ޓެރަރިސްޓުންނަށް ހަތިޔާރު ވިއްކުން ހުއްޓުވުމަށް އދ އިން ޤަރާރެއް ފާސްކޮށްފި
މިއީ މިޞްރުން އިސްވެ ހުށަހެޅި ޤަރާރެއް
އދ ގެ ސަލާމަތީ މަޖިލިސް
ހަނގުރާމަވެރި އައިސިސް އަދި އަލް ޤައިދާ ޖަމާޢަތާއި، އެފަދަ އެހެން ޓެރަރިސްޓު ޖަމާއަތްތަކަށް ހަތިޔާރު ލިބޭނެ މަގުތައް ބަންދުކުރުމަށް އެއްބަސްވެ އދ އިން ޤަރާރެއް ފާސްކޮށްފިއެވެ.
އދ ގެ ސަލާމަތީ މަޖިލީހުގެ އިއްތިފާޤުން ފާސްކުރި މި ޤަރާރުގައި، ޓެރަރިސްޓުންނަށް ހަތިޔާރު ވިއްކާ ނެޓްވަރކްތައް ހުއްޓުވައި، ޓެރަރިސްޓުންނާއި އެކު އެއްވެސް ފަރާތަކުން ހަތިޔާރުގެ ވިޔަފާރި ކުރިޔަނުދޭން މަސައްކަތްކުރުމަށް އދގެ 193 މެންބަރު ޤައުމަށް ވަނީ ގޮވާލާފައެވެ.
މިޞްރުން އިސްވެ ހުށަހެޅި މި ޤަރާރުގައި، އައިސިސް އަދި އަލް ޤައިދާ ޖަމާޢަތާއި، އެފަދަ އެހެން ޓެރަރިސްޓު ޖަމާއަތްތަކުގެ އިތުރުން، ކުށްވެރިންނަށް ހަތިޔާރާއި، އަސްކަރީ އާލާތްތަކާއި، ޑްރޯން އާއި އައިއީޑީ ފަދަ ނުރައްކާތެރި ތަކެތި އަދިވެސް ހުއްޓުމެއް ނެތި ލިބެމުންދާކަން ވަނީ ފާހަގަކޮށްފައެވެ. އަދި މިކަން ހުއްޓުވުމަށް، ޓެރަރިސްޓުންނާއިއެކު ހަތިޔާރުގެ ވިޔަފާރިކުރާ ފަރާތްތަކާއިމެދު ޤާނޫނީ ފިޔަވަޅުއަޅައި، ހަތިޔާރު ޓްރޭސްކުރަން ފަސޭހަވާނެ ގޮތަށް ހަތިޔާރު ޓްރޭސް ކުރުމަށް މި ޤަރާރުގައި ވަނީ ގޮވާލާފައެވެ.
ހަނގުރާމަވެރި ޖަމާޢަތްތަކާއިއެކު މާލީ ގުޅުންތައް ބާއްވަމުންދާ އެކި ފަރާތްތަކުން އެ ގުޅުންތައް ކަނޑާލުމަށްވެސް ސަލާމަތީ މަޖިލީހުގެ ޤަރާރުގައިވަނީ ގޮވާލާފައެވެ.
އަދި މި ކަންކަން ހާސިލްކުރުމަށް ޤައުމުތަކުން އެކުގައި މަސައްކަތްކުރުމަށް ޤަރާރުގައި ވަނީ ބާރުއަޅާފައެވެ.
