ކ. މާލެ
|
5 އޭޕްރިލް 2025 | ހޮނިހިރު 13:33
ރައީސުލްޖުމްހޫރިއްޔާ ޑރ. މުހައްމަދު މުއިއްޒު, އިނގިރޭސިވިލާތައް ކުރެއްވި ދަތުރުފުޅުގައި އެގައުމުގައި ކިޔަވާ ދަރިވަރުންނާ ބައްދަލުކުރައްވައި ވާހަކަފުޅު ދައްކަވަނީ
ރައީސުލްޖުމްހޫރިއްޔާ ޑރ. މުހައްމަދު މުއިއްޒު, އިނގިރޭސިވިލާތައް ކުރެއްވި ދަތުރުފުޅުގައި އެގައުމުގައި ކިޔަވާ ދަރިވަރުންނާ ބައްދަލުކުރައްވައި ވާހަކަފުޅު ދައްކަވަނީ
ރައީސް އޮފީސް
ސްޓޫޑެންޓް ލޯނުން ފައިސާ ނުލިބޭ މައްސަލަ
ދަރިވަރުންނަށް ފައިސާ ލިބުން ލަސްވާ މައްސަލައަށް ހައްލު ހޯއްދަވައި ދެއްވާނެ ކަމުގެ ޔަގީންކަން ރައީސް މުއިއްޒު ދެއްވައިފި
ދިވެހި ދަރިވަރުންނަށް ސަރުކާރުން އިސްކަން ދެއްވާނެ
ދަރިވަރުންނަށް ލިބެންޖެހޭ ފައިސާ ލިބުން ލަސްވުމުގެ ސަބަބުން ކުރިމަތިވާނެ ދަތިތައް އެނގިވަޑައިގަންނަވާ
އީމެއިލްތަކަށް ޖަވާބު ދިނުން ލަސްވުމަކީ އެންމެ ގިނައިން ލިބިފައިވާ ޝަކުވާ، އެ މައްސަލައަށް ވެސް ހައްލު ލިބޭނެ

ލޯނުގެ އެހީގައި ރާއްޖެއިން ބޭރުގައި ތައުލީމު ހާސިލްކުރާ ދަރިވަރުންނަށް ފައިސާ ލިބުން ލަސްވާ މައްސަލައަށް ހައްލު ހޯއްދަވައި ދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފި އެވެ.

މިޔަގީންކަން ދެއްވީ ރައީސް މުއިއްޒު އިނގިރޭސިވިލާތައް ކުރެއްވި ދަތުރުފުޅުގައި އެގައުމުގައި ކިޔަވާ ދަރިވަރުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސް މުއިއްޒު ވިދާޅުވީ ތައުލީމު ހާސިލު ކުރުމަށް ރާއްޖޭއިން ބޭރުގެ ގައުމުތަކުގައި ތިބޭ ދަރިވަރުންނަށް ދިމާވާ ދަތިތަކުގައި ސަރުކާރުން ކޮށްދޭންޖެހޭ ހުރިހާ ކަމެއް ކޮށްދެއްވާނެ ކަމަށާއި، ދިވެހި ދަރިވަރުންނަށް ސަރުކާރުން އިސްކަން ދެއްވާނެ ކަމަށެވެ.

އެހެންވީމަ އަޅުގަނޑު ހަމަ ޔަގީންކަން ދެން އިރާދަކުރެއްވިއްޔާ އިނގިރޭސިވިލާތުގައި ކިޔަވާ ކުދިންނަށް ވެސް ސަރުކާރުގެ ފަރާތުން ހުރިހާ އެހީތެރިކަމެއް ދޭނަން. އެ ޔަގީންކަން ދެން. މިސާލަކަށް ސްކޮލަރޝިޕްގައި އައިސް ތިބި ކުދިިން އަދި ލޯނު ނަގައިގެން އައިސްތިބި ކުދިން އަދި އަމިއްލަ ހަރަދުގައި އައިސްތިބި ކުދިން އެއްވެސް ކަމެއްގެ ތެރެއިން ކަމެއް ކޮށްދިނުމުގައި އެހީތެރިކަމެއް ބޭނުންވަންޏާ އަދި ނުވެ އޮތް ކަމެއް ވިޔަސް އެކަމެއް އަޅުގަނޑު ކޮށްދޭނަން. އިރާދަކުރެއްވިއްޔާ ސަރުކާރުގެ ނިޒާމުގެ ތެރެއިން އަވަސް ކޮށްދިނުމާއި ފަހިކޮށްދިނުމުގައި. އެހެންވީމަ އެކަންކަން ވަރަށް ސަމާލުކަން ދީގެން ކުރިއަށް ގެންދާނަން.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު

ލޯނުގެ އެހީގައި ތައުލީމު ހާސިލް ކުރަމުންދާ ދަރިވަރުންނަށް ފައިސާ ލިބުމުގައި ދިމާވެފައިވާ މައްސަލައަށް އިޝާރާތް ކުރައްވައި ރައީސް މުއިއްޒު ވިދާޅުވީ އެ މައްސަލަތައް ހައްލު ކުރުމަށް ވަރަށް ގިނަ މަސައްކަތްތައް ކުރައްވާފައިވާ ކަމަށެވެ.

