ބަޣްދާދީ މަރުވެފައިވާކަމަށް އައިއިސްއިން އެއްބަސްވެއްޖެ

ހަނގުރާމަވެރި އައިސިސް ޖަމާޢަތުގެ ލީޑަރު އަބޫ ބަކުރު އަލް ބަޣްދާދީ މަރުވެފައިވާކަމަށް ދެކެވެމުން އައި ވާހަކަ އެ ޖަމާޢަތުން ކަށަވަރުކޮށްދީފިއެވެ.

އައިސިސްއިން އިޢުލާނުކޮށްފައިވާ އިސްލާމީ ޚިލާފަތުގެ ޚަލީފާކަމުގައިވެސް އެ ޖަމާޢަތުން ކަނޑައަޅާފައިވާ ބަޣްދާދީ މަރުވެފައިވަނީ އިރާޤުގެ ނިނުއާގައެވެ.

އިރާޤުގެ މީޑިއާއަށް މައުލޫމާތުދިން އައިސިސްގެ މަސްދަރަކުން ހާމަކޮށްފައިވާ ގޮތުގައި، ބަޣްދާދީގެ މަރާއި ގުޅޭގޮތުން އެ ޖަމާޢަތުގެ ހަނގުރާމަވެރިން ވާހަކަދައްކުން މަނާކޮށްފައި އޮތް އޮތުން ނިމުމަކަށް ގެނެސް، އެ ޖަމާޢަތުން މިހާރު ދަނީ ޖަމާޢަތުގެ ވެރިކަމަށް އިސްކުރާނެ މީހަކު ކަނޑައެޅުމުގެ މަސައްކަތް ކުރަމުންނެވެ.

ބަޣްދާދީގެ މަރަކީ އައިސިސްއަށް މިހާތަނަށް ކުރިމަތިވި އެންމެ ބޮޑު ނާކާމިޔާބީ ތަކުގެ ތެރެއިން އެއް ކަމެވެ. ދާދި ފަހުން އިރާޤުގެ ސަލާމަތީ ބާރުތަކުން ވަނީ އައިސިސްއިން ޚިލާފަތު ޢިއުލާނުކޮށް، ވެރިކަން ކުރަމުން އައި މޫސަލް ހިފާފައެވެ.

އިރާޤުގެ މީޑިއާތަކުގެ އިތުރުން، ސީރިއަން އޮބްޒަވޭޓަރީ ފޯ ހިއުމަން ރައިޓްސް އިން ވަނީ، ބަޣްދާދީ މަރުވެފައިވާކަން އެ ޖަމާޢަތަށްވެސް ކަށަވަރު ކުރެވިފައިވާ ކަމަށް ބުނެފައެވެ.