ޓެރަރިސްޓު ހަމަލާއެއް ދިނުމަށް ބޮންތަކެއް ގޮއްވާލުމަށް ރާވަމުން ދިޔަ 28 ޓެރަރިސްޓުން، އީރާނުން އަތުލައިގެންފި ކަމަށް އެ ގައުމުގެ ނޫސްތަކުން ރިޕޯޓްކޮށްފިއެވެ.

އީރާނުގެ އިންޓެލިޖެންސް މިނިސްޓްރީއާ ހަވާލާދީ އީރާނުގެ ތަސްނީމް ނިއުސް އެޖެންސީން އާދީއްތަ ދުވަހު ބުނީ ތެހެރާނުގައި އެއްފަހަރާ ގޮއްވާލަން އުޅުނު 30 ބޮން ނައްތާލައި، އައިއެސްއާ ގުޅުންހުރި 28 "ޓެރަރިސްޓުން"، އީރާނުގެ ކަމާބެހޭ ފަރާތްތަކުން ހިފަހައްޓާފައި ވާކަމަށެވެ.

އީރާނުގެ އިންޓެލިޖެންސް މިނިސްޓްރީން ނެރުނު ބަޔާނެއްގައި ބުނެފައިވަނީ ބައެއް މީހުންނަކީ އައިއެސްއަށް ނިސްބަތްވާ މީހުން ކަމަށާއި، އެ މީހުންނަކީ ސީރިއާ، އަފްޣާނިސްތާން، ޕާކިސްތާން އަދި އިރާގުގެ ކުރުދިސްތާން ސަރަހައްދުގައި ތިބި (ހަރުކަށި ފިކުރުގެ) ޖަމާއަތްތަކާ ގުޅިފައިވާ މީހުންގެ ތާރީޚެއް އޮތް ބައެއް ކަމަށެވެ.

އެ މިނިސްޓްރީން ބުނީ މި ހަމަލާތަކަކީ އީރާނުގެ އެތެރޭގެ ސަލާމަތާއި ރައްކާތެރިކަން ހަނިކޮށް، ހަމަނުޖެހުން ބޮޑު ގައުމެއްގެ ގޮތުގައި ސިފަކޮށް، ބިރުވެރިކަން އުފެއްދުމުގެ މަގްސަދުގައި ދޭން އުޅުނު ހަމަލާތަކެއް ކަމަށާއި، މި ހަމަލާތައް ދޭން ރާވާފައިވަނީ މިދިޔަ އަހަރު ވެރިކަމާ ދެކޮޅަށް ކުރި މުޒާހަރާތަކަށް އަހަރެއްފުރޭ، އަހަރީ ދުވަހާ ދިމާކޮށް ކަމަށްވާއިރު، އެއީ މަހްސާ އަމީނީގެ މަރާ ގުޅިގެން އުފެދުނު ހަމަލާތަކެއް ކަމަށެވެ.

އީރާނުގެ ކުރުދީ އަންހެނެއް ކަމަށްވާ އުމުރުން 22 އަހަރުގެ އަމީނީ މަރުވެފައިވަނީ 2022 ވަނަ އަހަރުގެ ސެޕްޓެމްބަރު މަހުގެ 16 ވަނަ ދުވަހު، ތެހެރާނުގައި، ހެދުން އެޅުމުގެ އުސޫލާ ޚިލާފުވިކަމުގެ ތުހުމަތުގައި މޮރަލް ފުލުހުން އޭނާ ހައްޔަރުކުރުމާ ގުޅިގެން އުފެދުނު ހަމަނުޖެހުންތަކުގައެވެ. އޭނާ މަރުވުމާ ގުޅިގެން އެތައް މަހެއް ވަންދެން ކުރި މުޒާހަރާތައް އިތުރުވެގެން ދިޔައީ ވެރިކަން ވައްޓާލުމަށް ހިންގުނު އިދިކޮޅު ހަރަކާތެއްގެ ގޮތުގައެވެ.

އައިއެސްއިން ވަނީ 2017 ވަނަ އަހަރު އީރާނުގެ ޕާލަމެންޓާއި އިސްލާމިކް ރިޕަބްލިކްގެ ބާނީ ރޫހުﷲ ޚުމައިނީގެ މަހާނައަށް އަމާޒުކޮށް، ނުރައްކާތެރި ބޮމުގެ ދެ ހަމަލާއެއްވެސް އީރާނަށް ދީފައެވެ.

އޭގެ އިތުރުން އައިއެސް އިން ވަނީ މިދިޔަ އޮކްޓޫބަރު މަހު ހުޅަނގު ދެކުނުގެ ސިޓީއެއް ކަމަށްވާ ޝިރާޒްގައިޝިޔައީންގެ "ހަރަމްފުޅަކަށް" ދިން ހަމަލާގެ ޒިންމާވެސް އުފުލާފައެވެ.