ބުންޑަސްލީގާ: ބޮޑުތަފާތަކުން ވޮލްފްސްބާގް ބަލިކޮށް ބަޔާން ލީގު އުފުލާލައިފި

ބުންޑަސްލީގާގައި ބޮޑުތަފާތަކުން ވޮލްފްސްބާގް ބަލިކޮށް ބަޔާން މިއުނިކް ލީގުގެ އައްޑަނަ އުފުލާލައިފި އެވެ.

ހޮނިހިރު ދުވަހުގެ ރޭ ކުޅުނު މެޗު ވޮލްފްސްބާގާ ވާދަކޮށް ބަޔާން އިން މެޗު ކާމިޔާބުކުރީ 0-6 ގެ ތަފާތުބޮޑު ނަތީޖާއަކުންނެވެ.

ވޮލްފްސްބާގް ދަނޑުގައި ކުޅުނު މި މެޗު ފެށިގެން 19 ވަނަ މިނެޓުގައި ބަޔާން އިން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ އަލަބާ އެވެ. މި ލަނޑަށްފަހުވެސް ބަޔާން އިން ދިޔާއީ ވޮލްފްސްބާގްގެ ގޯލަށް ނުރައްކާކުރަމުންނެވެ.

އެގޮތުން 36 ވަނަ މިނެޓުގައި ރޮބާޓް ލެވަންޑޯސްކީ ވަނީ ބަޔާން އަށް މެޗުގެ ލީޑު ފުޅާކޮށްދީފައެވެ. ބަޔާން އިން މެޗުގައި ޖެހި ތިންވަނަ ލަނޑު 45 ވަނަ މިނެޓުގައި ކާމިޔާބުކުރީވެސް ލެވަންޑޯސްކީއެވެ. މި ލަނޑުތަކާއެކު ފުރަތަމަ ހާފް ނިމުނީ 0-3 ގެ ނަތީޖާއިން ވޮލްފްސްބާގްގެ މައްޗަށް ބަޔާން ކުރީގައި އޮވެގެންނެވެ.

ދެވަނަ ހާފް ފެށިގެންވެސް ރަނގަޅަށް ކުޅުނީ ބަޔާން އެވެ. އެގޮތުން އެޓީމުން ވަނީ ވޮލްފްސްބާގްގެ ހާފަށް ބާރުބޮޑުކޮށް ލަނޑު ޖެހުމަށް ގިނަ ފުރުސަތުތައް ތަނަވަސްކޮށްފައެވެ.

ބަޔާން އިން މެޗުގައި ޖެހި ހަތަރުވަނަ ލަނޑު 66 ވަނަ މިނެޓުގައި އާޔަން ރޮބެން ކާމިޔާބުކުރިއިރު، ފަސްވަނަ ލަނޑު 80 ވަނަ މިނެޓުގައި ކާމިޔާބުކުރީ ތޯމަސް މުލާއެވެ. އަދި އެޓީމުން މެޗުގައި ޖެހި ފަހު ލަނޑު 85 ވަނަ މިނެޓުގައި ކާމިޔާބުކޮށްދީފައިވަނީ ކިމިޗް އެވެ.

މި ނަތީޖާއާއެކު ބަޔާން ވަނީ ޕޮއިންޓް ތާވަލުގެ އެއްވަނައިގައި 10 ޕޮއިންޓްގެ ލީޑެއް ނަގާފައެވެ. އެޓީމުން ވަނީ ކުޅުނު 31 މެޗުން 73 ޕޮއިންޓް ހަމަކޮށްފައެވެ. ބަޔާން އިން ލީގުގެ ޗެމްޕިއަންކަން ހޯދާފައިވާއިރު، މިއީ އެޓީމު ލީގުގެ ޗެމްޕިއަންކަން ހޯދި 26 ވަނަ ފަހަރެވެ. އަދި މިއީ އެޓީމުން ޖައްސަޖައްސައިގެން ލީގުގެ ޗެމްޕިއަންކަން ހޯދި ފަސްވަނަ ފަހަރެވެ.