ފަރުދެއްގެ ސައި ކަޑަ: ބައިބައިވެފައި އޮތް ގައުމެއް އެއްބައިވަންތަ ކުރުމުގެ ކިއްލާ

ގައުމެއްގެ ގޮތުގައި އެއް ބަޔަކު އަނެއް ބަޔަކާ ދެމެދު އޮންނަ އަޚުވަންތަކަމުގެ ގުޅުމަކީ ހީކުރާވަރަށް ވުރެ މާ ބާރުގަދަ ގުޅުމެކެވެ. ތަރައްގީއާއި ތަހުޒީބާއި ތަނަވަސްކަން އޭގެ ބޮންތީގައި ނެތެއް ކަމަކު، ގައުމިއްޔަތުގެ ތެރެއިން އުފެދިގެން އަޚުވަންތަކަމުގެ ރީތި މިސާލުތައް މި ދުވަސްވަރު އެންމެ އާންމުކޮށް ފެންނަމުންދާ އެއް ގައުމަކީ ލީބިޔާއޭ ދެންނެވުމަކުން ދޮގަކަށް ނުވާނެއެވެ. ތޫފާނީ ގަދަ ވިއްސާރައިގެ ކޮޅިގަނޑުގައި ޑޭމްތަކެއް ފަޅަފަޅައިގެން ގޮސް، ދާރުނާ ސިޓީގެ ބޮޑުބައެއް ދޮވެލި ހިތްދަތި ކާރިސާގެ ތެރެއިން، އަޚުވަންތަ ލޯބީގެ އެތައް މިސާލެއް ދަނީ ފެންނަމުންނެވެ. އުފަލާއި، އަރާމާއި، ލައްޒަތުގެ ފޮނި މީރުކަން ދެކެމުންދާ އެތައް ބަޔަކަށް މިސާލު ދައްކައިދެމުންނެވެ.

އަވާދު އަބްދުﷲއަކީ މި ދެންނެވި ފަދަ ބަތަލެކެވެ. ދާރުނާގައި އޭނާ ދިރިއުޅެމުންދާ ގޭގެ ދޮރުމަތީގައި އަވާދު ހުޅުވީ ވަގުތީ ސައި ކަޑައެކެވެ. ފަހަރެއްގައިވެސް މި ވަގުތުގެ ނާޖާއިޒު މަންފާއެއް ހޯދައި، ވިޔަފާރިއެއް ކުރުމުގެ މަގުސަދުގައެއް ނޫނެވެ. ނަމަވެސް، ހާލުގައި ޖެހިފައިވާ އެތައް ބަޔަކާއެކުގައި އޭނާވެސް ހުރިކަން ސާބިތުކޮށްދިނުމުގެ ގޮތުންނެވެ. އަވާދުގެ ސައި ކަޑައިން ބޯލާ ސައިފޮދަކަށް އެއްވެސް އަގެއް ދައްކާކަށް ނުޖެހެއެވެ.

ހާލުގައި ޖެހިފައި އޮތް ދާރުނާއަށް އެކި ގޮތް ގޮތުން އެހީތެރިކަން ފޯރުކޮށްދިނުމަށް އެ ސަރަހައްދަށް ޒިޔާރަތްކުރާ ދަރުމަވެރިންނަށް ސައި ދިނުމުގައި އަވާދު އަވަދިނެތި އުޅެނީ އަޚުވަންތަ ލޯބީގެ ބާރުގައެވެ. މުޅި ދުވަސް އޭނާ ހޭދަކުރަނީ އެ ގޮތުގައެވެ.

ފެންބޮޑުވުމުގެ ކާރިސާއާ ގުޅިގެން ލީބިޔާގައި ކުރިއަށް ގެންދިޔަ ސަރޗް އެންޑް ރެސްކިއު އޮޕަރޭޝަންތަކުގައި ވެސް އަވާދު ވަނީ އަމަލީ ގޮތުން ބައިވެރިވެފައެވެ. އެ މަސައްކަތުގައި އުޅުމަށްފަހު ސައި ކަޑައެއް ހުޅުވުމުގެ ޚިޔާލު އައީ، ސުންނާފަތިވެފައި އޮތް އޭނާގެ ސިޓީގައި ކެފޭއެއް ހުޅުވައިގެން ޚިދުމަތް ދެވޭނެފަދަ ހާލެއްގައި ތިބި ބަޔަކު ނެތްކަން ފަހުމުވީ ހިސާބުންނެވެ.

ސައި ކަޑައަށް އަންނަ މީހުންގެ ވާހަކަތަކުންވެސް، އެއީ މިއަދު ދާރުނާއަށް ކިހާ މުހިންމު ތަނެއްކަން އަންގައިދެއެވެ.

މި ފަހުގެ ތާރީޚުގައި ލީބިޔާ ދުށް އެންމެ ގެއްލުންދެނިވި ކާރިސާގައި މަރުވި މީހުންގެ ކަށަވަރު އަދަދުތަކެއް އަދިވެސް ނޭނގެއެވެ. އެތައް ބަޔަކަށް ވީ ގޮތެއްވެސް އަދި ނޭނގެއެވެ. ކަނޑުންވެސް އެތައް ބައެއްގެ ހަށިގަނޑުތައް ވަނީ ނަގާފައެވެ. ދާރުނާއިން އެކަނިވެސް 11000ށްވުރެ ގިނަ މީހުންގެ ފުރާނަ ގެއްލިފައި ވާކަމަށް ޚަބަރު ލިބެއެވެ. ބައެއް އާއިލާތަކުގެ ހުރިހާ މެންބަރުން މި ދުނިޔެއާ ވަކިވެ ގޮސްފައި ވާކަމަށްވެސް ބައިނަލްއަގުވާމީ މީޑިއާއިން ވަނީ ރިޕޯޓްކޮށްފައެވެ.