ވަރލްޑް ކަޕަށްފަހު ހާމޯސޯ ފުރަތަމަ ފަހަރަށް ގައުމީ ސްކޮޑަށް!

ސްޕެއިންއާ އެކު އަންހެނުންގެ ވަރލްޑް ކަޕް ހޯދި ޓީމްގެ ތަރި ޖެނީ ހާމޯސޯ އޭގެ ފަހުން ފުރަތަމަ ފަހަރަށް ސްޕެއިން ސްކޮޑާ ގުޅިއްޖެއެވެ.

އެމުބާރާތަށްފަހު ހާމޯސޯ ސްކޮޑާ ދުރުގައި ހުރީ ވަރލްޑްކަޕްގެ އިނާމް ދިނުމުގެ ރަސްމިއްޔާތުގައި, ސްޓޭޖްގައި ސްޕެއިން ފުޓްބޯޅަ ފެޑެރޭޝަންގެ ކުރީގެ ރައީސް ރުއިސް ރުބިއާލެސް ހާމޯސޯގެ ތުންފަތަށް ބޮސް ދިން މައްސަލައާ ގުޅިގެންނެވެ. ރުބިއާލެސް ފެޑެރޭޝަންގެ ރައީސްކަމުން އިސްތިއުފާ ދެއްވީ އެމައްސަލައާ ގުޅިގެން ކުރިމަތިވި ފިއްތުންތަކުގެ ސަބަބުންނެވެ. އެމައްސަލަ ދަނީ ބަލަމުންނެވެ. ދާދިފަހުން ހާމޯސޯ ބުނެފައިވަނީ އޭނާގެ އިހުތިޔާރެއް ނެތި ހިނގާފައިވާ މައްސަލާގައި އެއްވެސް މީހަކު އޭނާއާ މެދު ނުވިސްނާ ކަމަށެވެ.

ސްޕެއިން ފެޑެރޭޝަންގެ ރައީސްގެ އިތުރުން ވަރލްޑްކަޕް ހޯދައިދިން ކޯޗު ވިލްޑާ ވެސް ވަނި މަގާމުން ވަކިކޮށްފައެވެ. އެއީ އެމައްސަލާގައި ފެޑެރޭޝަންގެ ރައީސްއަށް ތާއީދުކުރުމުންނެވެ. ފެޑެރޭޝަންގެ ރައީސް ވިދާޅުވެފައިވަނީ އެއީ އިހުތިޔާރުގައި ގޯސް ނިޔަތެއްގައި ހިނގި ކަމެއް ނޫންކަމަށެވެ. އެއީ ކާމިޔާބީގެ އުފަލިގެ ތެރޭގައި ގޯސް ނިޔަތެއް ނެތި ހިނގި ކަމެއް ކަމަށެވެ.

ސްޕެއިންއަށް ކުރިއަށް އޮތީ ނޭޝަންސް ލީގުގައި މިމަހުގެ ފަހުކޮޅު އިޓަލީ އަދި ސްވިޒަރލެންޑާ ވާދަކުރާ މެޗެވެ. އެމެޗުތަކަށް ތައްޔާރުވުމަށް ފޯވާޑް ހާމޯސޯ މިހާރު ދަނީ ޓީމާއެކު ޕްރެކްޓިސް ކުރަމުންނެވެ.