ނުޒުހާ ބްރޯޑްކޮމް އަށް އައްޔަންކޮށްފި، އެކަމަކު ފަތްކޮޅު ފޮނުވީ ގެއަށް
ނުޒުހާއަކީ މީގެ ކުރިން ރާއްޖެ ޓީވީގައި ޚަބަރު ހުށަހަޅައި، ޕްރެޒެންޓް ކުރި ނޫސްވެރިއެއް
ނުޒުހާ
މޯލްޑިވްސް ބްރޯޑްކާސްޓިން ކޮމިޝަންގެ ހުސްވެފައިވާ މަގާމަށް މަޖިލީހުން ރުހުން ދީފައިވާ އައިމިނަތު ނުޒުހާ މަގާމަށް އައްޔަން ކުރުމަށް ރައީސް އޮފީހުގައި ރަސްމިއްޔާތެއް ނުބާއްވާ އޭނާގެ މަގާމުގެ ފަތްކޮޅު ގެއަށް ފޮނުވައިފިއެވެ.
އޭނާ އަށް ފަތްކޮޅު ފޮނުވީ ހޯމަ ދުވަހުގެ މެންދުރުފަހުގެ ވަގުތެއްގައެވެ.
ނުޒުހާ މަޤާމަށް އައްޔަން ކޮށްފައި ވަނީ މަޖިލީހުން އޭނާގެ ނަން ފާސްކުރިތާ މަހެއްހާ ދުވަސް ވާން ކައިިރިވެފައި ވަނިކޮށެވެ. މޯލްޑިވްސް ބްރޮޑްކާސްޓިން ކޮމިޝަން (ބްރޯޑްކޮމް) ގެ ހުސްވެފައިވާ މެންބަރުގެ މަގާމާށް އައިމިނަތު ނުޒުހާ އައްޔަނުކުރަން ރައްޔިތުންގެ މަޖިލީހުން ފާސްކޮށްފައި ވަނީ ފެބްރުއަރީ މަހުގެ 21 ވަނަ ދުވަހުއެވެ. ބްރޯޑްކޮމްގެ ހުސްވެފައިވާ މެންބަރުކަމުގެ މަގާމަކީ، އެ ކޮމިޝަނުގެ ނައިބު ރައީސްގެ ގޮތުގައި އަދި މެންބަރު ގޮތުގައި ކުރިން ހުންނެވި، އަޙްމަދު ގައިސް އެ މަގާމުން އިސްތިއުފާ ދެއްވުމާ ގުޅިގެން ހުސްވެފައިވާ މަގާމެކެވެ. އެ މަގާމަށް ބޭފުޅަކު އައްޔަނުކުރުމަށް މަޖިލީހަށް ފޮނުއްވާފައިވަނީ މިދިޔަ އަހަރުގެ ފެބްރުވަރީ މަހުގެ އެއްވަނަ ދުވަހުއެވެ.
މިހާތަަނަށް އަމަލުކުރަމުން އައި އުސޫލަށް ބަލާއިރު ކޮމިޝަން ވުޖޫދު ކުރީއްސުރެ މިއަދާއި ހަމައަށް ވެސް މެމްބަރުން އައްޔަނުކުރުމަށް ފަހު އެ މެމްބަރުން ރައީސް އޮފީހަށް ހާޒިރުކޮށް ރައީސުލްޖުމްހޫރިއްޔާ ބައިވެރިވެވަޑައިގަންނަވާ ރަސްމިއްޔާތެއްގައި އެ މެމްބަރުންނާއި ފަތްކޮޅު ހަވާލުކުރެއެވެ. ނަމަވެސް ނުޒުހާ އަށް ފަތްކޮޅު ހަވާލު ކުރުމަށް އެފަދަ ރަސްމިއްޔާތެއް ބާއްވާފައެއް ނުވެއެވެ.
ނުޒުހާއަކީ މީގެ ކުރިން ރާއްޖެ ޓީވީގައި ޚަބަރު ހުށަހަޅައި، ޕްރެޒެންޓް ކުރި ނޫސްވެރިއެކެވެ.
