ވޯލްޑްކަޕަށް އިންޑިޔާއަށް ދާން މިހާތަނަށް ވިސާ ނުލިބެނީ ޕާކިސްތާނަށް

އަންނަ މަހު އިންޑިޔާގައި ފަށާ ކްރިކެޓް ވޯލްޑްކަޕަށް އެ ގައުމަށްދާން މިހާތަނަށް ވިސާ ނުލިބެނީ ޕާކިސްތާނަށް އެކަނި ކަމަށް އެ ގައުމުން ބުނެފި އެވެ.

އަންނަ މަހުގެ ފަސް ވަނަ ދުވަހު އިންޑިޔާގައި ފަށާ މުބާރާތަށް ޕާކިސްތާނަށް ވިސާ ނުލިބޭ މައްސަލަ އެ ގައުމުން ވަނީ އިންޓަނޭޝަނަލް ކްރިކެޓް ކައުންސިލާ ވެސް ހިއްސާކޮށްފަ އެވެ. މި މައްސަލާގައި އިންޑިޔާއިން ބުނާ ހަމައެކަނި ވާހަކަ އަކީ ހުރިހާ ގައުމަކަށް ވެސް ވިސާ ލިބޭނެ ކަމަށެވެ.

ޕާކިސްތާނުން ބޭނުން ވަނީ ވިސާގެ ކަންތައްތައް އަވަހަށް ނިންމައި ގައުމުން ބޭރުގައި ޓީމުގެ ފަރިތަކުރުންތައް ފަށާށެވެ. މި ގޮތުން އިންޑިޔާ އަށް ދާން ޕާކިސްތާން ނިންމާފައިބަނީ ޑުބާއީގައި ފަރިތަކުރުމަށްފަހު އެވެ.

ޕާކިސްތާން އެމްބަސީން ބުނީ އުއްމީދު ކުރަނީ މިއަދު ވެސް ވިސާ ލިބޭނެ ކަމަށް ކަމަށާއި ނަމަވެސް އެކަމުގެ ޔަގީންކަމެއް ނެތް ކަމަށެވެ.

ސިޔާސީ އަރައިރުންތަކުގެ ސަބަބުން 2013 ވަނަ އަހަރަށްފަހު މި ދެ ގައުމުގެ ޓީމު އެއް ގައުމު އަނެއް ގައުމަށް ދަތުރެއް ނުކުރެ އެވެ. އަދި މި މަހު ޕާކިސްތާނާއި ލަންކާގައި ބޭއްވި އޭޝިޔާ ކަޕް ކުޅެން ޕާކިސްތާނަށް ދިއުމަށް ވެސް އިންޑިޔާ ވަނީ ދެކޮޅު ހަދައިފަ އެވެ. ޕާކިސްތާނުގައި ބާއްވަން އޮތް މުބާރާތް ލަންކާއާ ހިއްސާކޮށްގެން ބާއްވަން ޖެހުނީ ވެސް މިހެންވެ އެވެ.

ކޮލިފައިވި 10 ގައުމާއެކު ވޯލްޑްކަޕް އޮންނާނީ އޮކްޓޫބަރު 5 އިން ނޮވެމްބަރު 19 އަށެވެ.