ރައީސް މުއިއްޒު ވިދާޅުވީ ކިޔަވާ ދަރިވަރުންނަށް ސަރުކާރުން ޖަވާބު ނުދިނުމާއި އެ ދަރިވަރުންނަށް ލިބެންޖެހޭ ފައިސާ ލިބުން ލަސްވުމުގެ ސަބަބުން ކުރިމަތިވާނެ ދަތިތައް އެނގިވަޑައިގަންނަވާ ކަމަށެވެ. އަދި އެކަންކަން މީގެ އަހަރުތަކެއް ކުރިން އެމަނިކުފާނު ތަޖުރިބާ ކުރެއްވި ކަމަށް ވެސް ރައީސް މުއިއްޒު ވިދާޅުވި އެވެ.

މީގެ އިތުރުން ރައީސް މުއިއްޒު ވިދާޅުވީ ކަމާބެހޭ އިދާރާތަކަށް ފޮނުވާ އީމެއިލްތަކަށް ޖަވާބު ދިނުން ލަސްވުމަކީ އެންމެ ގިނައިން ލިބިފައިވާ ޝަކުވާ ކަމަށާއި، އެ މައްސަލައަށް ވެސް ހައްލު ލިބޭނެ ކަމަށެވެ. އަދި ވިދާޅުވީ އިނގިރޭސިވިލާތުގެ އިތުރުން ބޭރުގެ ގައުމުތަކުގައި ކިޔަވާ ދިވެހި ހުރިހާ ދަރިވަރުންނަށް ވެސް ސަމާލުކަންދީގެން އެއްހަމައެއްގައި ސަރުކާރުގެ ފަރާތުން އެއްބާރުލުން ދެއްވާނެ ކަމަށެވެ.

އިރާދަކުރެއްވިއްޔާ ކުރިއަށް އޮތްތަނުގައި ޓިއުޝަން ފީ ވިޔަސް ޖަމާކޮށްދިނުމުގައި ވިޔަސް ސަރުކާރުގެ ނިޒާމުގެ ތެރޭގައި ހުންނަ އިންފެޝިއަންސީތައް. އަޅުގަނޑަށް އެންމެ ގިނައިން އައިސްފައި ހުރީ ވަރަށް ޖެނުއިން ކޮންސާން. ސަރުކާރުގެ ކަމާބެހޭ އިދާރާގެ ރެންސްޕޮންސް ދަށްވުމާ މިކަހަލަ ކަންތައްތަކަކީ. އީމެއިލްއަށް ޖަވާބުދިނުން ލަސްވުން ކަހަލަ ކަންތައްތައް. އެކަންކަން ހަމަ އިރާދަކުރެއްވިއްޔާ އަޅުގަނޑު އެޑްރެސްކުރާނަން. ނިޒާމުގެ ތެރޭގައި ހުރި މައްސަލަތަކެއް މިއީ. އެކަންކަން އިރާދަކުރެއްވިއްޔާ ރަނގަޅުކޮށް އިފެޝިއެންޓް ކޮށްދީ އިރާދަކުރެއްވިއްޔާ ފަސޭހަތައް ގެނެސްދޭނަން. އަވަސްކޮށް ޖަވާބު ދިނުމާ އޮން ޓައިމް އެ ލިބެންޖެހޭ ފައިސާ ޖަމާކޮށްދިނުމާ މިކަންކަން ރަނގަޅު ކޮށްދިނުމުގެ ކަންތައް ކޮށްދިނުމުގެ ކަންކަން ކޮށްދޭނަން. އެއީ އަޅުގަނޑަށް އެނގޭ އޭގެ މުހިންމުކަން.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު

ރައީސް މުއިއްޒު މިމޭރުމުން ވާހަކަފުޚު ދައްކަވާފައިވާއިރު، ސްޓޫޑެންޓް ލޯނު ސްކީމްގެ ދަށުން ބޭރުގައި ކިޔަވާ ދަރިވަރުންނަށް ފައިސާ ލިބުން ލަސްވުމާއި، އެކަމާ ގުޅޭ ގޮތުން ހަޔާ އެޑިއުކޭޝަން މިނިސްޓްރީއާ ސުވާލުކުރުމުން ޖަވާބު ނުލިބޭ ކަމުގެ ޝަކުވާތައް ބޮޑުވެފައިވަނިކޮށްށެވެ.

- ކޮމެންޓް