ޔަހޫދީންގެ ހަމަލާތަކުގައި ފަލަސްތީނުގެ ކުށެއް ނެތް 1900 އެއްހާ މީހުން ޝަހީދުވެއްޖެ

ފަލަސްތީނާއި އިސްރާއީލުގެ ކުރިމަތިލުން ތަކުގައި ޔަހޫދީ ހަރުކަށި ސިފައިން ދިން ހަމަލާތަކުގައި މިހާތަނަށް 1،900 އަށް ވުރެ ގިނަ މީހުން ޝަހީދުވެފައިވާ ކަމަށް ރިޕޯޓްކޮށްފިއެވެ.

ހޮނިހިރު ދުވަހު ހަމަލާބަދަލު ކުރަންފެށި ފަހުން ހަރުކަށި އިސްރާއީލުގެ ޔަހޫދީ ސިފައިން ވައިގެމަގުންދިން ހަމަލާތަކުގައި ޣައްޒާ އަދި ހުޅަނގު އައްސޭރީގައި ތިބި ފަލަސްތީނުގެ 921 މީހުން މަރުވެ 4،630 މީހުން ޒަޚަމްވެފައިވެއެވެ. އޭގެ ތެރޭގައި ޣައްޒާގައި 900 މީހުން މަރުވެ، ގާތްގަނޑަކަށް 4،500 މީހުން ޒަޚަމްވެފައިވާ ކަމަށް ފަލަސްތީނުގެ ހެލްތު މިނިސްޓްރީން ހޯމަ ދުވަހުގެ ހަވީރު ބުނެފައިވެއެވެ.

މީގެ އިތުރުން މި ހަމަނުޖެހުންތަކުގައި އިސްރާއީލުގެ 1،008 ޔަހޫދީން މަރުވެ، 2،901 މީހުން ޒަޚަމްވެފައިވާ ކަމަށް އިސްރާއީލުގެ މީޑިއާ ރިޕޯޓްތައް ބުނެފައިވެއެވެ. ބައެއް މީޑިއާތަކުން ރިޕޯޓްކުރާގޮތުން، މައްސަލަ އިތުރަށް ހޫނުކުރުމަށް ދޮގު ހަބަރުތައް އިސްރާއީލަށް ތާއިދުކުރާ ހުޅަނގުގެ މީޑިއާތަކުން ދަނީ ފަތުރަމުންނެވެ.

ޕަލަސްތީނުގެ އިރުމަތީގައި ތިބި ރެފިއުޖީންގެ ކަންކަން ބަލަމުންދާ، އދ ގެ ރިލީފް އެންޑް ވޯކްސް އެޖެންސީ (ޔޫއެންއާރުޑަބްލިއުއޭ) އިން އަންގާރަ ދުވަހު ބުނީ ފާއިތުވި 24 ގަޑިއިރުގެ ތެރޭގައި ޣައްޒާގައި ހިނގަމުންދާ ހަމަނުޖެހުންތަކުގެ ސަބަބުން ގެދޮރު ގެއްލިފައިވާ މީހުންގެ އަދަދު ވަރަށް ބޮޑަށް އިތުރުވެ ޖުމްލަ 187،518 މީހުންނަށް އަރާފައިވާ ކަމަށާއި އެ އަދަދު އިތުރަށް މައްޗަށް އަރާނެ ކަމަށް ބެލެވޭ ކަމަށެވެ.

ޔޫއެންއާރުޑަބްލިއުއޭގެ އެހީގައި 83 ސްކޫލެއްގައި މިހާރު ގާތްގަނޑަކަށް 137،500 ގެދޮރު ގެއްލިފައިވާ މީހުން ހިޔާވަހިކަން ހޯދަމުންދާ ކަމަށް އެންމެ ފަހުގެ ތަފާސް ހިސާބުތަކުން ދައްކައެވެ.

ޔޫއެންއާރުޑަބްލިއުއޭ އިން ބުނީ ވައިގެމަގުންދޭ ހަމަލާތައް ކުރިއަށްދާ ވަރަކަށް ގެދޮރު ގެއްލިފައިވާ މީހުންގެ އަދަދު އިތުރުވަމުން އަންނަ ކަމަށާއި ބައެއް ހިޔާތަކުގައި މިހާރު ވެސް ބޯފެނަށް ޖެހެމުންދާ ކަމަށެވެ.