ވީއައިއޭގެ އައު ޓާރމިނަލްއާއި ގުޅިގެން ކުރެވޭ ބަހުސްގައި، ޝުކުރު ހައްގުވަނީ ކޮން ރައީސަކަށް؟

ވެލާނާ އިންޓަރނޭޝަލް އެއަރޕޯޓް ރަސްމީކޮށް ހުޅުވުން ޖުލައި 26، 2025 ވަނަ ދުވަހަށް ތާވަލްކޮށްފައިވާއިރު، މިޓަރމިނަލްގެ މަސައްކަތްތައް ކުރިއަށްގެންދިޔަ ގޮތާއި ގުޅޭގޮތުން ސޯޝަލް މީޑިޔާގައި ބަހުސްތަކެއް ކުރެވެން ފަށައިފިއެވެ. އެއްބަޔަކު ބުނަނީ މިކަމުގެ އެންމެ ހައްގު ޝުކުރެއް އަދާކުރަން ޖެހެނީ ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް ކަމަށެއެވެ. އަނެއް ބަޔަކު ބުނަމުންދަނީ ކުރީގެ ރައީސް އިބްރާހިމް މުހައްމަދު ސާލިހްއަށެއެވެ. އަދި ދެންތިބި މީހުން ބުނަމުންދަނީ ހަޤީޤީ ބާނީއަކީ މިހާރުގެ ރައީސް ޑރ. މުހައްމަދު މުއިއްޒު ކަމަށެއެވެ.

ކޮންމެއަކަސް، އަދި ކޮންމެ ވެރިއަކު ކޮށްދިންކަމެއް ކަމުގައި ވިޔަސް ރަނގަޅު ކަމެއް ކޮށްދީފިނަމަ އެކަމެއް ވާނީ ރަނގަޅު ކަމަކަށެއެވެ. ނަމަވެސް ހަޤީގަތް އޮޅުވާނުލައްވާށެއެވެ. މެޑަލް ޖައްސަވަން ނޫޅުއްވާށެއެވެ. މިކަމުގެ ފޮނި މީރުކަން ރައީސް މުއިއްޒުގެ ސަރުކާރުން ނަގަން މަސައްކަތް ކުރި ކަމުގައިވިޔަސް އެއީ ހަޤީގަތެއް ނޫނެއެވެ. ހާގީގީ މޭސްތިރިންނަކީ ކުރީގެ ރައީސް ޔާމީންއާއި، ކުރީގެ ރައީސް ސާލިހްއެވެ.

ރައީސް ސާލިހް ވެރިކަމަށް ވަޑައިގެންނެވިއިރު ހަމައެކަނި އަޅާފައިވަނީ ޓާމިނަލްގެ ބިންގާއެވެ. ނަމަވެސް އެމަނިކުފާނުގެ ވެރިކަމުގައި ޓާމިނަލްގެ މަސައްކަތަށް ވަނީ ބޮޑު ބަދަލެއް ގެންނަވާފައެވެ. މިއަދު އެފެންނަ ޓާމިނަލްއަކީ އެގެންނެވި ބަދަލުގެ ރީތިކަމެވެ. އަދި 2023 ވަނަ އަހަރު ނިމުނުއިރު 80 އިންސައްތައް މަސައްކަތްވަނީ ނިމިފައެވެ.

ރައީސް ސާލިހްގެ ވެރިކަމުގައި ޓާމިނަލްގެ މަސައްކަތް ނިންމަން ބޭނުންވާ ފައިސާ ވަނީ ހޯއްދަވާފައެވެ. އަދި 2025 ވަނަ އަހަރު ޖޫން މަހަށް ޓާމިނަލްގެ މަސައްކަތް އެއްކޮށް ނިމޭނެކަން އޭރު ވަނީ އިއުލާންކުރައްވާފައެވެ. އަދި ޓާމިނަލްގެ މަސައްކަތުގެ 75 އިންސައްތަ ނިންމަވާ އެކަމަށް ބޭނުންވި ފައިސާގެ ބޮޑުބައި ހޯއްދެވީތީ ރައީސް ސާލިހަށް ހައްޤު ޝުކުރު އަދާކުރަންޖެހެއެވެ.

