ސައޫދީ އަރަބިއާގެ ބިޑަށް ރާއްޖެ ތާއީދު ކުރަނީ

ސައޫދީ އަރަބިއާގައި 2034ވަނަ އަހަރުގެ ވޯލްޑްކަޕް ފުޓްބޯޅަ މުބާރާތް ބާއްވަން ރާއްޖެއިން ތާއީދު ކުރާނެކަން ހާމަކޮށްފި އެވެ.

ގައުމީ ފުޓްބޯޅަ އިދާރާއިން ނެރުނު ނޫސްބަޔާނުގައި ބުނެފައިވަނީ ސައޫދީ އަރަބިއާގެ ފުޓްބޯޅައިގެ ދުވެއްޔާއި އެ ގައުމުން ފުޓްބޯޅަ ކުރިއެރުވުމަށް ކުރަމުންދާ މަސައްކަތަށް ބަލާއިރު އެއީ ވޯލްޑްކަޕް ބާއްވަން އެންމެ އެކަށީގެންވާ ގައުމު ކަމަށެވެ. އަދި މިކަމަށް ބޭނުންވާ ވަސީލަތްތަކާއި ދަނޑުތަކާއި ގާބިލްކަން ވެސް ސައޫދީގައި ހުރި ކަމަށް ގަބޫލުކުރާ ކަމަށެވެ.

ސައޫދީ އަރަބިއާގެ ބިޑަށް ރާއްޖޭގެ ތާއީދު އޮތްކަން އެފްއޭއެމުން ހާމަކުރީ އޭޝިޔާގައި ވޯލްޑްކަޕް ތިންވަން ފަހަރަށް ބޭއްވުމަށް އޭޝިޔާގެ ގައުމުތަކުގެ ތާއީދަށް އޭއެފްސީގެ ރައީސް ޝައިހް ސަލްމާން ބިން އިބްރާހީމް ގޮވާލައްވާފައިވަނިކޮށެވެ. ވޯލްޑްކަޕް ބާއްވާނެ ގައުމެއް ކަނޑައަޅާނީ އެކަމަށް ކުރިމަތިލާ ގައުމުތަކުގެ ބިޑް އިވެލުއޭޓް ކުރުމަށްފަހު ފީފާގެ މެމްބަރުގެ އެސޯސިއޭޝަންތަކުގެ ވޯޓަކުންނެވެ.

ރާއްޖެ އާއި ސައޫދީ އަރަބިއާ އަކީ ވަރަށް ގާތް ދެގައުމެކެވެ. އަދި މި ދެ ގައުމުގެ ފުޓްބޯޅަ އެސޯސިއޭޝަނުގެ މެދުގައި ވެސް އޮތީ މިހާތަނަށް އޮތީ ވަރަށް ގާތް ގުޅުމެކެވެ. ފާއިތުވެދިޔަ ތިން އަހަރު ރާއްޖޭގެ ކުލަބުތަކާއި ގައުމީ ފުޓްބޯޅަ ޓީމު ވެސް އެންމެ ގިނައިން ކޭމްޕްކުރި އެއް ގައުމަކީ ސައޫދީ އަރަބިއާގެ އެހީގައި އެ ގައުމުގަ އެވެ. އަދި ސައޫދީ އަރަބިއާގެ އަންހެން ފުޓްބޯޅަ ޓީމު ވެސް ވަނީ މިދިޔަ އަހަރު ރާއްޖެ އައިސް މެޗުތަކެއް ކުޅެފަ އެވެ.

ސައޫދީ އަރަބިއާއިން ވޯލްޑްކަޕް ބޭއްވުމުގެ ޝައުގުވެރިކަން ބޮޑުވީ މިދިޔަ އަހަރު ގަތަރުގައި ބޭއްވި ވޯލްޑްކަޕަށްފަހު އެވެ. އެއީ ފީފާއިން ބުނާގޮތުން ދުނިޔޭގައި މިހާތަނަށް ބޭއްވި އެންމެ ފެންވަރު ރަނގަޅު އަދި އަގުބޮޑު ވޯލްޑްކަޕެވެ. އެއަށްފަހު ސައޫދީން ދަނީ ޔޫރަޕުގެ ކުޅުންތެރިން ގެންގޮސް، ފުޓްބޯޅައަށް ވަރަށްބޮޑަށް އިންވެސްޓްކުރަމުންނެވެ. ސައޫދީ ޕްރޯލީގު ދުނިޔޭގައި މަޝްހޫރު ކުރުމަށާއި ކުލަބުތައް ވަރުގަދަ ކުރަމުންދަނީ ސީދާ ސައރުކާރުގެ ބައިވެރިވުމާއެކުގަ އެވެ. ސައޫދީ ޓުވަރިޒަމްގެ ދެ އެމްބެސެޑަރުންގެ ގޮތުގައި ކަނޑައަޅާފައިވަނީ ވެސް ދުނިޔޭގެ އެންމެ މޮޅު ދެ ކުޅުންތެރިން ކަމަށްވާ ލަޔޮނަލް މެސީ އާއި ކްރިސްޓިއާނޯ ރޮނާލްޑޯ އެވެ.