ލޯން އެއްބަސްވުމެއްގެ ދަށުން މާޝިއާލް ވޮލްފްސްބާގް އަށް ބަދަލުވަނީ

ލޯން އެއްބަސްވުމެއްގެ ދަށުން މެންޗެސްޓާ ޔުނައިޓެޑަށް ކުޅެމުން އަންނަ އެންތޮނީ މާޝިއާލް ވޮލްފްސްބާގަށް ބަދަލުވާން އުޅޭކަމަށް ރިޕޯޓްތައް ބުނެފި އެވެ.

ކިކާ އިން ބުނީ މާޝިއާލްއާ ބެހޭގޮތުން ވޮލްފްސްބާގް އިން ޔުނައިޓެޑާ ވާހަކަ ދައްކާފައިވާ ކަމަށެވެ. އެގޮތުން ވޮލްފްސްބާގަށް މާޝިއަލް ގެނެވެން އޮތް ފުރުސަތުތަކަށްވެސް ވޮލްފްބާއިން ބަލަމުން އަންނަކަމަށް އެ ރިޕޯޓުގައި ވަނީ ބުނެފައެވެ.

ދާދި ފަހުން ނޫސްވެރިންނަށް މައުލޫމާތު ދެމުން މާޝިއާލް ބުނީ ސަޕޯޓަރުން އަދި ކްލަބް އުފާކޮށްދިނުމަށްވެސް އޭނާ މަސައްކަތްތަކެއް ކުރާ ކަމަށާއި، އަދި ކްލަބުގައި ދިގު މުއްދަތެއްވަންދެން މަޑުކުރަން ބޭނުންވާ ކަމަށެވެ. އެގޮތުން އެކަން އެގޮތަށް ވުމަށް އެދޭކަމަށްވެސް އޭނާ ވަނީ ބުނެފައެވެ.

ޔުނައިޓެޑްގައި އަދި އިތުރު ދެއަހަރު މާޝިއާލް މަޑުކުރަންޖެހޭ އިރު، އޭނާ ބުނީ ޔުނައިޓެޑުން އޭނާ ދޫކޮށްލާނެ ކަމަށްވެސް ނުބެލެވޭ ކަމަށެވެ. އެހެންނަމަވެސް މާޝިއާލް ބުނީ ކްލަބް ދޫކޮށްލަން ކްލަބުން އެންގުމާއެކު ދާނެ ކަމަށެވެ.

މާޝިއަލް ހޯދުމަށް ގިނަ ކްލަބްތަކުން އަންނަނީ މަސައްކަތްކުރަމުންނެވެ. އޭގެ ތެރޭގައި ޖަރުމަން، ފްރާންސް އަދި ސްޕެއިންގެ ބައެއް ކްލަބްތައް ހިމެނެއެވެ.

އުމުރުން 21 އަހަރުގެ މާޝިއާލް ކެރިޔަރު ފެށީ ފްރާންސްގެ އޮލިމްޕިކް ލިއޯން އެވެ. އެޓީމުގައި ސީޒަނެއް ހޭދަކުރުމަށްފަހު ދެން އޭނާ ބަދަލުވީ މޮނާކޯ އަށެވެ. އެގޮތުން އޭނާ ވަނީ އެ ކްލަބުގައި ހޭދަކުރި ތިން ސީޒަނުގައި ކުޅުނު 70 މެޗުގައި 15 ލަނޑު ކާމިޔާބުކޮށް މަޝްހޫރު ކްލަބްތަކުގެ ސަމާލުކަން ހޯދާފައެވެ.

އޭނާ ޔުނައިޓެޑަށް ބަދަލުވީ 2015 ވަނަ އަހަރެވެ. އެގޮތުން މިވީތަނަށް އޭނާ އެ ކްލަބަށް ކުޅުނު 91 މެޗުގައި 25 ލަނޑު ކާމިޔާބުކޮށްފައިވާ އިރު، އެފްއޭ ކަޕް އަދި އެފްއޭ ކޮމިއުނިޓީ ޝިލްޑްވެސް އޭނާ ވަނީ އެ ކްލަބާއެކު ކާމިޔާބުކޮށްފައެވެ.