"އަހަރެން މިހާރު މުޅިން އެކަނިވެއްޖެ… މީ އެންމެ ފަހު ވަގުތުކޮޅު"

ކިސަޑު ބޯވެ، ހަލާކުވެ، ސުންނާފަތިވެފައި އޮތް ގޭތެރޭގައި އިށީނދެލައިގެން އެ އިނީ އުމުރުން 69 އަހަރުގެ ހަސަން ކައްސާރެވެ. ހިފެހެއްޓުމެއް ނެތި، އޭނާގެ ދެލޮލުން ކަރުނަ ފައިބަމުން ދިޔައެވެ. ގައިބާރު ދެރަވެ، މުސްކުޅިވީ ދުވަހު އޭނާ މިއަދު މުޅިން އެކަނިވެއްޖެއެވެ. މީގެ ހަފުތާއެއް ކުރިން ލީބިޔާއަށް ކުރިމަތިވި ތޫފާނީ ގަދަ ވިއްސާރާގައި ހިނގި ފެންބޮޑުވުމުގެ ހިތްދަތި ކާރިސާގައި، ހަސަންގެ 4 ދަރިން މި ދުނިޔެއާ ވަކިވެހިނގައްޖެއެވެ.

ރުއިމުގެ ތެރެއިންވެސް ހަސަން މަސައްކަތް ކުރަމުން ދިޔައީ އޭނާގެ ދަރިންގެ ވާހަކަތައް ހިއްސާކުރެވޭތޯއެވެ. އޭނާގެ ދަރިންކޮޅު މި ދުނިޔެއާ ވަދާއުގެ ސަލާމްކުރި ހަނދާން ކިޔައިދެވޭތޯ ބަލަމުން ދިޔައެވެ. އެ ވާހަކަތަކުގެ ތެރޭގައި ޙަސަންގެ ދުލުން، އެއް ޖުމުލައެއް ތަކުރާރުވަމުން ދިޔައެވެ. "އަހަރެން މިހާރު މުޅިން އެކަނިވެއްޖެ" އޭ ދޭތެރެ ދޭތެރެއިން ބުނެލައެވެ.

ފެންބޮޑުވުމުގެ ކާރިސާގައި ހަސަންގެ ފުރާނަ ސަލާމަތްވީ، ގަދަ ވިއްސާރައިގެ ތޫފާން ކުރިމަތިވިއިރު އޭނާ ރަށުގައި ނެތުމުގެ ސަބަބުންނެވެ. އޭރު އޭނާ ހުރީ ބޭސްފަރުވާގެ ދަތުރެއްގައި މިސްރުގައެވެ.

ދާރުނާއަށް އެނބުރި އައީ އޭނާގެ ގެއަށް ބޮޑެތި ގެއްލުންތަކެއް ލިބިފައި ވާކަމަށް ބުނެ، ލިބުނު ފޯނު ކޯލަކާ ގުޅިގެންނެވެ. ހަސަންގެ 2 ފިރިހެން ދަރިންނާއި 2 އަންހެން ދަރިންގެ އިތުރުން، އޭނާއަށް ކާފަކިޔާ އަންހެން ދަރިފުޅުވެސް މި ދުނިޔެއާއި ވަކިވެއްޖެކަން އޭނާއަށް އެނގުނީ އެނބުރި ރަށަށް އައި ފަހުންނެވެ.

ކުރިއަށް އޮތް އޮކްޓޯބަރު މަހަކީ ހަސަންގެ އަންހެން ދަރިންގެ ކައިވެނި ކުރަން ހަމަޖައްސާފައި އޮތް މަހެވެ. ނަމަވެސް، އޭނާއަށް އެނބުރި ގެއަށް އާދެވުމުގެ ކުރިން، އެ ދަރިންގެ ކަށުކަމާކެމީގެ ކަންކަންކޮށް، ވަޅުލައިވެސް ނިންމައިފިއެވެ.

ގާތްގަނޑަކަށް 120000އްހާ މީހުންގެ އާބާދީއެއް އޮތް ދާރުނާ މިހާރު އޮތީ މުޅިންހެން ދޮވެލާފައެވެ. މަންޒަރު ސިފަވާ ގޮތަށް ދަންނަވާނަމަ، ޗަކަ ކިސަޑު ބޯވެ، މުށި ކުލައިގައެވެ. އާންމުކޮށް ހިކި ދިޔަވަރެއްގައި ހިކިފައި އޮންނަ ސަރަހައްދުގައި ފެންބޮޑުވެގެން ދިޔައީ، ތޫފާނީ ގަދަވިއްސާރައިގެ ތެރޭގައި 2 ޑޭމެއް ފަޅައިގެންގޮސް، ރަށުތެރެއަށް ފެންގަނޑު އަރައިގެން އައި ހިސާބުންނެވެ.

ލީބިޔާގެ ދައުލަތުގެ މީޑިޔާއިން ހާމަކޮށްފައިވާގޮތުގައި ދާރުނާ ސިޓީގެ 891 އިމާރާތެއް ވަނީ ސުންނާފަތިވެފައެވެ. ސިޓީގެ މޭޔަރު ވިދާޅުވިގޮތުގައި، ފެންބޮޑުވުމުގެ ކާރިސާގައި އެ ސިޓީން 20000އެއްހާ މީހުންގެ ފުރާނަ ގެއްލިފައި ވުން އެކަށީގެންވެއެވެ.