ކުރީގެ ރައީސް، ޖަލު ހުކުމެއް ތަންފީޒު ކުރައްވަމުން ގެންދަވާ އަބްދުﷲ ޔާމީން ގެކޮޅަށް ބަދަލުކޮށްފިއެވެ.

އެމަނިކުފާނު ގެކޮޅަށް ބަދަލުކޮށްފައިވަނީ އާދިއްތަ ދުވަހުގެ ހަވީރުގެ ވަގުތެއްގައެވެ. ޔާމީން ގެކޮޅަށް ވަޑައިގެންނެވިއިރު ގިނަ އަދަދެއްގެ ސަޕޯޓަރުން މަރުހަބާ ދެންނެވުމަށްޓަކާ އެސަރަހައްދަށް އެއްވެފައިވެއެވެ. މީގެ އިތުރުން އިންތިޚާބީ ރައީސް ޑރ.މުހައްމަދު މުއިއްޒުގެ އިތުރުން ޕީޕީއެމް/ޕީއެންސީގެ އިސްބޭފުޅުން ހ. ދޫވެހި ސަރަހައްދަށް ވަޑައިގެންނެވިއެވެ.

ކަރެކްޝަންސްގެ ވޭނުގައި ޔާމީން ގެކޮޅަށް ވަޑައިގެންނެވުން، އިންތިޚާބީ ރައީސް ޑރ.މުއިއްޒު ވަނީ އެމަނިކުފާނަށް މަރުހަބާ ދަންނަވާ ވާހަކަފުޅު ދައްކަވާފައެވެ.

ޔާމީން ގެއަށް ބަދަލުކުރުމާއި ގުޅޭގޮތުން އިންތިޚާބީ ރައީސް ޑރ.މުއިއްޒު ވިދާޅުވީ މިއީ އަމިއްލަ މަސްލަހަތަށް ވުރެ ގައުމުގެ މަސްލަހަތު އިސްކުރަންވީ ވަގުތު ކަމަށާއި، މިވަގުތަކީ އެންމެން އެކަތިގަނޑަކަށް ވާންވީ ވަގުތު ކަމަށެވެ. އަދި ޔާމީން ގެއަށް ބަދަލުކުރެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ނިންމެވީ ގައުމުގެ މަސްލަހަތަށް ބައްލަވާފައި ކަމަށް އިންތިހާބީ ރައީސް ޑރ. މުއިއްޒު ވިދާޅުވިއެވެ.

ކަރެކްޝަނަލް ސާވިސްއިން ބުނީ ޔާމީން ގެކޮޅަށް ބަދަލު ކުރަނީ ވަގުތީ ގޮތުން ކަމަށެވެ. އަދި އެ މަނިކުފާނު ހުންނެވީ ޖަލު ހުކުމެއްގައި ކަމަށްވާތީ އަމަލު ކުރަމުން ގެންދާނީ ގައިދީންނާމެދު އަމަލު ކުރާ އުސޫލުގެ މަތިން ކަމަށެވެ.

ވ. އާރަށު ޚިޔާނާތުގެ މައްސަލައިގައި ރިޝްވަތު ނެންގެވުމާއި އެ ފައިސާ ލޯންޑަރ ކުރެއްވުމުގެ ކުށް ކުރީގެ ރައީސް ޔާމީނުގެ މައްޗަށް ވަނީ ސާބިތުވެފައެވެ. އެ މައްސަލައިގައި އެމަނިކުފާނުގެ މައްޗަށް ކްރިމިނަލް ކޯޓުން 11 އަހަރުގެ ޖަލު ހުކުމެއް އިއްވާފައިވަނީ ނިމިދިޔަ 2022 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ. މި މައްސަލަ އާއި ގުޅިގެން ރައީސް ޔާމީން 5 މިލިއަން ޑޮލަރުން ޖޫރިމަނާވެސް ވަނީ ކޮށްފައެވެ.