ނޭޕާލުގައި ހަމަނުޖެހުން ހިނގާތީ އެ ގައުމަށް ނުދާން އެދިއްޖެ
ނޭޕާލުގައި މި ވަގުތު ހިނގަމުންދާ ހަމަނުޖެހުމާ ގުޅިގެން، އެ ގައުމަށް ދިވެހިން ދަތުރުނުކުރަން ފޮރިން މިނިސްޓްރީން ވަނީ އިލްތިމާސްކޮށްފަ
ރާއްޖޭގެ ފޮރިން މިނިސްޓްރީ: ނޭޕާލުގައި މި ވަގުތު ހިނގަމުންދާ ހަމަނުޖެހުމާ ގުޅިގެން، އެ ގައުމަށް ދިވެހިން ދަތުރުނުކުރަން ވަނީ އިލްތިމާސްކޮށްފަ
ނޭޕާލުގައި މި ވަގުތު ހިނގަމުންދާ ހަމަނުޖެހުމާ ގުޅިގެން، އެ ގައުމަށް ދިވެހިން ދަތުރުނުކުރަން ފޮރިން މިނިސްޓްރީން އިލްތިމާސްކޮށްފި އެވެ.
ފޮރިން މިނިސްޓްރީން އެގޮތަށް އިލްތިމާސް ކުރީ ނޭޕާލްގައި ސޯޝަލް މީޑިއާ ބޭން ކުރަން ނިންމުމާ ގުޅިގެން މިހާރު ކުރަމުންގެންދާ މުޒަހަރާތައް ހޫނުވެ، ބޮޑެތި ހަމަނުޖެހުންތަކެއް ހިނގަމުންދާތީ އެވެ.
މުޒާހަރާތައް ހޫނުވެ، އެގައުމުގައި އަންނަނީ ބޮޑެތި ހަމަނުޖެހުންތަކެއް ހިނގަމުންނެވެ. އެގޮތުން ނޭޕާލުގެ ފުލުހުންނާއި މުޒާހަރާގެ ބައިވެރިންނާއި ދެމެދު އަންނަނީ ބޮޑެތި ކުރިމަތިލުންތަކެއް ވެސް ހިނގަމުންނެވެ.
ސުޕްރީމް ކޯޓުގެ ހުކުމަކާ އެކު ސޯޝަލް މީޑިއާ ބަންދުކުރުމާއެކު، ނޭޕާލުގައި ހޯމަ ދުވަހު ފެށުނު ހަމަނުޖެހުންތަކުގައި މިހާތަނަށް 19 މީހުން މަރުވެ، އެތައް ބަޔަކު ވަނީ ޒަހަމްވެފަ އެވެ.
މިޒާހަރާތަކުގެ ސަބަބުން ޕްރެޝަރު ބޮޑުވެ ނޭޕާލްގެ ބޮޑުވަޒީރު ކޭޕީ ޝަރުމާ އޮލީ ވަނީ އިސްތިއުފާ ދީފަ އެވެ. މުޒާހަރައިގެ ބައިވެރިން ވަނީ އޭނާގެ ގެއާއި އެ ގައުމުގެ ގާނޫނު ހަދާ މަޖިލީހާއި ސަރުކާރުގެ އެހެނިހެން އޮފީސްތަކުގައި ހުޅުޖަހާފަ އެވެ.
އެ މިނިސްޓްރީން ނެރުނު ބަޔާނުގައި ވަނީ ނޭޕާލުގެ އިދާރާތަކުންނާއި އިންޑިއާގައި ހުންނަ ހައި ކޮމިޝަން އަދި މިނިސްޓްރީން ދޭ އިރުޝާދުތަކަށް ފުރިހަމައަށް ތަބާވުމާއި ހަމަނުޖެހުން ހިނގާ ސަރަހައްދުތަކާ ދުރުވެ، ރައްކާތެރިކަމަށް އިސްކަންދިނުމަށް ހަނދާންކޮށްދީފަ އެވެ.
އޭގެ އިތުރުން، ނޭޕާލްގެ ވެރި ރަށް ކަތަމަންޑޫގެ ގިނަ ސަރަހައްދުތަކެއްގައި ކާފިއު އިއުލާންކޮށްފައިވާތީ، އެ ސިޓީގައި ދިރިއުޅޭ މީހުން ދަތުރުފަތުރުކުރުމުގައި ސަމާލުކަން ދިނުމާއި އާއްމުންގެ ސަލާމަތާއި ރައްކާތެރިކަމަށް ހާއްސަ ސަމާލުކަމެއް ދީ، ޒަރޫރީ ބޭނުންތަކަށް މެނުވީ މަގުމައްޗަށް ނުނިކުތުމަށް ވަނީ އިލްތިމާސްކޮށްފަ އެވެ.
ނޭޕާލުގައި މި ވަގުތު ވެސް ގިނަ އަދަދެއްގެ ދިވެހި ޑޮކްޓަރުން ސްޕެޝަލައިޒް ވުމަށް އަންނަނީ ކިޔަވަމުންނެވެ.
އެ ބަޔާނުގައި ބުނީ ނޭޕާލުގައި ކިޔަވަމުން އަންނަ ދިވެހިންގެ ކަންކަން ވަރަށް ގާތުން ބަލަމުން އަންނަ ކަމަށެވެ. އަދި ސަލާމަތާއި ރައްކާތެރިކަން ކަށަވަރުކުރަން އެ ގައުމުގެ ކަމާގުޅޭ އިދާރާތަކާ މަޝްވަރާކޮށް، އެ ހާއްސަ ހާލަތުގައި ބޭނުންވާ ލުއި ފަސޭހަތައް ހަމަޖައްސައިދިނުމަށް އިންޑިއާގައި ހުންނަ ރާއްޖޭގެ ހައިކޮމިޝަނާއި އެ މިނިސްޓްރީން މަސައްކަތްކުރާ ކަމަށެވެ.
އޭގެ އިތުރުން އެ ގައުމުގެ މަޝްރަހު އިތުރަށް ގޯސްވެއްޖެނަމަ، ނޭޕާލުގައި ތިބި ދިވެހިންނަށް އެހީތެރިކަން ފޯރުކޮށްދޭނެކަމުގެ ޔަގީންކަން މިނިސްޓްރިން ވަނީ އަރުވައިފަ އެވެ.
ނޭޕާލުގެ ހާލަތު ބަދަލުވަމުންދާ ގޮތުން އެއްވެސް އެހީތެރިކަމެއް ބޭނުންވެއްޖެނަމަ، އިންޑިއާގައި ހުންނަ ރާއްޖޭގެ ހައިކޮމިޝަންގެ ނަމްބަރު، 919910040786+ ނުވަތަ މިނިސްޓްރީގެ ހޮޓްލައިން 7983400 އަށް ގުޅުމަށް ވަނީ އެދިފަ އެވެ.
