ފަލަސްތީން-އިސްރާއީލް ހަނގުރާމަ: 1،300އަށްވުރެ ގިނަ މީހުން މަރުވެ، 123،000 މީހުންގެ ގެދޮރު ގެއްލިއްޖެ

ފަލަސްތީނާއި އިސްރާއީލާ ދެމެދު ކުރިއަށްދާ ހަނގުރާމާގައި މަރުުވި މީހުންގެ އަދަދު 1،300އަށް އަރައިފިކަމަށް ބޭރުގެ މީޑިއާތަކުން ރިޕޯޓުކޮށްފިއެވެ.

އަލްޖަޒީރާއިން ރިޕޯޓުކޮށްފައި ވާގޮތުން، ހަމަލާ ބަދަލުކުރުންތަކުގެ ތެރޭގައި އިސްރާއީލުގެ 800އަށްވުރެ ގިނަ މީހުން ވަނީ މަރުވެފައެވެ. އަދި ފަލަސްތީނުގެ ރައްޔިތުންގެ ތެރެއިން 500އަށްވުރެ ގިނަ މީހުންގެ ފުރާނަ ގެއްލިފައިވާކަމަށް ވަނީ ރިޕޯޓުކޮށްފައެވެ.

ޣައްޒާގެ ހެލްތު މިނިސްޓްރީއާ ހަވާލާދީ ރިޕޯޓުކޮށްފައި ވާގޮތުން، 510 ފަލަސްތީނު ރައްޔިތުން ވަނީ އިސްރާއީލުގެ ހަމަލާތަކުގައި މަރާލާފައެވެ. އަދި 2،751 މީހުންނަށް އެކިވަރުގެ އަނިޔާ ލިބި ފަރުވާދެމުން ދާކަމަށް މިނިސްޓްރީން ވަނީ ބުނެފައެވެ.

އިސްރާއީލުން މައުލޫމާތު ދޭގޮތުގައި، ހަނގުރާމާގައި އެގައުމުން މަރުވި މީހުންގެ އަދަދު ވަނީ 800އަށް އަރާފައެވެ. އަދި 2،200އަށްވުރެ ގިނަ މީހުން ވަނީ ޒަޚަމްވެފައެވެ.

އިސްރާއީލުން ވަނީ ޣައްޒާގެ 1،000ށްވުރެ ގިނަ ސަރަހައްދަށް އެގައުމުގެ އަސްކަރިއްޔާގެ ހަމަލާތައް އަމާޒުކޮށްފައި ވާނެކަމަށް ބުނެފައެވެ. އޭގެތެރޭގައި ވައިގެ މަގުން ދީފައިވާ ވަރުގަދަ ހަމަލާތައް ހިމެނޭއިރު، މި ހަމަލާތަކުގައި އެތައް އަވަށެއް ވަނީ ބިމާ ހަމަވެފައެވެ.

އދ.ން ހާމަކޮށްފައިވާ މައުލޫމާތުތައް ދައްކާގޮތުން، ހަނގުރާމައިގެ ސަބަބުން ޣައްޒާގެ 123،000ށްވުރެ ގިނަ މީހުންގެ ގެދޮރު ވަނީ ގެއްލިފައެވެ.