2026 ވޯލްޑް ކަޕް މެޗުތަކަށް ފަސް މިލިއަން ޓިކެޓު ގަންނަން މިހާތަނަށް އެދިފައިވާ ކަމަށް ފީފާ އިން ބުނެފި

2026 ވޯލްޑް ކަޕް މެޗުތައް ބެލުަމަށް ފަސް މިލިއަން ޓިކެޓު ގަންނަން މިހާތަނަށް އެދިފައިވާ ކަމަށް ފީފާ އިން  ބުނެފިއެވެ.

ޓިކެޓުތަކުގެ އަގުތައް  ބޮޑުކަމުން ފާޑުކިޔުންތައް އިތުރުވަމުން ދަނިކޮށް ޓިކެޓު ވިއްކުމަށް ބުރާސްފަތި ދުވަހު ވަނީ ހުޅުވާލާފަ އެވެ.

ފުޓްބޯޅައިގެ ދުނިޔޭގެ މައި އިދާރާ ފީފާ އިން ބުނާގޮތުގައި 200 އަށް ވުރެ ގިނަ ގައުމުތަކަށް ނިސްބަތްވާ ސަޕޯޓަރުން ޓިކެޓު ހޯދުމަށް އެދިފައިވާއިރު، ޖޫން 27 ވަނަ ދުވަހު މިއާމީ ގައި ކޮލަމްބިއާ އާއި ޕޯޗުގަލް ކުޅެން ހަމަޖެހިފައިވާ މެޗަކީ މިހާތަނަށް އެންމެ ގިނައިން ޓިކެޓު ހޯދުމަށް އެދިފައިވާ މެޗެވެ.

އަންނަ އަހަރު އެމެރިކާ، ކެނެޑާ އަދި މެކްސިކޯ ގައި ބާއްވާ ޓޯރނަމަންޓުގެ އަގުތަކައް ފާޑުކިޔުންތައް އަމާޒުވެފައިވާއިރު، ގްރޫޕް ސްޓޭޖް ޓިކެޓުތަކުގެ އަގަކީ 2022 ގައި ގަތަރުގައި ބޭއްވި ވޯލްޑް ކަޕުގެ ޓިކެޓުތަކުގެ އަގުގެ ތިން ގުނަ ބޮޑު އަގެއް ކަމަށްވާއިރު، ފައިނަލްގެ އެންމެ އަގުު ހެޔޮ ޓިކެޓުގެ އަގަކީ 3،119 ޕައުންޑެވެ.

ފީފާ އިން އަދި ފާޑުކިޔުންތަކަށް އެއްޗެއް ބުނެފައި ނުވާއިރު، އަންނަ ހަފްތާގައި ދޯހާ ގައި ފީފާ ކައުންސިލްގެ ބައްދަލުވުމެއް އޮންނާނެއެވެ.

އަންނަ އަހަރުގެ ވޯލްޑް ކަޕަކީ، ފުރަތަމަ ފަހަރަށް 48 ގައުމު ބައިވެރިވާ ވޯލްޑް ކަޕް ކަމަށްވާއިރު، މުބާރާތުގެ ގުރުއަތުލުން ކުރިއަށް ގެންދިޔައީ ކުރީ ހަފްތާގެ ހުކުރު ދުވަހުއެވެ.

ކޮލަމްބިއާ އާއި ޕޯޗުގަލް ދެމެދު ކުޅޭ މެޗަކީ މިހާތަނަށް އެންމެ މަގުބޫލުކަން ބޮޑުވެފައިވާ މެޗެވެ. ފީފާއިން ބުނާ ގޮތުގައި ދެން އެންމެ މަގުބޫލުކަން ބޮޑުވެފައިވާ މެޗުތަކަކީ ބްރެޒިލް އާއި މޮރޮކޯ (ނިއު ޖާސީ، ޖޫން 13)، ގައި ކުޅޭ މެޗާއި މެކްސިކޯ އާއި ދެކުނު ކޮރެއާ (ގުއަޑަލަޖާރާ، ޖޫން 18)، ކުޅޭ މެޗާއި، އިކުއަޑޯ އާއި ޖަރުމަން (ނިއު ޖާސީ، ޖޫން 25)، އަދި ސްކޮޓްލޭންޑް އާއި ބްރެޒިލް (މިއާމީ، ޖޫން 24) އާ ދެމެދު ކުޅޭ މެޗެވެ.

ފީފާ އިން ބުނާގޮތުގައި، ޓިކެޓުތަކަށް އެންމެ ގިނައިން އެދިފައިވަނީ މުބާރާތް ބޭއްވުމަށް ހަމަޖެހިފައިވާ ގައުމުތަކުންނެވެ. އޭގެ ފަހުން އެންމެ ގިނައިން އެދިފައި ވަނީ ކޮލަމްބިއާ، އިނގިރޭސިވިލާތް، އިކުއަޑޯ، ބްރެޒިލް، އާޖެންޓީނާ، ސްކޮޓްލޭންޑް، ޖަރުމަން، އޮސްޓްރޭލިއާ، ފަރަންސޭސިވިލާތް އަދި ޕެނަމާ އިންނެވެ.