ޕައިލެޓުކަން ކިޔަވަން ސަރުކާރަކުން ދެން ލޯނު ނުދޭނެ ކަމަށް އަމީން ވިދާޅުވި ވާހަކަ އަށް ހައިދަރުގެ ޖަވާބެއް ނެތް
މިނިސްޓަރ ހައިދަރު ވަނީ މައުޟޫއާއި ނުގުޅޭ ސުވާލެއް ކަމަށް ފާހަގަކުރައްވާ އެކަމަށް ޖަވާބެއް ދެއްވުމަށް އިންކާރުކުރައްވާފަ
ހަޔަރ އެޑިއުކޭޝަން މިނިސްޓަރ ހައިދަރު އަދި ޓްރާންސްޕޯޓް މިނިސްޓަރ އަމީން
މި ސަރުކާރުން ދެން ޕައިލެޓުކަން ކިޔެވުމަށް ސްޓޫޑެންޓް ލޯން ދޫ ނުކުރާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ދައްކަވާފައިވާ ވާހަކަތަކާއި ގުޅޭ ގޮތުން، މަޖިލީހުގައި ސުވާލުކުރުމުން މައުޟޫޢު އާއި ގުޅޭ ވާހަކަ އެއް ނޫން ކަމަށް ފާހަގަކުރައްވާ ޖަވާބު ދެއްވުމަށް ހަޔަރ އެޑިޔުކޭޝަން ލޭބަރ އެންޑް ސްކިލްސް ޑިވެލޮޕްމަންޓް ޑޮކްޓަރ ޢަލީ ޙައިދަރު އަޙްމަދު ދެކޮޅުހައްދަވައިފިއެވެ.
ދާދި ފަހުން މިނިސްޓަރ އަމީން ވިދާޅުވީ އަލަށް ޕައިލެޓުކަން ކިޔަވައިގެން އަންނަ މީހުން ނުވަތަ ކެޑޭޓު ޕައިލެޓުން ރާއްޖެއަށް ދެން ބޭނުން ނުވާ ކަމަށެވެ. އެފަދައިން އަމީން ވިދާޅުވެފައި ވަނީ ދިވެހިރާއްޖޭގެ އަޑުން ގެނެސްދިން ޕްރޮގްރާމެއްގައި ވާހަކަ ދައްކަވަމުންނެވެ.
މިނިސްޓަރ އަމީން ވިދާޅުވެފައި ވަނީ ވަޒީފާ އުފެދޭ މިންވަރަށްވުރެ އެތައް ގުނައެއް ގިނައިން ޕައިލެޓުކަން ކިޔަވަމުންދާ މީހުން އެބަތިބި ކަަމަށެވެ. އަދި މިއީ ރާއްޖެ ފިޔަވާ އެހެން ޤައުމުތަކަށް ވެސް ދިމާވެފައިވާ ކަމަށް އަމީން ވިދާޅުވިއވެެ.
މި ސަރުކާރުގައި ޕައިލެޓް ޓްރެއިނިން އަކަށް އިތުރަކަށް ފުރުސަތު، މިވަގުތަކަށް ހުޅުވާލެވޭނެ ކަމަށް ޤަބޫލު ނުކުރައްވާ ކަމަށް ވެސް އަމީން ވަނީ ވިދާޅުވެފައެވެ.
އަމީން އެފަދައިން ވިދާޅުވެފައިވާތީ ހޯމަ ދުވަހުގެ ޖަލްސާގައި ހަނިމާދޫ ދާއިރާގެ މެމްބަރު އަބްދުލް ޢަފޫރު މޫސާ ވަނީ އެއީ މިނިސްޓަރ އަމީން މިނިސްޓަރ ހައިދަރުގެ މެންޑޭޓަށް އަރައިގަތުން ނޫންތޯ ސުވާލުކުރައްވާފައެވެ. އަދި އެކަމާއި މެދު މައުލޫމާތު އޮޅހޯދުމަށް ސުވާލު ކުރައްވާފައިވެއެވެ.
ނަމަވެސް މިނިސްޓަރ ހައިދަރު ވަނީ މައުޟޫއާއި ނުގުޅޭ ސުވާލެއް ކަމަށް ފާހަގަކުރައްވާ އެކަމަށް ޖަވާބެއް ދެއްވުމަށް އިންކާރުކުރައްވާފައެވެ. މިނިސްޓަރ ހައިދަރު މަޖިލީހަށް ހޯމަ ދުވަހު ހާޒިރުކޮށްފައި ވަނީ މިނިމަމް ވޭޖާއި ގުޅުން ހުރި ބައެއް ސުވާލުތައް ކުރުމަށްޓަކައެވެ.
އަމީން ދެން މި ސަރުކާރުން ޕައިލެޓްކަން ކިޔަވަން ލޯނު ނުދޭނެ ކަމަށް ވިދާޅުވެފައިވާ އިރު އެކަމާއި މެދު ސަރުކާރުން މަޝްވަރާކުރުކަން ނުވަތަ އެފަދަ ނިންމުމެއް ނިންމާފައިވާކަން ސަރުކާރުން ހާމަކޮށްފަ އެއް ނެތެވެ. އެހެންނަމަވެސް ލޯނު ދިނުމުގެ ކަންކަމަކީ މިނިސްޓަރ ހައިދަރުގެ މެންޑޭޓުގައި ހިމެނޭ މަސައްކަތެކެވެ.
