ޑރ. މުއިއްޒު ރައްޔިތުންނަށް ހެޔޮ އެދިވަޑައިގަންނަވާނަމަ އަނިޔާވެރިންނާއި ޚާއިނުންގެ ކިބައިން ދުރަށްވަޑައިގަންނަވާ: ޑރ.އިޔާޒު
22 ސެޕްޓެމްބަރު 2023 | ހުކުރު 07:54ވެރިކަމަށް ވަޑައިގަންނަވަން މަސައްކަތް ކުރައްވަނީ އެންމެ އަނިޔާވެރި ވެރިޔާގެ ފޮޓޯފުޅުގެ ހިޔަނީގައި ހުންނަވައިގެން
އަދާލަތު ޕާޓީގެ އިލްމުވެރިންގެ މަޖިލީހުގެ ނާއިބު ރައީސް އަދި މަޝްހޫރު ދީނީ އިލްމުވެރިޔާ ޑރ. މުހައްމަދު އިޔާޒު އަބްދުލްލަތީފް
ޕީއެންސީގެ ރިޔާސީ ކެންޑިޑޭޓު ޑރ.މުހައްމަދު މުއިއްޒު، ދިވެހި ރައްޔިތުންނަށް ހެޔޮ އެދިވަޑައިގަންނަވާނަމަ އަނިޔާވެރިންނާއި، ޚާއިނުންގެ ކިބައިން ދުރަށްވަޑައިގަތުމަށް އަދާލަތު ޕާޓީގެ އިލްމުވެރިންގެ މަޖިލީހުގެ ނާއިބު ރައީސް އަދި މަޝްހޫރު ދީނީ އިލްމުވެރިޔާ ޑރ. މުހައްމަދު އިޔާޒު އަބްދުލްލަތީފް ގޮވާލައްވައިފިއެވެ.
ޑރ.އިޔާޒު މިހެން ގޮވާލެއްވީ، އިންތިޚާބަށް ކުރިމަތިލެއްވީ އަނިޔާވެރިކަން ނިންމުމަށް ކަމަށް ޑރ.މުއިއްޒު ވިދާޅުވެފައިވާތީ އެވެ. ޑރ.މުއިއްޒު ވިދާޅުވީ އަނިޔާއަކީ މީހަކަށް ނުވަތަ ބަޔަކަށް ޖިސްމާނީ ގޮތުން ދޭ އަނިޔާ އެކަނި ނޫން ކަމަށާއި، ވަރަށް ގިނަ އެހެން ގޮތްގޮތުން ވެސް ބަޔަކަށް އަނިޔާވެރި ވެވިދާނެ ކަމަށެވެ. ޚާއްސަކޮށް ނަފުސާނީ ގޮތުން ބަޔަކަށް ދޭ އަނިޔާއަކީ ވެސް ވަރަށް ބިރުވެރި ކަމެއް ކަމަށް ޑރ.މުއިއްޒު ވިދާޅުވިއެވެ.
ޑރ.މުއިއްޒަށް ރައްދު ދެއްވައި، ޑރ.އިޔާޒު ވިދާޅުވީ އަނިޔާވެރިކަން ނިންމުމަށް ކަމަށް ވިދާޅުވެ ވެރިކަމަށް ވަޑައިގަންނަވަން މަސައްކަތް ކުރައްވަނީ ދިވެހިރާއްޖެ ދުށް އެންމެ ކޮރަޕްޓު, އެންމެ އަނިޔާވެރި ވެރިޔާގެ ފޮޓޯފުޅުގެ ހިޔަނީގައި ހުންނަވައިގެން ކަމަށެވެ. އަދި ދިވެހި ރައްޔިތުންނަށް ހެޔޮއެދިވަޑައިގަންނަވާނަމަ, އަނިޔާވެރިންނާއި ޚާއިނުންގެ ކިބައިން ދުރަށް ވަޑައިގަންނަވަންޖެހޭ ކަމަށް ޑރ.އިޔާޒު ވިދާޅުވިއެވެ.
މީގެ ކުރިން ވެސް ޑރ.އިޔާޒު ވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި ހިންގާފައިވާ އަނިޔާވެރިކަމުގެ މައްޗަށް އަލިއަޅުއްވާލައްވައި ވާހަކަފުޅު ދައްކަވާފައެވެ. އެގޮތުން އެހަނދާންތައް އައު ކުރައްވައި ޑރ.އިޔާޒު ވިދާޅުވެފައިވަނީ 2013 އިން 2018 އަށް ގައުމުގައި އާއްމުވި އަނިޔާވެރިކަމާއި ނާމާންކަމުން ގައުމު މިންޖުކޮށް، އަމާންކަމާއި އުފާވެރިކަމުގެ މިސްރާބަކަށް ރާއްޖެ ގެންގޮސްދެއްވީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ކަމަށެވެ.
