ނޫސްވެރިން އެކްރެޑިޓް ކުރުމަށް އައު އުސޫލެއް ގެޒެޓް ކޮށްފި
އުސޫލުގެ ދަށުން އެކްރެޑިޓޭޝަން ހޯދުމަށް އެމްކިއުއޭ ލެވެލް 3 ސަނަދެއް ނުވަތަ 3 އަހަރުގެ ތަޖުރިބާ ބޭނުންވާނެ
ނޫސްވެރިންގެ ބައްދަލުވުމެއްގެ ތެރެއިން (ފައިލް ފޮޓޯ)
ނޫސްވެރިން އެކްރެޑިޓް ކުރުމާ ބެހޭ އައު އުސޫލެއް މޯލްޑިވްސް ބްރޮޑްކާސްޓިންގ ކޮމިޝަން (ބްރޯޑްކޮމް) އިން ގެޒެޓް ކޮށްފި އެވެ.
މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް) އިން އާދިއްތަ ދުވަހު ވަނީ ނޫސްވެރިން އެކްރެޑިޓް ކުރުމާ ބެހޭ އައު އުސޫލެއް ގެޒެޓުގައި ޝާއިއުކޮށްފައެވެ. މި އުސޫލަކީ ރާއްޖޭގެ ނޫސްވެރިކަމުގެ ދާއިރާގައި މަސައްކަތްކުރާ ފަރާތްތަކުގެ ފެންވަރު ކަށަވަރުކޮށް، އެ ދާއިރާ އިތުރަށް ހަރުދަނާކުރުމަށް އެޅޭ މުހިންމު ފިޔަވަޅެކެވެ.
އައު އުސޫލުގެ މައިގަނޑު މަގުސަދަކީ ނޫސްވެރިކަމުގެ ދާއިރާގައި މަސައްކަތްކުރާ ފަރާތްތަކަކީ އެކަށީގެންވާ ތަމްރީނާއި ތަޢުލީމު ލިބިފައިވާ ބަޔަކަށް ހެދުމެވެ. މީގެ އިތުރުން ނޫސްވެރިން ފޯރުކޮށްދޭ ޚިދުމަތުގެ ފެންވަރު މަތިކޮށް، އެ ދާއިރާގައި މަސައްކަތްކުރާ ފަރާތްތަކުގެ ޕްރޮފެޝަނަލިޒަމް ކަށަވަރުކުރުމަށްވެސް މި އުސޫލުން މަގުފަހިކުރެއެވެ.
އުސޫލުގެ ދަށުން އެކްރެޑިޓޭޝަން ހޯދުމަށް އެދޭ ފަރާތްތަކުގައި ހުންނަންޖެހޭ ޝަރުތުތައް ވަނީ ކަނޑައެޅިފައެވެ. މިގޮތުން ބްރޯޑްކާސްޓިންގ އަދި ކޮމިއުނިކޭޝަން ދާއިރާއިން ނުވަތަ ގުޅުންހުރި ދާއިރާއަކުން މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) ގެ ލެވެލް 3 ގެ ސަނަދެއް ހާސިލުކޮށްފައިވުން ނުވަތަ ނޫސްވެރިކަމުގެ ދާއިރާގައި މަދުވެގެން ތިން އަހަރު ދުވަހުގެ ތަޖުރިބާ ލިބިފައިވުން ލާޒިމުކުރެއެވެ.
ޕްރެސް ފާސް ދޫކުރެވޭނެ ފަރާތްތަކުގެ ތެރޭގައި އެޑިޓަރުން، ރިޕޯޓަރުން، ޖާނަލިސްޓުން، ޕްރެޒެންޓަރުން، ލިޔުންތެރިން، ކޮލަމިސްޓުން، ފޮޓޯ އަދި ވީޑިއޯ ޖާނަލިސްޓުން ހިމެނެއެވެ.
ބްރޯޑްކޮމްގެ ފަރާތުން މި އުސޫލަށް އަމަލުކުރަން ފަށާނީ މިއަދުން ފެށިގެން ހަ މަސް ދުވަހުގެ މުއްދަތަށްފަހުގައެވެ. މި މުއްދަތުގެ ތެރޭގައި ނޫސްވެރިންނަށް އައު އުސޫލަށް ތައްޔާރުވުމަށް ފުރުސަތު ލިބިގެންދާނެއެވެ. މި އުސޫލަކީ ރާއްޖޭގެ ނޫސްވެރިކަމުގެ ދާއިރާ އިތުރަށް ފުރިހަމަކޮށް، ޕްރޮފެޝަނަލް މިންގަނޑުތަކެއް ގާއިމުކުރުމަށް އެޅޭ މުހިންމު ފިޔަވަޅެއްކަމަށް ބްރޯޑްކޮމްއިން ފާހަގަކުރެއެވެ.