އަދި އެމަސައްކަތް ފައްޓަވަން، ބޭނުންވި ފައިސާގެ ގިނަ އަދަދެއް ހޯއްދެވީ ރައީސް ޔާމިންއެވެ. އެމަނިކުފާނަށްވެސް މިޝުކުރު ފަށްފަށްކޮށްލަމެވެ. ކޮންމެއަކަސް މިހާރުގެ ރައީސް މުއިއްޒުގެ ސަރުކާރުން މިޓާރމިނަލް ހަގީގަތަކަށް ހެދުމަށްޓަކައި ކުރި ހަމައެކަނި ކަމަކީ މަޝްރޫއު ހުއްޓާނުލާ ކުރިއަށް ގެންދިޔަ ކަމެއެވެ. ރާއްޖޭގެ ހުރިހާ ކަންކޮޅެއްގައި ފައްޓާފައިވާ ގިނަ މަޝްރޫއުތައް ހުއްޓާލި އިރު މިމަސައްކަތް ހުއްޓާނުލާ ކުރިއަށްގެންގޮސް، ޓާމިނަލްގެ ބާކީ މަސައްކަތުގެ ބޮޑު ބައި ފުރިހަމަ ކުރައްވާ، ހުޅުއްވާދެއްވާކަމަށްޓަކައި ރައީސް މުއިއްޒުއަށްވެސް މިއަދު ޝުކުރު ހައްގުވެއެވެ. ހުއްޓުވުން ޖެހޭ ސަބަބެއްވެސް ނެތްތާއެވެ. މަޝްރޫގެ މަސައްކަތަށް ބޭނުންވާ ހުރިހާ ފާއިސާއެއްވަނީ ކުރީގެ ސަރުކާރުން ހަމަޖައްސާފައެވެ. މިސަރުކާރަށް ކުރަން ޖެހުނު ކަމަކީ ތާވަލާއި އެއްގޮތަށް މަސައްކަތް ކުރިއަށް ގެންގޮސް އެއަޕޯޓް ހުޅުވުމަށް ކުރަންޖެހޭ މަސައްކަތް ކުރުމެއެވެ. ނަމަވެސް މިކަންވެސް ރަނޅަށް ކުރެވެއެކޭ ބުނެވޭކަށް ނެތެއެވެ. އެއަޕރޯޓް ހުޅުވުމާއި ގާތްވެފައިވަނިކޮށް އަޑު އިވެނީ އެއަޕޯޓްގެ ވީއައިޕީ ޓާރނިމަލް ތަރައްޤީ ކުރަން ބޭރުގެ ކުންފުންޏަކަށް ދޭން އުޅޭ ވާހަކައެވެ. އެއަރޕޯޓް ހުޅުވުމުގެ ރަސްމިއްޔާތުވެސް ބޭރުގެ ބަޔަކަށްދޭން އުޅޭ ވާހަކައެވެ. މުޅިއަކުން މިވެރިންގެ ޕްލޭންއެއް ސާފެއްނުވެއެވެ. ދިވެހިންގެ އެއަރޕޯޓް ޖީއެމްއާރްއަށް ވިއްކާލިކަމަށް ބުނެ، ކުރިން އަޑު އުފުލި މީހުން މިއަދު ކަންކުރަން މިއުޅެނީ ކޮންގޮތަކަށްބާވައޭ ހިތައް އަރައެވެ.

26 ޖުލައިގައި ޓާމިނަލްގެ އެއްބައި ހުޅުވަން ނިންމާފައިވާކަމީ ކޮންމެ ރައްޔިތަކުވެސް އުފާކުރަންޖެހޭކަމެކެވެ. މިއީ ރާއްޖޭގެ މައި ދޮރާށިއެވެ. ޓުއަރިޒަމްއަށް ފައްކާވެފައިވާ ދިވެހިރާއްޖޭގެ މަލަމަތިއެވެ. މިމަލަމަތި ރީތިވީމާ ކޮންމެ ދިވެހިރައްޔިތަކުވެސް އުފާކުރާނެއެވެ. އެކަމަކުވެސް ހަގީގަތާއި އެކީ ކުރިއަށްދާން އެބަޖެހެއެވެ. ރައްޔިތުންނަށްޓަކައި، ނުވަތަ ރާއްޖޭގެ ތަރައްޤީއަށްޓަކައި އެއް ވެރިއަކު ފައްޓަވާފައިވާ، މަސައްކަތެއް އަނެއް ވެރިއަކުވެސް ނިންމަވާލަ ދެއްވަން ޖެހިވަޑައިގަންނަވާނެއެވެ. އެކަމަކު ރަނގަޅު ގޮތަކީ އެކަމުގެ ކްރެޑިޑް ނުނެންގެވުމެއެވެ. ޝުކުރު ހައްގުވާ ފަރާތްތަކަށް ސަރުކާރުންވެސް ޝުކުރު އަދާކުރެއްވުމެވެ.

ކޮންމެއަކަސް ވީއައިއޭގެ އައު ޓާމިނަލްގެ މަސައްކަތް ނިމި ހުޅުވަން ގާތްވެފައިވަނިކޮށް، ހަގީގީ ޝުކުރު އޮތީ ކޮންބޭފުޅަކަށްތޯ އުފެދެމުންދާ ސުވާލުގައި ބައެއް މީހުން ބުނަނީ ޓާމިނަލްގެ ހަގީގީ ބާނީއަކީ ރައީސް ސާލިހު ކަމަށެއެވެ. މިކަމުގައި އަޅުގަނޑަށްވެސް ބުރަވެވެނީ ހަމަ މިގޮތަށެއެވެ.

މިކަމުގައި ތިބޭފުޅުންގެ ތަރުތީބަކީ ކޮބައިތޯއެވެ.؟