ނަޝީދަށް އ.ދ ގެ މަރުކަޒަށް ވަނުމުގެ ފާސް ހޯދުމުގެ އިންތިޒާމް ހަމަޖައްސައިދިނުމަށް ސަރުކާރުން އިންކާރުކޮށްފި

ނިއުޔޯކުގައި ހުންނަ އެކުވެރި ދައުލަތްތަކުގެ ޖަމްއިއްޔާ (އދ.) ގެ މައި މަރުކަޒަށް ވަނުމަށް ބޭނުންވާ ފާސް ހޯދުމަށް ކުރީގެ ރައީސް މުހައްމަދު ނަޝީދު އެދިވަޑައިގަތުމުން، އެކަމާ ގުޅޭގޮތުން ފޮރިން މިނިސްޓްރީން ކުރަންޖެހޭ މަސައްކަތްތައް ކުރުމަށް އިންކާރުކޮށްފިއެވެ.

ރައީސް ނަޝީދު މިވަގުތު ހުންނެވީ ކްލައިމެޓް ވަލްނަރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލްގެ މަގާމުގަ އެވެ. އަދި އެމަނިކުފާނުގެ އޮފީހުން ބުނި ގޮތުގައި މިވަގުތު އދ. ގެ 78 ވަނަ އަހަރީ އާންމު ޖަލްސާގައި ބައިވެރިވުމަށް ނިއުޔޯކަށް ވަޑައިގެން އުޅުއްވާ ނަޝީދު، ކްލައިމެޓް ވަލްނަރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލްގެ ހައިސިއްޔަތުން އދ. އަށް ވަދެވަޑައިގަތުމަށް އެއްވެސް ހުރަހެއް ނެތްކަމަށެވެ.

ނަމަވެސް، ދިވެހިރާއްޖޭގެ ކުރީގެ ރައީސުލްޖުމްހޫރިއްޔާއެއްގެ ހައިސިއްޔަތުން، ދިވެހި ދިދަ އާއި ނިޝާން ޖެހި ފާހުގައި އދ. ގެ ޖަލްސާތަކުގައި ބައިވެރިވެވަޑައިގަތުމަށް އެދިވަޑައިގެން، ފޮރިން މިނިސްޓްރީގައި އެދިވަޑައިގަތުމުން އެކަން ކޮށްދިނުމަށް އިންކާރުކޮށްފައިވާ ކަމަށް ރައީސް ނަޝީދުގެ އޮފީހުން ބުނެފައިވެއެވެ.

މީގެ އިތުރުން، ދައުލަތާއި ސަރުކާރުގެ ވެރިކަމާއި، ރައްޔިތުންގެ މަޖިލީހުގެ ރައީސްކަން ކުރައްވާފައި ތިއްބެވި ބޭފުޅުން، އެ ބޭފުޅަކު ނިސްބަތްވެވަޑައިގަންނަވާ ގައުމެއްގެ ފުށުން ހައިސިއްޔަތުން ލިބިވަޑައިގެން، ބައިނަލްއަގުވާމީ ރަސްމީ ޖަލްސާތަކާއި، ހަފްލާތަކުގައި ބައިވެރިވެވަޑައިގަތުމަކީ ބައިނަލްއަގުވާމީ ދަނޑުގެ އާދަކާދައެއް ކަމަށް ރައީސް ނަޝީދުގެ އޮފީހުން ނެރުނު ބަޔާނުގައި ބުނެފައިވެއެވެ.

ކުރީގެ ރައީސް ނަޝީދުގެ އޮފީހުން މި މައްސަލާގައި ބަޔާނެއް ނެރެފައިވާއިރު، ފޮރިން މިނިސްޓްރީން މިހާތަނަށް އެއްވެސް ބަހެއް ބުނެފައެއް ނުވެއެވެ.