ޖަޕާނުގައި ތަޢުލީމު ހާސިލުކުރަމުން ދަނިކޮށް ނިޔާވި ފޮރިން މިނިސްޓްރީގެ މުވައްޒަފު، ބ. ތުޅާދޫ، ކާނިމާގެ، ލުޖައިނާ ތަސްނީމާ (29 އ)ގެ ހަށިގަނޑު ރާއްޖެ ގެނެސް ޖަނާޒާ ބާއްވައިފިއެވެ.

ލުޖައިނާގެ ހަށިގަނޑު ރާއްޖެ ގެނެސްފައިވަނީ ޖަޕާނުގެ ޤާނޫނީ އިޖުރާއަތުތަކާ އެއްގޮތަށް އޮޓޮޕްސީ ހެދުމަށްފަހުގައެވެ.ޖަޕާނުގެ ގަވާއިދުތަކުގެ ދަށުން، އެޤައުމުގައި ނިޔާވާ މީހުންގެ ހަށިގަނޑު އެހެން ޤައުމަކަށް ގެންދާނަމަ، އޮޓޮޕްސީ ހެދުމަކީ ކޮންމެހެން ކުރަންޖެހޭ ކަމެކެވެ. ލުޖައިނާގެ ޖަނާޒާގެ ކަންކަން ކުރިޔަށް ގެންގޮސްފައިވަނީ މަސްޖިދު ޒައިދުބިން ޘާބިތް (ހުޅުމާލޭ ސަހަރާ މިސްކިތު) ގައެވެ.

މާސްޓަރސް ޑިގްރީ ފުރިހަމަ ކުރުމަށް 2023 ވަނަ އަހަރުގެ އޯގަސްޓް 20 ވަނަ ދުވަހު ޖަޕާނަށް ފުރި ލުޖައިނާ، ނިޔާވެފައިވަނީ ކޯސް ނިންމުމަށްފަހު ގްރެޖުއޭޝަން ހަފްލާގައި ބައިވެރިވުމަށް މަޑުކޮށްގެން ހުއްޓައެވެ. އަދި ގްރެޖުއޭޝަނަށްފަހު މާލެ އައުމަށްވެސް ލުޖައިނާ އޮތީ ރާވާފައެވެ.

ޖަޕާނުގެ ކަމާބެހޭ އިދާރާތަކުން އޭނާގެ މަރު ކަށަވަރުކޮށްދީފައިވަނީ އޯގަސްޓް 21 ވަނަ ދުވަހުގެ ރޭގެ ވަގުތެއްގައެވެ. އެނގިފައިވާ ގޮތުގައި ލުޖައިނާ ނިޔާވެފައި އޮއްވާ ފެނިފައިވަނީ އޭނާ ދިރިއުޅުނު ކޮޓަރިންނެވެ. އޭނާ ނިޔާވެފައި އޮތް އިރު، އާއިލާއިން އޭނާގެ ޚަބަރެއް ނުވެގެން އުޅޭތާ ދެ ދުވަސްވެފައިވާ ކަމަށް މަޢުލޫމާތު ލިބިފައިވެއެވެ.

ލުޖައިނާގެ ހިތާމަވެރި މަރާ ގުޅިގެން ކުރީގެ ފޮރިން މިނިސްޓަރު ޝާހިދު ވިދާޅުވެފައިވަނީ، ޚާރިޖީ ޢާއިލާއަށް ގެއްލިގެން އެދިޔައީ ހުނަރުވެރި، މަސައްކަތަށް ކަމޭހިތާ މުވައްޒަފެއް ކަމަށެވެ. އަދި ލުޖައިނާ ކުރި ކޮންމެ މަސައްކަތެއްގައިވެސް ޝައުޤުވެރިކަމާއި ނަޒާހަތްތެރިކަން ފާހަގަކުރެވުނު ކަމަށް އެމަނިކުފާނު ވިދާޅުވިއެވެ.