ފައިނަލްގައި އިންޓަ މިއާމީ އަށް ނާކާމިޔާބު

ޔޫއެސް އޯޕަން ކަޕްގެ ފައިނަލުން އިންޓަ މިއާމީ ބަލިވެއްޖެ އެވެ.

ބުރާސްފަތި ދުވަހުގެ ފަތިހު ހިއުސްޓަން ޑައިނަމޯސްއާ ދެކޮޅަށް ކުޅުނު ފައިނަލުން މިއާމީ ބަލިވީ 2-1 އިންނެވެ. މެޗުގައި އިންޓަ މިއާމީގެ ކެޕްޓަން ލިއޮނަލް މެސީގެ އިތުރުން ޑިފެންޑަރު ޖޯޑީ އަލްބާ ކުޅެފައެއް ނުވެ އެވެ. ފައިނަލްގެ ކުރިން ވެސް އަލްބާ އަށް ނުކުޅެވޭނެކަން ވަނީ ޔަގީންވެފަ އެވެ. ނަމަވެސް މެސީ އާމެދު ކޯޗު ޖެރާޑޯ މާޓިނޯ ގޮތް ނިންމީ ފަހު ވަގުތުގަ އެވެ.

މެޗު ފަށައިގެން 24 ވަނަ މިނެޓުގައި ހިއުސްޓަން ޑައިނަމޯސް އިން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ ގްރިފިން ޑޯސޭ އެވެ. އޭގެ ފަހުން ފުރަތަމަ ހާފު ނިމުމުގެ ކުރިން އެ ޓީމުން ވަނީ ދެ ވަނަ ލަނޑެއް ޖަހައި، މެޗުގައި ލީޑު ފުޅާ ކޮށްފަ އެވެ. މެޗުގެ 33 ވަނަ މިނެޓުގައި ލިބުނު ޕެނަލްޓީއެއް ކާމިޔާބުކޮށް، އެ ޓީމަށް ލީޑު ފުޅާ ކޮށްދިނީ އެމީން ބާސީ އެވެ. މެޗުގައި ލަނޑެއް ޖެހުމަށް މިއާމީން ކުރި މަސައްކަތް ކާމިޔާބުވީ އެންމެ ފަހު ވަގުތު އެވެ. އޭގެ ކުރިން ވެސް އެ ޓީމަށް ވަނީ ލަނޑު ޖަހާނެ ފުރުސަތު ލިބި ބޭކާރުވެފަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި މިއާމީގެ ހަމައެކަނި ލަނޑު ޖަހައިދިނީ ޖޯސެފް މާޓިނޭޒް އެވެ.

ޔޫއެސް އޯޕަން ކަޕް ކާމިޔާބުކޮށް، މި ސީޒަންގައި ދެ ތަށި ކާމިޔާބު ކުރުމުގެ ފުރުސަތު މިއާމީ އަށް އޮތެވެ. މީގެ ކުރިން އެ ޓީމުން ވަނީ އެމެރިކާ ލީގްސް ކަޕް ކާމިޔާބުކޮށްފަ އެވެ. އެއީ މިއާމީން ކާމިޔާބު ކުރި ފުރަތަމަ ތައްޓެވެ.