މޯލްޑިވްސް ބްރޯޑްކާސްޓިން ކޮމިޝަން، ބްރޯޑްކޮމް އިން ރާއްޖެޓީވީގެ މައްސަލަ އެއް ބަލަން ފަށައިފިއެވެ.

ބްރޯޑްކޮމް އިން ރާއްޖެޓީވީ އަށް ފޮނުވި ސިޓީ އެއްގައި ބުނެފައި ވަނީ 2023ގެ ރިޔާސީ އިންތިޚާބުގެ ދެވަނަ ބުރުގެ ވޯޓުލުން އޮންނަ ދުވަހަކީ 2023 ސެޕްޓެމްބަރ 30 ވަނަ ދުވަސް ކަމުގައި އިލެކްޝަންސް ކޮމިޝަނުން ހަމަޖައްސާފައިވުމާއި އެކު އިންތިޚާބުތަކާއި ބެހޭ އާއްމު ޤާނޫނުގެ 30 ވަނަ މާއްދާގެ (ހ) އަށް ރިއާޔަތް ކުރާއިރު ބްރޯޑްކާސްޓްކުރާ ފަރާތްތަކުން ސިޔާސީ ކޮންޓެންޓް ގެެނެސްދިނުމުގެ ސުންގަޑިއަކީ 29 ސެޕްޓެމްބަރ 2023ގެ 18:00 ކަމަށެވެ. އެހެންނަމަވެސް ރާއްޖެ ޓީވީ އިން އިންތިޚާބީ ދުވަސްވަރު ބްރޯޑްކާސްޓްކުރުމުގެ ގައިޑްލައިން އާއި ޚިލާފު ކޮންޓެންޓް ބްރޯޑްކާސްޓްކޮށްފައިވާ ކަމަށް ބެލެވޭ ކަމަށް އެ ސިޓީގައި ވަނީ ބުނެފައެވެ.

އެހެންކަމުން އެ މައްސަލަ ކޮމިޝަނުން ބަަލަމުންދާ ކަމަށް ބްރޯޑްކޮމްގެ ސިޓީގައި ވަނީ ބުނެފައެވެ. މައްސަލައިގެ އިތުރު ތަފްސީލް ހިއްސާކުރަމުން އެ ކޮމިޝަނުން ބުނެފައި ވަނީ އެ މައްސަލަ އަކީ ރާއްޖެޓީވީން 29 ސެޕްޓެމްބަރުވީ ހުކުދު ދުވަހުގެ ރޭ 08:08 އިން 08:10 އަށް ބްރޯޑްކާސްޓްކުރި ކޮންޓެންޓާއި ގުޅޭ މައްސަލަ އެއް ކަމަށެވެ. އަދި އެ މައްސަލަ އަކީ ސަރުކާރުގެ ކެނޑިޑޭޓަކު އައްޔަންކޮށްފައިވާ ސިޔާސީ މަޤާމެއްގައި ހުރި މީހަކު ސަރުކާރަށާއި ކެނޑިޑޭޓަށް ތާއީދުކޮށް ދައްކާފައިވާ ވާހަކަ ހިމެނިފައިވާތީ އެއީ ސިޔާސީ ކޮންޓެންޓް އާއްމުކުރުމުގެ އުސޫލާއި ޚިލާފުވާ ކަމެއްކަމަށް ބެލެވޭ ކަމަށެވެ.

އެހެންކަމުން އެއީ ރިޔާސީ އިންތިޚާބުގައި ވާދަކުރާ ސަރުކާރަށް ނިސްބަތް ނުވާ ކެނޑިޑޭޓުގެ އިންތިޚާބީ ހައްގަށް އުނިކަން އަތުވެދާނެ ކަމެއް ކަމަށާއި، ކޮންޓެންޓް ގެނެސްދިން ވަގުތަކީ އެފަދަ ކޮންޓެންޓެއް ބްރޯޑްކާސްޓްކުރަން އަދުލުވެރި ނުވަތަ އިންސާފުވެރި ވަގުތެއްކަމުގައި ނުވާތީ އެ މައްސަލަ އިންތިޚާބީ ކޮންޓެންޓް ބްރޯޑްކާސްޓްކުރުމުގެ ގައިޑްލައިންގެ 3 ވަނަ މާއްދާގެ (ހ)އާއި ޚިލާފު ކަމަށް ބެލެވޭ ކަމަށް ވަނީ ބުނެފައެވެ. އެ މައްސަލަ އޮކްޓޯބަރ 9އެއްގެ ކުރިން ޖަވާބުދިނުމަށް ވެސް ބްރޯޑްކޮމް އިން ވަނީ އެދިފައެވެ. އަދި މައްސަލަ ބަލާ ނިމެންދެން ހަވާލާދިން ކޮންޓެންޓް ރައްކާކޮށްފައި ބެހެއްޓުމަށް ވަނީ އެދިފައެވެ.