މެންޗެސްޓަރ ސިޓީ އަށް ކުޅެމުން އަންނަ އިންގްލެންޑުގެ ޒުވާން ކުޅުންތެރިޔާ، ރިކޯ ލެވިސް އަށް އެ ޓީމުގެ ކޯޗު ޕެޕް ގާޑިއޯލާ ތައުރީފުގެ ބަސްތައް އޮއްސާލައިފި އެވެ.
އުމުރުން 18 އަހަރުގެ ކުޅުންތެރިޔާ އަށް ގާޑިއޯލާ ތައުރީފު ކޮށްފައި ވަނީ ސިޓީގައި އޭނާ ދައްކަމުން އަންނަ ކުޅުމުގެ ސަބަބުންނެވެ. ޔުއެފާ ޗެމްޕިއަންސް ލީގުގައި އާރްބީ ލައިޕްޒިގާ ދެކޮޅަށް ސިޓީން ކުޅުނު މެޗަށްފަހު ވާހަކަ ދައްކަމުން ގާޑިއޯލާ ބުނީ، އުމުރުން އެންމެ 18 އަހަރުގައި އޭނާ ދައްކަނީ އަޖައިބު ކުރުވަނިވި ކުޅުމެއް ކަމަށެވެ. ގާޑިއޯލާ ބުނީ ކޯޗިންގެ މަސައްކަތުގައި އޭނާ އުޅެމުން އަންނަތާ 15 އަހަރުވެފައިވާ ކަމަށާއި، އެކި ކަހަލަ ތަފާތު ކުޅުންތެރިން ތަމްރީނު ކޮށްފައިވާ ކަމަށެވެ. ނަމަވެސް ލެވިސް ކަހަލަ ހުނަރުން ފުރިގެންވާ ޒުވާން ކުޅުންތެރިޔަކު މަދުން ނޫނީ ނުފެންނަ ކަމަށް ވެސް އޭނާ ވަނީ ބުނެފަ އެވެ.
އިތުރަށް ވާހަކަ ދައްކަމުން ގާޑިއޯލާ ބުނީ ލެވިސް އަކީ މިހާތަނަށް އޭނާ ތަމްރީނު ކޮށްދިން އެންމެ މޮޅު އެއް ކުޅުންތެރިޔާ ކަމަށެވެ. އޭނާގެ ކިބައިގައި މިހާރު ހުރި ހުނަރު އިތުރަށް ތަރައްޤީކޮށް، އެއް ފެންވަރެއްގައި ކުޅުން ހިފަހައްޓާލެވިއްޖެ ނަމަ، އެންމެ މަތީ ފަންތީގައި އޭނާ ހިމެނޭނެ ކަމަށް ވެސް ގާޑިއޯލާ ވަނީ ބުނެފަ އެވެ. ޚާއްސަކޮށް އެ އުމުރުގައި ތަފާތު މޮޅު ކުޅުމެއް ދެއްކުމަކީ، މުސްތަޤުބަލަށް އޭގެ ފައިދާވާނެ ކަމެއް ކަމަށް ވެސް ގާޑިއޯލާ ވަނީ ބުނެފަ އެވެ.
ލެވިސް އޭނާގެ ސީނިއާ ކެރިއަރު ފެށީ މިދިޔަ އަހަރު ސިޓީންނެވެ. މިހާތަނަށް ލެވިސް ވަނީ ސިޓީ އަށް 24 މެޗު ކުޅެދީ އެއް ލަނޑު ޖަހައިފަ އެވެ. އޭނާ ވަނީ އިންގްލެންޑުގެ ޒުވާން އުމުރުފުރާގެ ޤައުމީ ޓީމުތަކަށް ކުޅެފަ އެވެ.
