މިސްރުގެ ދެ ފައްޅިއަކަށް ދިން ހަމަލާއެއްގައި 44 މީހުން މަރުވި ހާދިސާތަކަށް ފަހު ތިން މަސްދުވަހަށް ކުއްލި ނުރައްކަލުގެ ހާލަތު އިއުލާނުކޮށްފިއެވެ.

މިސްރުގެ ރައީސް އަބްދުލް ފައްތާހު އަލް ސީީސީގެ މި ފިޔަވަޅާއެކު މިސްރުގެ އިދާރާތަކަަށް ކޯޓް އަމުރަކާ ނުލައި މީހުން ހައްޔަރުކުރުމާއި މީހުންގެ ގެދޮރު ބަލާފާސްކުރުމުގެ ހުއްދަ ލިބިގެންދާނެއެވެ.

ޓަންޓާ އާއި އެލެގްޒެންޑްރިއާގައި އާދީއްތަ ދުވަހު ދިން ހަމަލާގެ ޒިންމާ އިސްލާމިކް ސްޓޭޓްގެ ނަމުގައި އުޅޭ ޖަމާއަތުންވަނީ ނަގާފައެވެ.

އެ ޖަމާއަތުގެ ހަމަލާ މިފަހަރު އަމާޒުކޮށްފައިވަނީ މިސްރުގެ ކްރިސްޓިއަނުންނަށް ކަމަށްވާއިރު އިތުރު ހަމަލާތައް ދޭނެކަމުގެ އިންޒާރުވަނީ ދީފައެވެ.

ނޭޝަނަލް ޑިފެންސް ކައުންސިލާއެކު ބޭއްވެވި ބައްދަލުވުމަށްފަހު ރައީސް ސީސީ ވަނީ ރިޔާސީގަނޑުވަރުގައި ތަގުރީރެއްދެއްވާފައެވެ.

ސީސީ ވިދާޅުވީ ކުއްލިހާލަތު ވަގުތުން ތަންފީޒުވީ ކަމަށާއި ގާނޫނު އަދި  ގާނޫނު އަސާސީގައިވާ ގޮތުގެ މަތިން ފިޔަވަޅު އަޅުއްވާނެ ކަމަށެވެ.

ގާނޫނު ހަދާ މަޖިލީހުގެ އަޣުލަބިއްޔަތު ސީސީއަށް ތާއީދުކުރެއެވެ.

ރައީސް ސީސީ މީގެ ކުރިން ވަނީ ގައުމުގެ މުހިއްމު ބިނާތައް ހިމާޔަތް ކުރުމަށްޓަކައި މުޅިގައުމުގެ އެކި ކަންކޮޅުތަކަށް އަސްކަރިއްޔާ ނެރުމަށް އަމުރުކުރައްވާފައެވެ.

ހަމަލާދިން ދުވަސް އިއްތިފާގު ވެފައި ވަނީ ކްރިސްޓިއަނުންގެ މުގައްދަސް ދުވަހެއް ފާހަގަ ކުރަމުންދިއަ ދުވަހާއެވެ.

އެގައުމުގެ ހެލްތު މިނިސްޓްރީން ބުނިގޮތުގައި ފުރަތަމަ ހަމަލާ އަމާޒުވި، ސީިރިޔާގެ އުތުރުގެ ސިޓީއެއް ކަމަށްވާ ޓަންޓާގައި ދިން ހަމަލާގައި މަދުވެގެން 27 މީހުން  މަރާލިއެވެ.

 އައިއެސްއިން ނެރުނު ބަޔާނެއްގައި ބުނީ ހަމަލާދީފައި ވަނީ ޖާނުންފިދާވުމުގެ ދެ ހަމަލާއެއްގެ ގޮތުގައި ކަމަށެވެ

އޭގެ ގަޑިއެއްހާއިރު ފަހުން ފުލުހުންވަނީ އެލެގްޒެންްޑްރިއާގެ ކޮޕްޓިކް ޗާޗަށް ހަމަލާދޭން ދިއަ ފިރެހެނަކު ޗާޗަށް ވަނަ ނުދީ ހިފަހައްޓާފައެވެ. އޭނާގެ އަތުގައި އޮތް ބޮން ގޮއްވާލާފައި ވަނީ ޗާޗްގެ ބޭރުގައި ކަމަށްވާއިރު 17 މީހުން މަރުވިއެވެ. އޭގެ ތެރޭގައި އެތައް ބައިވަރު ފުލުސް އޮފިސަރުންނެއް ހިމެނެއެވެ.