ރަމަޝާން މަހަށް މަޖިލިސް ބަންދުކުރަން މެމްބަރުން ބޭނުންމެއް ނުވޭ، އެކަން ކުރަން ބޭނުންވީ މި ސަރުކާރުން: މެމްބަރު ޒިޔާދު
ރަމަޟާން މަހު މަޖިލިސް ބަންދުކޮށް ދައުރު ކުރުކޮށްލަން ހުށައެޅީ ސަރުކާރުގެ ފަރާތުން މާފަންނު ދެކުނު ދާއިރާގެ ޕީއެންސީ މެންބަރު އަބްދުﷲ ރިފާއު
ވައިކަރަދޫ ދާއިރާގެ މަޖިލިސް މެމްބަރު ހުސެއިން ޒިޔާދު، ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަނީ
އަންނަ ރަމަޟާ މަހާއި ދިމާކޮށް ރައްޔިތުންގެ މަޖިލިސް ބަންދުކުރަން ނިންމީ މެމްބަރުން ބޭނުންވެގެން ނޫން ކަމަށާއި އެކަން އެގޮތަށް ކުރަން ނިންމީ ސީދާ ސަރުކާރުން ބޭނުންވެގެން ކަމަށް ވައިކަރަދޫ ދާއިރާގެ މެމްބަރު ހުސެއިން ޒިޔާދު ވިދާޅުވެއްޖެއެވެ.
މެމްބަރު ޒިޔާދު މިފަދައިން ވިދާޅުވީ މަޖިލީހުގެ ގިނަ މަސައްކަތްތަކެއް ނުނިމި ވަނިކޮށް މަޖިލިސް ޗުއްޓީއަކަށް ދާން ނިންމި ނިންމުމާއި ގުޅުވައި ރާއްޖެ ޓީވީގެ ފަލަސުރުކީ ޕްރޮގްރާމުގައި ވާހަކަދައްކަވަމުންނެވެ.
ރަމަޟާން މަހު މަޖިލިސް ބަންދުކޮށް ދައުރު ކުރުކޮށްލަން ހުށައެޅީ ސަރުކާރުގެ ފަރާތުން މާފަންނު ދެކުނު ދާއިރާގެ ޕީއެންސީ މެންބަރު އަބްދުﷲ ރިފާއު އެވެ.
މިކަމާއި ގުޅިގެން އެމްޑީޕީއަށް ނިސްބަތްވާ މަޖިލިސް މެމްބަރުން ވަނީ ކަންބޮޑުވުން ފާޅުކޮށްފައެވެ. އެމްޑީޕީ މެމްބަރުން ކަންބޮޑުވުން ފާޅުކޮށްފައިވާއިރު، ރޯދަ މަހު މަޖިލިސް ބަންދު ނުކުރަން ވިސްނަމުން އަންނަ ކަމަށް ސަރުކާރު ޕާޓީ ޕީއެންސީގެ ޕާލިމެންޓަރީ ގްރޫޕުގެ ލީޑަރު އިބްރާހިމް ފަލާހު މިމަހުގެ 16 ވަނަ ދުވަހު ވަނީ ވިދާޅުވެފައެވެ.
މިކަމާއި ގުޅުވައި މެމްބަރު ޒިޔާދު ވިދާޅުވީ މަޖިލިސް ޗުއްޓީއަށް ދަނީ ސަރުކާރަށް މަޖިލީހަށް އެއްވެސް މަސައްކަތެއް ހަވާލުނުކުރެވި އެކަން މި ސަރުކާރަށް ނުވެގެން ކަމަށެވެ. އަދި 20 ވަނަ މަޖިލިސް ފެށިގެން ފުރަތަމަކޮޅުގައި އައި ބިލުތަކަކީ ކުރީ ސަރުކާރުން މަޖިލީހަށް ވައްދާފައިވާ ބިލުތައް ކަމަށެވެ. މި ސަރުކާރުން މަޖިލީހަށް އެއްވެސް ބިލެއް ނުވައްދާކަން އޭނާ ފާހަގަކުރިއެވެ.
