ޣައްޒާ ހަނގުރާމަ: 13 ދުވަހުގެ ތެރޭގައި 1500 އަށްވުރެ ގިނަ ކުޑަކުދިން ޝަހީދުކޮށްލައިފި
އިސްރާއީލްގެ ހަމަލާތަކުގައި ޝަހީދުވި ފަލަސްތީނުގެ 3،785 މީހުންގެ ތެރޭގައި 1،524 ކުޑަކުދިން ހިމެނޭ
އިސްރާއީލުން ފަލަސްތީނަށް މެދުނުކެނޑި ހަމަލާތައް ދެމުންދާ 13 ދުވަސް
އިސްރާއީލުން ޣައްޒާއަށް ދެމުންދާ ހަމަލާތަކުގައި 13 ދުވަހުގެ ތެރޭގައި 1500 އަށްވުރެ ގިނަ ކުޑަކުދިން ޝަހީދުކޮށްލައިފިއެވެ.
އިސްރާއީލުން ވަށާލާފައިވާ ޣައްޒާއަށް ޖެހިޖެހިގެން ވައިގެމަގުން ވަރުގަދަ ހަމަލާތައް މެދުނުކެނޑި ދެމުންދާތާ 13 ދުވަސް ވެފައިވާއިރު، އެ ހަމަލާތަކުގައި ފަލަސްތީނުން އެތައް ސަތޭކަ ބަޔަކު ވަނީ ޝަހީދުކޮށްލާފައެވެ. އަންގާރަ ދުވަހުގެ ރޭ އެންކްލޭވްގެ އަލް އަހްލީ އަލް އަރަބް ހޮސްޕިޓަލަށް އަމާޒުކޮށް ދިން ހަމަލާގައިވެސް 500 އަށްވުރެގިނަ މީހުން ވަނީ ޝަހީދުވެފައެވެ.
ފަލަސްތީނުގެ ސިއްހަތާ ބެހޭ ވުޒާރާއިން ބުރާސްފަތި ދުވަހު ކުރި އިއުލާނެއްގައި ބުނެފައިވަނީ އިސްރާއީލުން ފަލަސްތީނުގެ އެންކްލޭވްއަށް ދިން ވަރުގަދަ ހަމަލާތަކުގައި ޝަހީދުވި ފަލަސްތީނުގެ 3،785 މީހުންގެ ތެރޭގައި 1،524 ކުޑަކުދިން ހިމެނޭ ކަމަށެވެ. މަރުވި މީހުންގެ ތެރޭގައި 1،000 އަންހެނުން ވެސް ހިމެނޭ ކަމަށެވެ.
ފަލަސްތީނުގެ ވަފާ ނޫސް އެޖެންސީން ބުނި ގޮތުގައި އިސްރާއީލުން ޣައްޒާގެ މީހުން ދިރިއުޅޭ އެކި ސަރަހައްދުތަކަށް ބުރާސްފަތި ދުވަހުގެ ފަތިހު ދިން ހަމަލާތަކުގައި ފަލަސްތީނުގެ އެތައް ބަޔަކު ވަނީ ޝަހީދުވެފަ އެވެ.
ރަފާއަށް މިސައިލް ހަމަލާދީ އެތައް އާއިލާއެއްގެ 30 އަށް ވުރެ ގިނަ މީހުން މަރުވެ، އަބޫ ޔޫސުފް އަލް ނައްޖާރު ހޮސްޕިޓަލަށް ބަދަލުކުރި އެތައް ބަޔަކު ޒަހަމްވެފައިވާ ކަމަށް އެ ގައުމުގެ މަސްދަރުތަކުން ބުނެ އެވެ.
އިޒްރޭލުގެ މަތިންދާ ބޯޓުތަކުން ވަނީ ރަފާގެ އަލް މަސްރީ ޓަވަރުގެ މަތީ ފަންގިފިލާއަށް ވެސް ބޮން އަޅާފަ އެވެ.
ޚާން ޔުނިސްގެ ހުޅަނގުން މީހުން ދިރިއުޅޭ އިމާރާތަކަށް އިސްރާއީލުން ދިން ބޮމުގެ ހަމަލާއެއްގައި ފަލަސްތީނުގެ އެކަކު ޝަހީދުވެ، 21 މީހުން ޒަޚަމްވެފައިވާ ކަމަށް އެ ގައުމުގެ މަސްދަރުތަކުން ބުނެއެވެ.
އިޒްރޭލުން މި ހަމަލާ ދީފައި މިވަނީ އެމެރިކާގެ ރައީސް ޖޯ ބައިޑަން ގާހިރާ އާއި ތެލްއަވީވްއާ އެކު އެއްބަސްވުމެއްގައި ސޮއިކުރެއްވުމަށްފަހު، މިސްރުން ފަޅިން އަންނަ އެހީގެ އިންތިޒާރުގައި އެތައް ހާސް ބަޔަކު ތިބި ދަނޑިވަޅެއްގައެވެ.
ބައިޑަން ބުދަ ދުވަހު ވިދާޅުވީ މިސްރުގެ ރައީސް އަބްދުލް ފައްތާހު އަލް ސީސީ އެއްބަސްވެވަޑައިގަތީ ހުކުރު ދުވަހުން ފެށިގެން ޣައްޒާއަށް "20 ޓްރަކް ގެ އެހީގެ ސާމާނު ގެނައުމަށް" ކަމަށެވެ.
އިސްރާއީލުން މިދިޔަ ހަފުތާގައި ވަނީ ޣައްޒާ މުޅިން ވަށާލައި ތެލާއި ކާބޯތަކެއްޗާއި ފެން ކަނޑާލާފަ އެވެ.
