އުތުުރު ކޮރެއާގައި ހައްޔަރުކޮށްފައިވާ އެމެރިކާގެ ރައްޔިތުންނަށް، އުތުރު ކޮރެއާ އިން ބިރު ދައްކަމުންދާ ކަމަށް އެމެރިކާ އިން ބުނެފިއެވެ.
އެމެރިކާ ގެ ފޮކްސް ނިއުސް އިން ބުނީ އުތުރު ކޮރެއާ އިން އެމެރިކާގެ ރައްޔިތުންނަށް ބިރު ދައްކަމުން ދަނީ، އެގައުމުން އެމެރިކާގެ ރައްޔިތުންނަށް "ރަހްމަތެއް ނެތި އަދަބު ދިނުން" ހައްގު ކަމަށް ބުނެކަމަށެވެ.
އުތުރު ކޮރެއާ އިން ހައްޔަރުކޮށްފައިވާ ކޮރެއާ- އެމެރިކާ ރައްޔިތެއް ކަމަށްވާ ކިމް ހަކް ސޯންގް ހައްޔަރުކޮށްފައި ވަނީ މިދިޔަ ހޮނިހިރު ދުވަހުއެވެ. ޕިޔޮންޔަންގް ޔުނިވާސިޓީ އޮފް ސައިންސް އެންޑް ޓެކްނޮލޮޖީގައި ކިޔަވައި ދިން ހަކް ސޯންގް ހައްޔަރުކޮށްފައި ވަނީ އުތުރު ކޮރެއާގެ ދައުލަތާ މެދު ރުޅިވެރިކަމުގެ އަމަލުތައް ހިންގުމުގެ ތުހުމަތުގައެވެ. އިތުރަށް ހައްޔަރުކޮށްފައިވާ މީހުންގެ ތެރޭގައި ހިމެނެނީ އޮޓޯ ވާމްބިއާ ނަމަކަށް ކިޔާ ކޮލެޖު ދަރިވަރަކާއި، ކޮރެއަން-އެމެރިކަން ޕްރޮފިސަރެއް ކަމަށްވާ ޓޯނީ ކިމް އާއި، ވިޔަފާރިވެރިއެއް ކަމަށްވާ ކިމް ޑޮންގް ޗުލްއެވެ.
އުތުރު ކޮރެއާގެ ދައުލަތުގެ މީޑިއާ ކޭސީއެންއޭ އާއި ހަވާލާދީ ފޮކްސް ނިއުސް އިން ބުނީ އުތުުރު ކޮރެއާގެ ހައްޔަރުގައި ތިބި، އެންމެ ފަހުން ހައްަޔަރު ކުރެވުނު މިހުން ހައްޔަރު ކުރެވުނު ސީދާ ސަބަބު ވަރަށް އަވަހަށް ހާމަކުރާނެ ކަމަށެވެ.
އެމެރިކާގެ ސްޓޭޓް ޑިޕާޓްމަންޓްގެ އޮފިޝަލެއް ފޮކްސް ނިއުސްއަށް ވިދާޅުވީ އެމެރިކާ ރައްޔިތުން އުތުރު ކޮރެއާ އަށް ދިއުމާ ދޭތެރޭ ސަމާލުވާން ޖެހޭ ކަމަށެވެ.
ދެކޮރެއާ މައްސަލާގައި އެމެރިކާ އާއި އުތުރު ކޮރެއާގެ ގުޅުން ވަނީ ވަރަށް ބޮޑަށް ހީނަރުވެފައެވެ. ދެކޮރެއާ ސަރަހައްދު ހަލަބޮލިވެފައި ވާއިރު، އުތުރު ކޮރެއާ އިން ހަވަނަ ނިއުކްލިއާ ޓެސްޓެއް ކޮށްފާނެ ކަމަށް ވަނީ ބެލެވިފައެވެ. އެމެރިކާ އާއި ދެކުނު ކޮރެއާގެ އެޖެންޓުން ވެގެން އުުތުރު ކޮރެއާގެ ލީޑަރު ކިމް ޖޮން-އުން އަވަހާރަކޮށްލަން އުޅޭ ކަމަށް އުތުރު ކޮރެއާގެ ދައުލަތުގެ މީޑިއާ އިން ދާދި ފަހުން ވަނީ ބުނެފައެވެ.