ޒިޔާދު ވިދާޅުވީ މިހާރު ދިމާވެގެން މިއުޅޭ މައްސަލައަކީ މި ސަރުކާރަށް ބިލްތައް ތައްޔާރުނުކުރެވިގެން އުޅޭ މައްސަލަކަމަށާއި އެންމެ ފަހުން ނިމިދިއަ ރިސެސްގެ ބޮޑުބައެއް ދުއްވާލީ ވެސް ސަރުކާރަށް ތައްޔާރު ނުވެވިގެން ކަމަށެވެ.
ޒިޔާދު ވިދާޅުވީ މިކަމުގައި މިއުޅެނީ މަޖިލީހުގެ މެމްބަރުންގެ މައްސަލައެއް ވެސް ނޫން ކަމަށާއި ނަމަވެސް ސަރުކާރު ޕާޓީއަށް ނިސްބަތްވާ މެމްބަރުންނަށް ސަރުކާރު ހިމާޔަތް ކޮށް، ސަރުކާރުގެ ދިފާއުގައި ކަންކަންކުރަން މަޖުބޫރުވަނީކަމަށެވެ. އެގޮތުން ސަރުކާރަށް ތައްޔާރު ނުވެވުނީމައި ސަރުކާރުގެ ލަދު ފޮރުވަންވެގެން މެބްރުންނަށް އަމިއްލައަށް ކަތިލެވިގެން މިފަދަ ނިންމުންތައް ނިންމަނީކަމަށް ވެސް މެމްބަރު ޒިޔާދު ވިދާޅުވިއެވެ.
މިއުޅެނީ މެމްބަރުންގެ މައްސަލައެއް ނޫން. މިއީ ސަރުކާރުގެ މައްސަލައެއް. ސަރުކާރަށް މަޖިލީހަށް މަސައްކަތް ހަވާލުނުކުރެވުނީމާ ދެން ކުރާނެ މަސައްކަތެއް ނެތީމަ ޗުއްޓީއަށް ދާން އެ ނިންމަނީ. ވާގޮތަކީ މެމްބަރުންނަށް ސަރުކާރު ހިމާޔަތް ކޮށް، ސަރުކާރުގެ ދިފާއުގައި ކަންކަންކުރަން މަޖުބޫރުވަނީ. ސަރުކާރަށް ތައްޔާރު ނުވެވުނީމަ ސަރުކާރުގެ ލަދު ފޮރުވަންވެގެން މެބްރުން ކަތިވަނީ.ވައިކަރަދޫ ދާއިރާގެ މަޖިލިސް މެމްބަރު ހުސެއިން ޒިޔާދު
ޒިޔާދު ވިދާޅުވީ ހަގީގަތަކީ މަޖިލީހުގައި ކުރާނެ މަސައްކަތެއް ނެތުން ކަމަށާއި ނަމަވެސް ކޮމިޓީތަކުގައި ކުރާނެ ގިނަ، ބައިވަރު މަސައްކަތް ތަކެއް ކުރަން އެ ބަހުރިކަމަށެވެ. އަދި ހަޤީޤީ މަސައްކަތް ތަކަކީ ކޮމިޓީތަކުގެ މަސައްކަތައްކަމަށް ވެސް ޒިޔާދު ވިދާޅުވިއެވެ.
ޒިޔާދު ވިދާޅުވީ ސަރުކާރު ހިންގާ މައި ޕާޓީ، ޕީއެންސީގެ ގިނަ މެމްބަރުންވެސް ރޯދަމަހަށް މަޖިލިސް ބަންދުކުރަން ދެކޮޅުކަމަށާއި ނަމަވެސް އެ މެމްބަރުންނަށް މިއަދު ސަރުކާރުން ބުނާ ކޮންމެ ކަމެއް އެގޮތަކަށް ކުރަން މަޖުބޫރުވެފައިވާ ކަމަށެވެ.
ޒިޔާދު ވިދާޅުވީ މަޖިލީހަށް ބޭނުންވާ ވަރަށް މަސައްކަތް މި ސަރުކާރަށް ނުދެވޭ ކަމަށާއި ކުއްލި މައްސަލައެއް ވިޔަސް، ޤަރާރެއް ވިޔަސް ފެންނަން މި އޮންނަނީ އެމްޑީޕީން މަޖިލީހަށް ވައްދާ އެއްޗެއްކަމަށެވެ.
