އެތުލެޓިކޯގެ އެއްބަސްވުން ހިމިނޭޒް އައު ކޮށްފި

އެތުލެޓިކޯ މެޑްރިޑަށް ކުޅެމުން އަންނަ އުރުގުއޭގެ ޑިފެންޑަރު ޖޯސް މާރިއާ ހިމިނޭޒް އެ ކުލަބުގެ އެއްބަސްވުން އައު ކޮށްފި އެވެ.

އުމުރުން 28 އަހަރުގެ ކުޅުންތެރިޔާ އެތުލެޓިކޯއާއެކު ހަދާފައިވާ އެއްބަސްވުން އައު ކޮށްފައި ވަނީ އިތުރު ފަސް އަހަރު ދުވަހަށެވެ. އެހެންކަމުން 2028 ވަނަ އަހަރުގެ ޖޫން މަހުގެ ނިޔަލަށް މިހާރު އޭނާ އެ ކުލަބުގައި މަޑު ކުރާނެ އެވެ. އެތުލެޓިކޯ އިން ބޭނުންވަނީ ހިމިނޭޒް ދިގު މުއްދަތަކަށް އެ ކުލަބުގައި މަޑު ކުރުމަށެވެ. އެކަމަށްޓަަކައި އެ ކުލަބާއި، އޭނާއާ ދެމެދު މަޝްވަރާތައް ކުރަމުން އަންނަތާ ދުވަސްތަކެއްވިީ ފަހުން، މިހާރު އޭނާ ވަނީ އެއްބަސްވުން އައު ކޮށްފަ އެވެ. އެތުލެޓިކޯގެ އެއްބަސްވުން ހިމިނޭޒް އައު ކުރީ އިނގިރޭސި ބައެއް ކުލަބުތަކާއި، އިޓަލީގެ ބައެއް ކުލަބުތަކުން އޭނާ ހޯދުމުގެ ޝައުޤުވެރިކަން ފާޅު ކުރަމުން އައިި ވަގުތެއްގަ އެވެ.

ހިމިނޭޒް އެންމެ ފުރަތަމަ އެތުލެޓިކޯ އަށް ބަދަލުވީ 2013 ވަނަ އަހަރު އެވެ. އޭގެ ފަހުން އޭނާ ވަނީ މިހާތަނަށް އެ ކުލަބަށް 285 މެޗު ކުޅެދީ 12 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ހަތަރު ތައްޓެއް ކާމިޔާބުކޮށްފަ އެވެ. އޭގެ ތެރޭގައި ސްޕެނިޝް ލީގު، ސްޕެނިޝް ސުޕަ ކަޕް، ޔުއެފާ ޔޫރޮޕާ ލީގު އަދި ޔުއެފާ ސުޕަ ކަޕް ހިމެނެ އެވެ. މީގެ އިތުރުން އެ ޓީމާއެކު އޭނާ ވަނީ ޔުއެފާ ޗެމްޕިއަންސް ލީގުގެ ފައިނަލްގައި ވެސް ކުޅެފަ އެވެ. ހިމިނޭޒް އަންނަނީ 2013 ވަނަ އަހަރުން ފެށިގެން އުރުގުއޭ ޤައުމީ ޓީމަށް ވެސް ކުޅެމުންނެވެ. މިހާތަނަށް ޤައުމީ ޓީމަށް ކުޅެދިން 81 މެޗުން އޭނާ ވަނީ އަށް ލަނޑު ޖަހައިފަ އެވެ.