"މި އަވަށުގެ އެންމެން މަރުވެ ހިނގައްޖެ، މުޅި އަވަށްގަނޑު ސުންނާފަތިވެއްޖެ"

ތޫފާނީ ގަދަ ވިއްސާރައިގެ ކޮޅިގަނޑުގައި، ސެޕްޓެމްބަރު 10 ވަނަ ދުވަހުގެ ރޭ، ޑޭމްތައް ފަޅަފަޅައިގެން ގޮސް، ލީބިޔާގެ އައްސޭރިފަށުގެ ސިޓީއެއް ކަމަށްވާ ދާރުނާ ސުންނާފަތިވި ކާރިސާގެ ހަނދާންތަކަކީ އެ ބިރުވެރިކަން ތަހައްމަލުކުރި އެތައް ބައެއްގެ ހިތްތަކުން މިއިން ދުވަހަކު ފިލައިދާނެ ހަނދާންތަކެއް ނޫނެވެ. ކާރިސާއަށް 2 ހަފުތާ ވާން ދިޔައިރުވެސް، އިއްޔެ ވީ ކަމެއްހެން އެމީހުންގެ ލޯ ކުރިމަތީގައި އެ މަންޒަރުތައް ސިފަވަމުން ދިޔައެވެ.

މުޅިންހެން ބިމާ ހަމަވެފައިވާ ދާރުނާގައި އޭނާ ދިރިއުޅުނު އަވަށުގައި ހުރި ގޭތެރޭގެ ތަންތަން ބަލާލަމުން ހިނގަމުން އެ ދަނީ ސައީދު ޚަލީލުއެވެ. ސައީދަކީ މިސްރުން ލީބިޔާއަށް ބަދަލުވި ހިޖުރަވެރިއެކެވެ. ފެންބޮޑުވުމުގެ ބިރުވެރި ކާރިސާގެ ތެރެއިން އޭނާއަށް ސަލާމަތް ކޮށްދެވުނު އަވައްޓެރިންނާއި، މި ދުނިޔެއާ ވަކިވެ ދިޔަ އަވައްޓެރިންގެ ހަނދާންތައް، ޢުމުރުން 61 އަހަރުގެ ސައީދުގެ ސިކުނޑީގައި ހަރުލައިހުރީ ތާޒާކޮށެވެ.

ހިޖުރަވެރިންނާބެހޭ ބައިނަލްއަގުވާމީ ޖަމިއްޔާ (އައިއޯއެމް)އިން ބުނާގޮތުގައި، ފެންބޮޑުވުމުގެ ކާރިސާ ހިނގިއިރު، ދާރުނާ ސިޓީއަކީ 8000އްހާ ހިޖުރަވެރިން، އެމީހުންގެ ދިރިއުޅުން އެތަނެއްގައި ބިނާކުރަމުން ދިޔަ ސިޓީއެކެވެ.

ފެންބޮޑުވުމުގެ ކާރިސާގެ ހަނދާންތަކަކީ، ސައީދުގެ އަންހެނުންނަށް ބަރުދާސްތު ކުރަން މާ ފަސޭހަ ހަނދާންތަކެއް ނޫނެވެ.

'ޑެނިއަލް'ގެ ނަން ދީފައިވާ ތޫފާން، ލީބިޔާގެ އިރުމަތީ އައްސޭރިފަށުގެ ސަރަހައްދަށް އެރީ ސެޕްޓެމްބަރު މަހުގެ 10 ވަނަ ދުވަހުއެވެ.

ތޫފާނީ ގަދަ ވިއްސާރަގަނޑާއެކު، ފެން ހިފަހައްޓަން ޖަހާފައިހުރި ޑޭމްތައް ފަޅަފަޅައިގެން ގޮސް، ދާރުނާގެ ބޮޑު ސަރަހައްދެއް ޣަރަގުވީއެވެ. މަރުވި މީހުންގެ ކަށަވަރު އަދަދުތައް، ރަސްމީ ސިފައެއްގައި އަދިވެސް ނުލިބެއެވެ. ބައެއް ރިޕޯޓްތައް ބުނާގޮތުގައި ދާރުނާއިން އެކަނިވެސް 11000ށްވުރެ ގިނަ މީހުންގެ ފުރާނަ ވަނީ ގެއްލިފައެވެ. ސިޓީގެ މޭޔަރު އަންދާޒާ ކުރައްވާ ގޮތުގައި 20000އްހާ މީހުން ވަނީ ގެއްލިފައެވެ.