ޕާޓީން ނިންމާފައިވާ ގޮތަށް، މި އިންތިޚާބުގައި އެއްވެސް ބޭފުޅަކަށް ތާއީދުކުރާކަށް ގަސްދެއް ނުކުރަން: ރައީސް ނަޝީދު
ދެވަނަ ބުރުގައި ރައީސް ސާލިހަށް ތާއީދުކޮށްދެއްވަން އެމަނިކުފާނު އެދިވަޑައިގެންފައެއް ނުވޭ
ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ދަ ޑިމޮކްރެޓްސްއިން ނިންމާފައިވާގޮތަށް، މިފަހަރުގެ ރިޔާސީ އިންތިޚާބުގެ ދެވަނަ ބުރުގައި އެއްވެސް ބޭފުޅަކަށް ތާއީދު ކުރައްވަން ގަސްދު ނުކުރައްވާ ކަމަށް، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
އާދިއްތަ ދުވަހު މަޖިލީސް އިދާރާގައި ބޭއްވި ނޫސްވެރިންގެ ބައްދަލުވުގައި ނަޝީދު ވިދާޅުވީ، އެއްވެސް ކެންޑިޑޭޓަކަށް ތާއީދު ނުކުރައްވާނެ ކަމަށެވެ. ނޫސްވެރިން ވަނީ ނަޝީދު ތާއީދުކުރައްވަނީ ކޮން ބޭފުޅަކަށްތޯ ތަކުރާރުކޮށް ދަންނަވާފައެވެ. ނަމަވެސް ނަޝީދު ވިދާޅުވީ އަންނަ ހޮނިހިރު ދުވަހު ބާއްވާ ރިޔާސީ އިންތިޚާބުގެ ދެވަނަ ބުރުގައި އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހީމް މުހައްމަދު ސާލިހާއި ޕީޕީއެމް-ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުއާ ދެ ބޭފުޅުން ވާދަކުރެއްވިޔަސް، އެ މަނިކުފާނު އަދިވެސް ތާއީދުކުރައްވަނީ އިންތިޚާބުގެ ފުރަތަމަ ބުރުން ތިންވަނައަށް ވަޑައިގެންނެވި ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބަށް ކަމަށެވެ.
ނަޝީދު ރައީސް އޮފީހަށް ވަޑައިގެން ރައީސް އިބްރާހީމް މުހައްމަދު ސާލިހާއެކު ބޭއްވެވި ބައްދަލުވުމަށްފަހު ރައީސް ނަޝީދާ ހަވާލާދެއްވައި ރައީސް ސާލިހު ވިދާޅުވީ، ދަ ޑިމޮކްރެޓްސްއިން ކުރިންވެސް ނިންމި ގޮތަށް ވަކި ކެންޑިޑޭޓަކަށް ތާއީދުނުކުރާނެ ކަމަށެވެ. އެހެން ނަމަވެސް (އަމިއްލަފުޅު ހައިސިއްޔަތުން) ނަޝީދުގެ ތާއީދަށް އެދިވަޑައިގެންފައި ވާނެކަމަށްވެސް ރައީސް ވިދާޅުވިއެވެ. ރައީސް އެގޮތަށް އެދިވަޑައިގެންނެވިތޯ، ނޫސްވެރިންގެ ބައްދަލުވުމުގައި ދެންނެވުމުން ނަޝީދު ވިދާޅުވީ އެދިވަޑައިނުގަންނަވާ ކަމަށެވެ.
މި ބައްދަލު ކުރެއްވުމާ ގުޅޭގޮތުން އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވީ، އިންތިޚާބުގެ ދެވަނަބުރާ ގުޅޭގޮތުން ވެސް ވާހަކަ ދެކެވުނުއިރު، އިންތިޚާބުގެ ދެވަނަ ބުރުގައި ދަ ޑިމޮކްރެޓްސްއިން "ނިއުޓްރަލް ސްޓޭންޑް"ގައި ތިބޭނެ ވާހަކަ ރައީސް ނަޝީދު ވިދާޅުވިކަމަށެވެ.
ރައްޔިތުންގެ މަޖިލީހުން ފާސްކުރި ނިޒާމީ ވޯޓުގެ ގަރާރާ ގުޅޭގޮތުން މަޝްވަރާކުރެއްވި ކަމަށްވެސް ރައީސް ސާލިހު ވިދާޅުވިއެވެ. އެގޮތުން އިންތިޚާބަށްފަހު ނިޒާމީ ވޯޓުގެ ކަންތަކުގައި އިލެކްޝަންސް ކޮމިޝަންގައި އެދުމާ ގުޅޭގޮތުން ދެބޭފުޅުން ވާހަކަ ދެއްކެވިކަމަށް ރައީސް ސާލިހު ވިދާޅުވިއެވެ.
