ތިންވަނަ އިންޓަ ފެކަލްޓީ ވޮލީބޯޅަ މުބާރާތުގެ އަންހެން އަދި ފިރިހެން ބައިގެ ވެސް ޗެމްޕިއަންކަން ފެކަލްޓީ އޮފް އެޑިއުކޭޝަނުން ހޯދައިފި އެވެ.

އާދީއްތަ ދުވަހުގެ ރޭ ކުޅުނު އަންހެން ބައިގެ ފައިނަލް މެޗު ފެކަލްޓީ އޮފް ހެލްތް ސައިންސާ ވާދަކޮށް ފެކަލްޓީ އޮފް އެޑިއުކޭޝަނުން މެޗު ކާމިޔާބުކުރީ ސީދާ ތިން ސެޓުންނެވެ. މި މެޗުގެ ސެޓްތައް ފެކަލްޓީ އޮފް އެޑިއުކޭޝަނުން ގެންދިޔައީ 19-25، 15-25 އަދި 22-25 އިންނެވެ.

މިއީ މި މުބާރާތުގެ އަންހެން ބައި ފެކަލްޓީ އޮފް އެޑިއުކޭޝަނުން ކާމިޔާބުކުރި ތިންވަނަ ފަހަރެވެ.

މުބާރާތުގެ ފިރިހެން ބައިގެ ޗެމްޕިއަންކަން ފެކަލްޓީ އޮފް އެޑިއުކޭޝަނުން ހޯދީ ފެކަލްޓީ އޮފް ޝަރީއާ އެންޑް ލޯއާ ވާދަކޮށް ސީދާ ތިން ސެޓުންނެވެ. މި މެޗުގެ ސެޓްތައް އެޑިއުކޭޝަނުން ގެންދިޔައީ 19-25، 19-25 އަދި 22-25 އިންނެވެ.