އެކުވެރި އަރަބި ޢިމާރާތަށް ކަނޑައަޅުއްވާފައި ހުންނަވާ ސަފީރަކަށް މިދުފާގެ ނަން ފާސްކުރުމަށް ފޮނުވައިފި
މިދުފާ އަކީ ޚާރިޖީ ދާއިރާގައި ޚިދުމަތްކުރައްވާފައިވާ ކަނބަލެއް
އެކުވެރި އަރަބި ޢިމާރާތަށް ރާއްޖެއިން ކަނޑައަޅުއްވާފައި ހުންނަވާ ސަފީރަކަށް މިދުފާ
އެކުވެރި އަރަބި ޢިމާރާތަށް ރާއްޖެއިން ކަނޑައަޅުއްވާފައި ހުންނަވާ ސަފީރަކަށް މިދުފާ ނައީމްގެ ނަން ފާސްކުރުމަށް ފޮނުވައިފިއެވެ.
ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 115 ވަނަ މާއްދާގެ (ދ) އާއި، ޤާނޫނު ނަންބަރު 20/2021 (ދިވެހިރާއްޖޭގެ ފޮރިން ސަރވިސްގެ ޤާނޫނު) ގެ 14 ވަނަ މާއްދާގައިވާ ގޮތުގެމަތިން، އެކުވެރި ޢަރަބި ޢިމާރާތަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރުކަމަށް މއ.ރުއްކުރި، އަލްފާޟިލާ މަރްޔަމް މިދްފާ ނަޢީމް ހަމަޖެއްސެވުމަށްޓަކައި ރައީސުލްޖުމްހޫރިއްޔާ ފޮނުއްވާފައިވާ މައްސަލަ ހޯމަ ދުވަހުގެ ޖަލްސާ އަށް އިއްވަވާދެއްވީ މަޖިލީހުގެ އަމީންއާއްމު ފާތިމަތު ނިއުޝާއެވެ.
މިދުފާ އެ މަޤާމަށް އައްޔަންކުރުމާއި މެދު މަޖިލީހަށް ފޮނުއްވާފައި ވަނީ އެކުވެރި އަރަބި ޢިމާރާތަށް ރާއްޖެއިން ކަނޑައަޅުއްވާފައިވާ ސަފީރު އައިމިނަތު ޝަބީނާގެ ބަދަލުގައެވެ.
އެ މައްސަލަ އާއި މެދު މަޖިލީހުން ނިންމަވާ ގޮތެއް ކަނޑައަޅުއްވާދެއްވުމަށް އެދި ރައީސުލްޖުމްހޫރިއްޔާ ފޮނުއްވި ސިޓީ އާއި އެކު މިދުފާގެ ވަނަވަރު ވަނީ ފޮނުއްވާފައެވެ.
މިދުފާ ނައީމް އަކީ ޚާރިޖީ ދާއިރާގައި ޚިދުމަތްކުރައްވާފައިވާ ކަނބަލެކެވެ. އޭނާ ވަނީ ފޮރިން މިނިސްޓްރީގެ ޑިރެކްޓަރގެ މަޤާމުވެސް ފުރުއްވާފައެވެ.
