ރައީސްގެ "އަގުވައްޓާލަން" ޚަބަރު ފަތުރާއިރު ފިޔަވަޅު ނާޅާތީ ރައީސް އޮފީހުން ހާސްވެފައިވަނިކޮށް ރެގިއުލޭޓަރުން މަޖިލީހަށް ހާޒިރު ކުރަނީ

ރައީސް މުއިއޒުގެ "އަގުވައްޓާލަން ދޮގު ޚަބަރުފަތުރާ" މީޑިއާތަކާ މެދު ފިޔަވަޅު ނާޅައިގެން ރައީސް އޮފީހުން ކަންބޮޑުވުން ފާޅުކޮށް ރައްޔިތުންގެ މަޖިލީހަށް ސިޓީ އެއް ފޮނުވުމާއެކު، މީޑިއާ ރެގިއުލޭޓްކުރާ ދެ މުއައްސަސާ ކަމުގައިވާ މޯލްޑިވްސް މީޑިއާ ކައުންސިލް (އެމްއެމްސީ) އާއި މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ހާޒިރުކުރަން ނިންމައިފިއެވެ.

މިގޮތައް ފާސްކުރީ ބުރާސްފަތި ދުވަހު ބޭއްވި ކޮމިޓީގެ ބައްދަލުވުމުގައެވެ.

މި ދެ މުއައްސަސާ ކޮމިޓީއަށް ހާޒިރުކުރުމަށް ހުށަހެޅީ ސަރުކާރު ހިންގާ ޕާޓީ ޕީއެންސީ އަށް ނިސްބަތްވާ ކެލާ ދާއިރާގެ މެންބަރު އަބްދުﷲ ޝަރީފެވެ. އަދި މި ހުށަހެޅުން ފާސްވެފައިވަނީ ކޮމިޓީގެ މެންބަރުންގެ އަޣުލަބިއްޔަތުންނެވެ.

ސަރުކާރުގެ ފުރިހަމަ ކޮންޓްރޯލް އޮންނަ ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް މީޑިއާ ތައް ރެގިއުލޭޓު ކުރާ ފަރާތްތައް ހާޒިރު ކުރާއިރު، ސަރުކާރަށް ސަނާ ނުކިޔާ މީޑިއާ ތަކަށް ދަތި ކުރުމުގެ ގޮތުން ސަރުކާރު ހިއްސާވާ ކުންފުނިތަކުން އެފަދަ މީޑިއާ ތަކަށް ސްޕޮންސަރޝިޕް ނުދޭން ރައީސް އޮފީހުން އަންގާފައި އޮންނަ ކަމަށް މުއުތަބަރު ގޮތެއްގައި މައުލޫމާތު ލިބެއެވެ. އަނެއްކޮޅުން، ސަރުކާރުން ގެންދަނީ ސަރުކާރުގެ ކުންފުނިތަކުން ސްޕޮންސަރޝިޕް ދޭ މީޑީއާ ތަކުން ސަރުކާރު ޕްރޮމޯޓު ކުރާވަރުވެސް ރައީސް އޮފީހުގެ ކޮމިއުނިކޭޝަން މިނިސްޓަރ އިބްރާހިމް ޚަލީލުގެ ބެލުމުގެ ދަށުން ބަލަހައްޓަމުންނެވެ.

އަނެއްކޮޅުން ސަރުކާރު ތެރޭގައި ހިންގާ ކަމަށް ތުހުމަތު ކުރެވޭ ކަރަޕްޝަންގެ ބޮޑެތި ކަންކަމާ ބެހޭ މައުލޫމާތު ޖަވާވުދާރީ ނުވާތީ ހޯދޭނެ ގޮތް ގިނަފަހަރު ނުވެފައި އޮންނަ އިރު، މައުލޫމާތު ހޯދަން މިހާ އުނދަގޫ ވެރިކަމެއް މި ފަހަކުން ރާއްޖެ ނުދެކޭ ކަމަށްވެސް ވަރަށް ގިނަ ފަރާތްތަކުން އަންނަނީ ބުނަމުންވެ.

ކޮމިޓީން ނިންމާފައިވަނީ ނޮވެމްބަރު 13 ވަނަ ދުވަހު މި ދެ މުއައްސަސާ ހާޒިރުކުރުމަށެވެ.