ސްރީލަންކާ އަށް އެތެރެވުމުގެ ކުރިން "އިލެކްޓްރޯނިކް ޓްރެވަލް ހުއްދަ" ހޯދަން ޖެހޭ ގޮތަށް ހަދައިފި
15 އޮކްޓޯބަރ 2025 އިން ފެށިގެން ސްރީލަންކާ އަށް ދަތުރުކުރާ ފަރާތްތަކުން ފުރުމުގެ 48 ގަޑިއިރާއި 24 ގަޑިއިރު އާ ދެމެދު އީޓީއޭ ފޯމް ފުރިހަމަ ކުރަން ޖެހޭނެ
ސްރީލަންކާގެ ކޮލަމްބޯގެ ބަންޑާރަނައިކެ އިންޓަނޭޝަނަލް އެއާޕޯޓް
ސްރީލަންކާ އަށް އެތެރެވުމުގެ ކުރިން "އިލެކްޓްރޯނިކް ޓްރެވަލް އޮތަރައިޒޭޝަން (ETA)" އެއް ހޯދަންޖެހޭ ގޮތަށް ސްރީލަންކާގެ ސަރުކާރުން ހަމަޖައްސައިފިއެވެ.
ރާއްޖޭގެ ފޮރިން މިނިސްޓްރީން މިކަމާ ބެހޭ ގޮތުން ނެރުނު ބަޔާނެއް ގައި ބުނެފައި ވަނީ މިއީ ސްރީލަންކާގެ އިމިގްރޭޝަން އުސޫލުތަކަށް ގެނައި ބަދަލުތަކަކާ ގުޅިގެން ކުރަން ޖެހޭ ކަމެއް ކަމުގައެވެ.
އެހެން ކަމުން 15 އޮކްޓޯބަރ 2025 އިން ފެށިގެން ސްރީލަންކާ އަށް ދަތުރުކުރާ ކޮންމެ ޕެސެންޖަރަކުވެސް ފުރުމުގެ ކުރިން 48 ގަޑިއިރާއި 24 ގަޑިއިރު އާ ދެމެދު މި ފޯމް ފުރިހަމަ ކުރަން ޖެހޭނެ ކަމަށް ވެސް ފޮރިން މިނިސްޓްރީން ބުނެފައިވެއެވެ.
މީގެ ސަބަބުން، ސްރީލަންކާ އިން ދިވެހިނަށް ވިސާ ދިނުމަށް ހަމަޖެހިފައިވާ އިންތިޒާމަކަށް ނުވަތަ ސިޔާސަތަކަށް އެއްވެސް ބަދަލެއް އައިސްފައިނުވާ ކަމަށް ވެސް ފޮރިން މިނިސްޓްރީން ބުނެއެވެ.
އެހެންކަމުން ސްރީލަންކާ އަށް ދަތުރުކުރާ ފަރާތްތަކުން، ދަތުރުކުރުމުގެ ކުރިން އެ ގައުމުގެ "އިލެކްޓްރޯނިކް ޓްރެވަލް އޮތަރައިޒޭޝަން (ETA) ފޯމް ފުރުމަށް އިލްތިމާސް ކުރާ ކަމަށް ފޮރިން މިނިސްޓްރީން ވަނީ ބުނެފައެވެ.
ފޯމު ފުރަން ބޭނުން ކުރެވޭނެ ލިންކް އަކީ:
https://eta.gov.lk/slvisa
