ށ.މިލަންދޫ ގޮނޑުދޮށް ހިމާޔަތްކުރުމުގެ މަސައްކަތް ނުނިމޭތީ ރައްޔިތުންގެ ކަންބޮޑުވުން
18 ޖުލައި 2025 | ހުކުރު 16:30މިލަންދޫ ގޮނޑުދޮށް ހިމާޔަތްކުރުމުގެ މަޝްރޫއަކީ 34.6 މިލިއަން ރުފިޔާގެ މަޝްރޫ އެއް
ށ.މިލަންދޫ ގޮނޑުދޮށްް ހިމާޔަތް ކުރުމަށް ރިވެޓްމެންޓް ޖެހުމާއި ބޮޑު ހިލަ ޖެހުމަށް ބޭނުންވާ ސާމާނުތައް
ރައީސް އިބްރާހީމް މުޙައްމަދު ޞާލިޙުގެ ވެރިކަމުގައި ށ. މިލަންދޫގެ ގޮނޑުދޮށް ހިމާޔަތްކުރުމަށް ފެށި މަޝްރޫޢުގެ ދަށުން، ސަރުކާރު ބަދަލުވިއިރު ބޮޑު ސަރަހައްދެއް ނިމިފައިވީ ނަމަވެސް، މިހާރުގެ ސަރުކާރުން މި މަސައްކަތް ފުރިހަމަކޮށް ނިންމާލާފައި ނުވާތީ އާއްމުންގެ ކަންބޮޑުވުން ފާޅުކުރަން ފަށައިފިއެވެ.
ށ.މިލަންދޫ ގޮނޑުދޮށް ހިމާޔަތްކުރުމުގެ މަސައްކަތުގެ ތެރެއިން ބޮޑު ބައެއް ވެރިކަން ބަދަލުވި އިރު ނިންމާފައިވާ ކަމަށް މައުލޫމާތު ލިބެއެވެ. މި ސަރުކާރުން ވެރިކަމަށް އައިސް ބޮޑު ހިލަ ޖަހާ ސަރަހައްދަށް ބައެއް ބަދަލުތައް ވަނީ ގެނެސްފައެވެ. އެހެންނަމަވެސް މަޝްރޫޢުގެ ފުރަތަމަ ފޭސްގެ ނުނިމި ހުރި ބައި ނުނިމި ދިގުލައިގެން ދާތީ އާއްމުން ދަނީ ކަންބޮޑުވުން ފާޅުކުރަމުންނެވެ.
ޚާއްސަކޮށް އެ މަސައްކަތަށް ބޭނުންވާ މެޝިނަރީ އާއި ސާމާނުތައް ހުރި ނަމަވެސް އެ މަސައްކަތް ނުނިމި ލަސްވަމުންދާ ސަބަބާއި މެދު އާއްމުން ވަނީ ސުވާލު އުފައްދާފައެވެ.
124 ހެކްޓަރުގެ ބޮޑު މިލަންދޫ ގިރާތީ ހިމާޔަތްކުރަނީ ރަށުގެ އެންމެ ހިތްގައިމު އެއްސަރަހައްދުގެ ގޮތުގައި އޮންނަ ކަނޑޫފަލާ ކުރެދި ގަސްތައް އޮންނަ ސަރަހައްދެވެ. މި ސަރަހައްދު ގިރާ ގަސްތަކަށް ގެއްލުންވަމުންދާތީ ކައުންސިލުން ވަނީ މީގެ ކުރިން ވެސް އެކަން ކަމާއި ބެހޭ ފަރާތްތަކުގެ ސަމާލުކަމަށް ގެނެސްފައެވެ.
ގޮނޑުދޮށް ހިމާޔަތްކުރުމުގެ މަޝްރޫއުގެ ދަށުން، މިލަންދޫ އިރުމަތީ ފަރާތުގެ ގޮނޑުދޮށް 954.43 މީޓަރ ސަރަހައްދެއްގައި ބޮޑުހިލައިގެ ރިވެޓްމަންޓެއް ގާއިމުކޮށް ރިވެޓްމަންޓުގެ ދެކޮޅުގައި 44.77 މީޓަރ ބޮޑު ހިލައިގެ ދެ ފައިކަށި ބެހެއްޓުން ހިމެނެއެވެ. މިލަންދޫ ގޮނޑުދޮށް ހިމާޔަތްކުރުމުގެ މަޝްރޫއަކީ 34.6 މިލިއަން ރުފިޔާގެ މަޝްރޫއެކެވެ.
ށ.މިލަންދޫ ބަނދަރު ތަރައްޤީކުރުމުގެ މަޝްރޫޢުގެ މަސައްކަތް މި އަހަރުގެ އޮގަސްޓުމަހަށް ނިންމާލެވޭނެކަމަށް ސަރުކާރުން ވަނީ ބުނެފައެވެ.
