލާ
20 އޮކްޓޯބަރު 2023 | ހުކުރު 08:11ފަލަސްތީނަށް ދެމުންދާ ހަމަލާތަކުގައި 3700 އަށް ވުރެ ގިނަ މީހުން މަރުވެފައިވޭ
ޣައްޒާއަށް ދިން ހަމަލާ އެއްގެ ގޮވުން ހިނގާ މަންޒަރު
ބުރާސްފަތި ދުވަހުގެ ރޭ އެކަނިވެސް ޣައްޒާ އަށް 100 އަށް ވުރެ ގިނަ ހަމަލާ ދީފައިވާ ކަމަށް އިސްރާއީލުން ބުނެފިއެވެ.
މީޑިއާ ރިޕޯޓްތައް ބުނާ ގޮތުން ޣައްޒާގެ އެކި ހިސާބުތަކަށް އިސްރާއީލުގެ އަަސްކަރިއްޔާއިން ވަނީ ވައިގެ މަގުން އެއާރެއިޑް ހަމަލާތަކެއް ދީފައެވެ. އެ ހަމަލާތައް ދީފައި ވަނީ ކޮން ކޮން ސަރަހައްދުތަކަކަށް ކަން އެ ޤައުމުން ހާމަކޮށްފައެއް ނުވެއެވެ. އެހެންނަމަވެސް އެ ހަމަލާގައި ހޮހޮޅަތަކާއި، ވެއަރ ހައުސް ފަދަ ތަންތަނަށް ވަނީ ބޮޑެތި ގެއްލުންތަކެއް ވެފައެވެ.
އަދި 12 އަށް ވުރެ ގިނަ އޮޕަރޭޝަނަލް ހެޑްކުއަރޓަރ އަށް އިސްރާއީލުން ވަނީ ހަމަލާ ދީފައެވެ. އެ ގައުމުން ބުނީ މިހާތަނަށް އިސްރާއީލުން ފަލަސްތީނަށް ދެމުންދާ ހަމަލާތަކުގައި 3700 އަށް ވުރެ ގިނަ މީހުން މަރުވިކަން ކަށަވަރުކުރެވިފައިވާ ކަމަށެވެ. މި ހަމަލާތަކުގައި ޒަހަމްވި މީހުންގެ އަދަދު 13000 އަށް އަރައެވެ. އަދި ފަލަސްތީނާއި އިސްރާއީލާއި ދެމެދު ހިނގަމުންދާ ހަނގުރާމައިގައި އިސްރާއީލުގެ 1400 މީހުން ވަނީ މަރުވެފައެވެ. އަދި 3500 މީހުން ވަނީ ޒަހަމްވެފައެވެ.
އިސްރާއީލުން ވަނީ ހުޅަނގު އައްސޭރީގެ އަވަށްތައް ހިފާ އެ ސަރަހައްދަށް އަތްގަދަކުރުމަށް ކުރަމުންދާ މަސައްކަތް އިތުރަށް ވަރުގަދަކޮށްފައެވެ. ހަމަލާތަކުގެ އިތުރު ތަފްސީލަށް ބަލާ އިރު އިސްރާއީލުން ނޫރް ޝަމްސް ރެފިއުޖީ ކޭމްޕަށް ދިން ހަމަލާގައި 13 މީހުން ވަނީ މަރުވެފައެވެ. އޭގެ ތެރޭގައި 5 ކުޑަކުދިން ހިމެނެވެ. މި ހަމަލާ ވެސް ދީފައި ވަނީ ވައިގެ މަގުންނެވެ.
