ވެނެޒުއޭލާގެ ސަލާމަތީ ޚިދުމަތްތަކުން ހައްޔަރުކޮށްފައިވާ އިދިކޮޅު ދެ ލީޑަރުންގެ ރައްކާތެރިކަމަށް ޒިންމާވާން ޖެހޭނީ "ސީދާ ރައީސް ނިކޮލަސް މަޑޫރޯ ކަމަށާއި" އެއްވެސް ޝަރުތެއް ނެތި މިހާރުން މިހާރަށް އެފަރާތްތައް ދޫކޮށްލުމަށް އެމެރިކާގެ ރައީސް ޑޮނަލްޑް ޓްރަމްޕް ގޮވާލާއްވައިފިއެވެ. 

ރައީސް ޓްރަމްޕް ނެރުއްވި ބަޔާނެއްގައި ވިދާޅުވީ ހައްޔަރުކޮށްފައިވާ ދެ ލީޑަރުންނަކީ ނުހައްގުން ހައްޔަރުކޮށްފައިވާ ސިޔާސީ ކުށްވެރިން ކަމަށާއި ރައީސް މަޑޫރޯގެ ޚުދުމުހުތާރު ވެރިކަން ވަރަށް ބޮޑަށް ކުށްވެރިކުރައްވާ ކަމަށެވެ. 

ވެނެޒުއޭލާގެ އިދިކޮޅު ދެ ލީިޑަރުން ކަމަށްވާ ލިއޮޕޮލްޑޯ ލޯޕެޒް އާއި އެންޓޯނިއޯ ލެޑެޒްމާ ވަނީ އަންގާރަ ދުވަހު ގޭބަންދުން އަސްކަރީ ޖަލަކަަށް އަންގާރަ ދުވަހު ބަދަލުކޮށްފައެވެ.

އިދިކޮޅު ދެ ލީޑަރަކު އަސްކަރީ ޖަލަކަށް ހައްޔަރަށް ގެންދެވުނުއިރު އާދީއްތަ ދުވަހު ވެނެޒުއޭލާގައި ވަނީ، ގާނޫނު އަސާސީ އަލުން އެކުލަވާލުމަށްޓަކައި އާ ގާނޫނު ހަދާ މަޖިލީހެއްގެ އިންތިޚާބު ބާއްވާފައެވެ. އިންތިޚާބު ބޭއްވި ދުވަހު ހިނގި ހަމަނުޖެހުންތަކުގައި މަދުވެގެން 10 މީހަކު މަރުވިއެވެ. އިދިކޮޅު ފަރާތްތަކުން ވަނީ އާދީއްތަ ދުވަހު ބޭއްވި އިންތިޚާބު ބޯއިކޮޓްކޮށްފައެވެ. ބައިނަލްއަގްވާމީ ދުނިޔެ އާއި ވެނެޒުއޭލާގެ އިދކޮޅު ފަރާތްތަކުން ބުނަމުން ދަނީ ރައީސް މަޑޫރޯ އަލުން ގާނޫނު އަސާސީ އެކުލަވާލުމަށްޓަކައި މަސައްކަތްޕުޅު ކުރައްވަމުން ގެންދަވަނީ ބާރުތައް މުށުތެރެއަށް ލެއްވުމަށް ކަމަށެވެ.  

އާދީއްތަ ދުވަހު ނެގި ވޯޓާއި ގުޅިގެން އެމެރިކާއިން، ވެނެޒުއޭލާގެ ރައީސް ނިކޮލަސް މަޑޫރޯ އާއި ދެކޮޅަށް ހޯމަ ދުވަހު ވަނީ މާލީގޮތުން ދަތިކުރުމުގެ ފިޔަވަޅުތަކެއް އަޅައިފިއެވެ. އަލަށް އެޅި ފިޔަވަޅުތަކުގެ ދަށުން، އެމެރިކާގެ ބާރު ހިނގާ ހުރިހާތަނެއްގައި ހުރި ރައީސް މަޑޫރޯގެ އެސެޓުތައް ފްރީޒްކޮށް، އެމަނިކުފާނާއި އެކު ވިޔަފާރިކުރުން އެމެރިކާގެ ރައްޔިތުންނަށް ވަނީ މަނާކޮށްފައެވެ.